Frá árinu 2008 hefur sóknargjald hefur lækkað um næstum 25% meira en fjárveitingar til reksturs annarra aðila sem heyra undir innanríkisráðuneytið. Þetta kemur fram í áfangaskýrslu nefndar innanríkisráðherra til að meta áhrif niðurskurðar fjárveitinga á starfsemi þjóðkirkjunnar og afleiðingar þess að haldið yrði áfram á þeirri braut.
Í skýrslunni segir meðal annars:
„Í ákvæði frumvarps til laga um ráðstafanir í ríkisfjármálum um upphæð sóknargjalds hefur þess ekki verið gætt að nú þarf að verðbæta sóknargjaldið til að gætt sé jafnræðis við aðra aðila sem byggja rekstur sinn á framlögum fjárlaga. Vegna þessa hefur sóknargjald því lækkað um nálægt 25% umfram fjárveitingar til reksturs annarra aðila sem sætt hafa skerðingu til samræmis við almennan niðurskurð frá fjárlögum ársins 2008.“
Og:
„Forstöðumönnum stofnana sem falla undir IRR er gert að glíma við þann vanda að reka stofnanir sínar á næsta ári fyrir fjárheimildir sem mælast 105,44 meðan kostnaðurinn sem fylgir þróun vísitölu neysluverðs er almennt kominn upp í 128,19. Söfnuðum Þjóðkirkjunnar er aftur á móti boðið upp á að reka sig fyrir 79,4 með sama kostnað, eða upp á 128,19. Niðurskurðurinn sem söfnuðirnir standa frammi fyrir að teknu tilliti til kostnaðarhækkana, (38,1%), er því í raun rúmlega tvöfaldur sá niðurskurður sem stofnanir ráðuneytisins hafa mátt sæta (17,7%).“
Niðurskurðurinn hefur haft slæm áhrif á viðhald kirkna, rekstrarkostnað kirkna, laun starfsfólks. Í minni sóknum á landsbyggðinni líður helgihald fyrir fjárskort og í stærri sóknum í þéttbýli eru dæmi þess að aukning aðsóknar, eins og t.d. í barnastarfi sé farin að valda vandræðum vegna þrenginga og niðurskurðar í mannahaldi.
Nefndin stefnir að því að skila lokaskýrslu sinni svo fljótt sem auðið er.
Í nefndinni sitja Ingibjörg Pálmadóttir, formaður, sr. Gísli Jónasson, sr. Halldóra Þorvarðardóttir og Oddur Einarsson.
