Þú finnur kirkjuna einnig á   fr yt Tw fb

Þjóðkirkjan

biðjandi boðandi þjónandi

Félag prestsvígðra kvenna ályktar um kynjahalla í kirkjunni

Prestsvígðar konur í þjóðkirkjunni

Prestsvígðar konur í þjóðkirkjunni.

Í ályktun sem var samþykkt á aðalfundi Félags prestsvígðra kvenna í gær voru sóknarnefndir, valnefndir og kirkjufólk hvött til að taka mið af jafnréttislögum og jafnréttisstefnu þjóðkirkjunnar þegar valið er til ábyrgðarstarfa og embætta innan kirkjunnar.

Ályktunin er svohljóðandi:

Alvarlegur kynjahalli

Ályktun samþykkt á aðalfundi Félags prestvígðra kvenna.

Aðalfundur Félags prestvígðra kvenna minnir á jafnréttislög og jafnréttisstefnu Þjóðkirkjunnar og hvetur sóknarnefndir, valnefndir og kirkjufólk til að taka mið af þeim þegar valið er til ábyrgðarstarfa og embætta innan Þjóðkirkjunnar.

Þegar litið er á kynjahlutfall í embættum og ábyrgðarstöðum innan kirkjunnar kemur alvarlegur kynjahalli í ljós. Á landinu öllu eru 90 sóknarprestsembætti. Þar af eru prestsvígðar konur aðeins í 23 embættum, eða um fjórðungur sóknarpresta. Í þremur stærstu prófastsdæmunum, sem eru á suðvesturhorninu, eru 31 sóknarprestsembætti. Af 31 sóknarpresti eru aðeins sex konur.
Félagið minnir á að þegar valið er í embætti prests eða sóknarprests er ekki nóg að horfa til sóknarinnar einnar, heldur ber að taka mið af kynjahlutfalli innan kirkjunnar, þar með talið í prófastsdæminu og á samstarfssvæðinu.

Það er fagnaðarefni að í ár eru 40 ár frá því að fyrsta konan vígðist til prestsembættis innan þjóðkirkjunnar. Það hefur auðgað og eflt kirkju og kristni í landinu að hafa prestvígt fólk af báðum kynjum. Það er hagur kirkjunnar að hlutföll karla og kvenna í störfum og ábyrgðarstöðum séu jöfn.

Langholtskirkju, 5. maí 2014.

Deila fréttinni


Nýjar fréttir