Þú finnur kirkjuna einnig á   fr yt Tw fb

Þjóðkirkjan

biðjandi boðandi þjónandi

Kjörskrá vegna kjörs vígslubiskups í Skálholti.

Auglýsing um framlagningu kjörskrár, tilnefningu og kosningu vígslubiskups í Skálholti.

Kjörstjórn þjóðkirkjunnar hefur, í samræmi við starfsreglur um kosningu biskups Íslands og vígslubiskupa nr. 333/2017, samið kjörskrá vegna kjörs vígslubiskups í Skálholti. Á kjörskrá eru 975.

Á kjörskrá eru þeir sem uppfylltu skilyrði kosningarréttar þann 2. ágúst 2017.

Sá sem telur sig eiga að vera á kjörskrá getur kannað á þar til gerðu vefsetri hvort nafn hans er á kjörskrá.

Við aðgang að vefsetrinu skal nota rafræn skilríki eða Íslykil Þjóðskrár Íslands, sjá vefslóðina http://kirkjan.is/kosningar/ velja kjörskrá.

Athugasemdir vegna kjörskrár skulu berast kjörstjórn eigi síðar en fimm sólarhringum áður en tilnefning hefst, eða í síðasta lagi kl. 12  föstudaginn 18. ágúst 2017. Unnt er að senda athugasemdir á netfangið kirkjan@kirkjan.is. Allar nánari upplýsingar veitir Hanna Sampsted í síma 528-4000.

Kjörstjórn skal þegar taka til meðferðar athugasemdir sem henni berast vegna kjörskrár og gera viðeigandi leiðréttingar á henni. Ákvörðun kjörstjórnar um leiðréttingu á kjörskrá má skjóta til yfirkjörstjórnar þjóðkirkjunnar. Skal niðurstaða yfirkjörstjórnar liggja fyrir eigi síðar en einum sólarhring áður en tilnefning hefst.

Vakin er athygli á því að samkvæmt nýjum starfsreglum um kosningu biskups Íslands og vígslubiskupa, nr. 333/2017 mun nú í fyrsta sinn fara fram forval (tilnefning) áður en kosning vígslubiskups fer fram. Rétt til tilnefningar hafa eingöngu þeir vígðu einstaklingar sem kosningarréttar njóta, skv. 4. gr., sbr. 3. gr. fyrrnefndra starfsreglna. Heimilt er að tilnefna allt að þrjá einstaklinga sem uppfylla kjörgengisskilyrði skv. 1. gr. starfsreglnanna.

Tilnefningin verður rafræn og stendur frá kl. 12:00 miðvikudaginn 23. ágúst 2017 og lýkur kl. 12:00 mánudaginn 28. ágúst 2017.

Í 1. mgr. 13. gr. starfsreglna nr. 333/2017  segir:

Þeir þrír einstaklingar sem flestar tilnefningar fá, að teknu tilliti til 3. mgr., eru í kjöri til biskups Íslands eða vígslubiskups. Ef tveir eða fleiri fá sama fjölda tilnefninga skulu þeir báðir eða allir vera í kjöri. Séu tilnefndir færri einstaklingar en þrír eru þeir allir í kjöri að teknu tilliti til 3. mgr.

Ákveðið hefur verið að kosning til vígslubiskups í Skálholti fari fram dagana 28. september nk. til og með 9. október 2017, en um er að ræða póstkosningu.

Almennar upplýsingar um fyrirkomulag og framkvæmd tilnefninga og kosningu eru í starfsreglum nr. 333/2017, sem unnt er að nálgast á eftirfarandi vefslóð: https://www.stjornartidindi.is/Advert.aspx?RecordID=a8b0f2cd-30d4-489c-acf2-2888200169d8

Reykjavík, 9. ágúst 2017

f.h. kjörstjórnar þjóðkirkjunnar

Hjördís Stefánsdóttir, formaður

Deila fréttinni


Nýjar fréttir