Kirkjuannálar

aeskr: Dagskrá ÆSKR 2009-2010

Dagskrá ÆSKR fyrir veturinn 2009-2010 ber yfirskriftina Lát trú þína bera ávöxt og að venju inniheldur hún fjölmörg spennandi tilboð fyrir æskulýðsfélögin og leiðtoga þeirra. Nánar má lesa um dagskrána undir þeim lið hér á heimasíðunni.

http://www.kirkjan.is/annall/aeskr/2009-09-04/13.07.11

erlend: Ályktun Kirknaráðs Evrópu um innflytjendamál

Kölluð til að meta gjafir innflytjenda Ár hvert deyja þúsundir manna á leið til Evrópu. Miðjarðarhafið er orðið að nýjum vegg aðskilnaðar í stað þess að vera krossgötur manna og menninga. Misnotkun, óvissa, útilokun og brot á grundvallarmannréttindum, svo sem rétt til heilsugæslu, náms, fjölskyldu of svo framvegis, blasir við þeim innflytjendum sem búa við lagalega óvissu, bæði innan Evrópu og á alþjóðavettvangi. Margir innflytjendur og fjölskyldur þeirra, jafnvel þeir er lifað hafa áralangt í Evrópsku samfélagi eða fæddust í Evrópu, hafa óskýra lagalega stöðu og eiga iðulega á hættu að vera vísað úr landi og til landa er þeir hafa aldrei búið í. Það er líka áhyggjuefni að brottflutningur fólks geti gert kirkjur heimalandanna fátækari en innflytjendur hafa margt að færa þeim löndum sem þeir koma til og koma frá. Nálgun hins kristna við innflytjendur er grundvölluð á ritningunni og sérstaklega hinu skýra boði Krists: "gestur var ég og þér hýstuð mig" (Matt 25:35). "Aðkomumaður, sem dvelur hjá ykkur, skal njóta sama réttar og innborinn maður. Þú skalt elska hann eins og sjálfan þig því að þið voruð aðkomumenn í Egyptalandi" (3 Mós 19:34). Margar kirkjur í Evrópu hafa lagt áherslu á það á liðnum áratugum að mynda góð tengsl við innflytjendur. Fólksflutningar eru umtalsverð áskorun og tækifæri til vitnisburðar og einingar fyrir kirkjuna í Evrópu, sem og þjóðfélagið í heild. Sumt af því fólki sem hefur verið neytt til að yfirgefa eigið land vegna fátæktar, stríðs, ofsókna eða umhverfishamfara, kemur til Evrópu í leit að betri framtíð fyrir sig og fjölskyldu sína. Því er þó oft ómögulegt að hljóta þá vernd sem því ber. Fólksflutningar hafa aukið menningarlega og trúarlega fjölbreytni í Evrópu og í kirkjum Evrópu. Þessi fjölbreytni auðgar og er uppspretta mikillar gleði en getur einnig valdið óöryggi og fordómum í samfélaginu og kirkjunum. Aukin fátækt og vaxandi atvinnuleysi auka á spennu í samfélaginu og innflytjendur verða þá oft blórabögglar. Á nýliðnum árum hafa kynþáttafordómar aukist sem og ofbeldi gegn innflytjendum og minnihlutahópum í Evrópu, einkum gagnvart sígaunum sem hafa búið í Evrópu um aldir. Kirkjur Evrópu hafa gert 2010 að "ári þar sem kirkjur Evrópu bregðast við fólksflutningum" ("European year of churches responding to migration”) til að gera starf kirkna meðal innflytjenda sýnilegra og svara þannig boði Biblíunnar og hvetja til þess að stefna Evrópu og Evrópulanda taki tillit til innflytjenda, flóttamanna og þjóðabrota. Sem kirkjur í Evrópu skuldbindum við okkur til - að tala opinskátt gegn brotum á rétti innflytjenda og fordæma hvers konar kynþáttamisrétti og innbyggða kynþáttahyggju - að setja upp og viðhalda þjónustu fyrir þá sem illa standa meðal flóttafólks og innflytjenda í Evrópu - að vinna gegn ótta við innflytjendur í samfélaginu og styrkja frumkvæði kirkna til að finna leiðir til að lifa saman í friði - að bjóða kristnum innflytjendum að vera meðlimir í kirkjum okkar og hvetja til fullrar þátttöku þeirra og leiðtogastarfa innan kirknanna, og vinna að vináttusambandi við innflytjendakirkjur og kirkjur þjóðabrota - að minnast með árlegum bænadegi þeirra sem látið hafa lífið á leið sinni til Evrópu í leit að mannsæmandi lífi - að styrkja og standa með kirkjum sem búa við erfiðar aðstæður í öðrum heimshlutum. Sem kirkjur í Evrópu biðjum við yfirvöld - að bæta félags- og lagalega vernd þeirra sem verst standa af innflytjendum, einkum fólk er selt er mannsali - að tryggja grundvallarmannréttindi flóttafólks án skilríkja, sérstaklega fólks í flóttamannabúðum - að fjarlægja hindranir, lagalegar og aðrar, er varða fjölskyldulíf innflytjenda - að tryggja óhindraðan aðgang flóttamanna að vernd - að setja skýran lagaramma er kemur í veg fyrir kynþáttamismunun - að forðast laga- eða stjórnunarlegar aðgerðir sem bitna sérstaklega á einstökum kynþáttahópum - að styrkja þróunaraðstoð meðal hinna fátækustu í heiminum. - (þýð: Steinunn A. Björnsdóttir)

http://www.kirkjan.is/annall/erlend/2009-07-24/21.43.37

erlend: Ályktun Kirknasambands Evrópu um umhverfismál

Kölluð til aukinnar ábyrgðar sem ráðsmenn sköpunarinnar Augljóst er að veðurfarsbreytingar eru meiri, margbreytilegri og ákafari en spáð var fyrir nokkrum árum. Veðurkerfi heimsins hefur vendipunkt og þegar farið hefur verið yfir ákveðna þröskulda þá getur það leitt til örari breytinga á veðurfari. Þar auð auki er ekkert víst að nýtt jafnvægi náist. Einstaklingum og samfélögum er mikilvægt að bregðast við, sem og ríkjum og alþjóðasamfélaginu. Í sköpun sinni fól Drottinn mannkyni að gæta jarðarinnar, sem ráðsmenn yfir heiminum. Þegar Guð felur manninum að ríkja yfir lifandi verum jarðar þá er það þetta sem um er að ræða, ábyrgð gagnvart Guði, sem krefst reikningsskila af ráðsmönnum sínum. Þegar mannkyn missir sjónar á ábyrgð sinni sem ráðsmenn og skyldu sinni að bera umhyggju fyrir sköpuninni, sem við erum öll hluti af, þá hefur það valdið því að við höfum glatað þeim samhljómi og jafnvægi alls sem okkur ber að gæta. Þó að auðugri lönd heimsins hafi stuðlað meir að loftslagsbreytingum þá lenda afleiðingar þeirra í mun meira mæli á herðum fátækari þjóða heims og þeim varnalausu. Bæði er það vegna þess að afleiðingarnar koma misjafnlega niður og eins vegna þess hvernig auðlegð og auðlindum til að mæta afleiðingunum er misdeilt. Þess vegna hljóta auðugri ríki að þurfa að leggja meir að mörkum fjárhagslega. Meðal vonartákna og fyrirheita um ný tækifæri sem við blasa til að takast á við þessa alvarlegu aðstæður sem sköpunin stendur frammi fyrir, er fyrirhuguð ráðstefna Sameinuðu þjóðanna um loftlagsbreytingar nú í september og væntanleg heimsráðstefna um loftslagsmál í Kaupmannahöfn í desember á þessu ári. 13. þing kirknasambands Evrópu hvetur stjórnmálamenn, vísindamenn og aðra sem koma að þessum fundum til að taka þær ákvarðanir sem nauðsynlegar eru til að tímamót verði í afstöðu alheimssamfélagsins til ráðsmennsku sinnar yfir gjöfum sköpunarinnar. Þingið hvetur til að tímabilið 1. september til 4. október verði "Tími sköpunarinnar” eins og þingið í Sibiu ályktaði um. Sem kirkjur Evrópu skuldbindum við okkur til að • leggja okkar að mörkum til að hvetja til breyttra lífshátta nægjusemi og hógværðar til að stuðla að sjálfbærri og réttlátri þróun. • auka samstarf kirkna og trúarbragða við að fjalla um og stuðla að umhyggju fyrir sköpuninni Sem kirkjur Evrópu biðjum við stjórnvöld að • hvetja fulltrúa sína í loftslagsráðstefnunni í Kaupmannahöfn í desember 2009 til að gangast undir skýrar og bindandi skuldbindingar með ákveðnum tímamörkum til að takast á við orsakir loftslagsbreytinga • leggja fram fjármuni til að styðja þróunarlönd til að aðlagast neikvæðum afleiðingum loftslagsbreytinga. Þýð.: Karl Sigurbjörnsson

http://www.kirkjan.is/annall/erlend/2009-07-24/21.41.29

erlend: Kölluð til að fylgja fram siðferðisgildum í fjármálaheiminum

13. þing Kirknaráðs Evrópu kemur saman þegar heimurinn lifir alvarlegustu efnahagskreppu í sjötíu ár. Er við komum saman undir yfirskriftinni: Kölluð til einnar vonar í Kristi köllum við eftir endurnýjunar stofnana og kerfa og lýsum staðfastri von okkar að siðferðislegar forsendur rótfestar í trú geti haft heillavænleg áhrif til þess. Andspænis kreppunni og afleiðingum hennar lyfta kirkjur Evrópu fram voninni og því að kreppan ber í sér tækifæri. Úr þessari kreppu höfum við tækifæri til að leggja grunn að nýrri samstöðu þjóða álfunnar og annarra heimshluta. "... Verið ætíð reiðubúin að svara hverjum manni sem krefst raka fyrir voninni sem þið eigið." (1.Pét. 3.15) Kreppan setur spurningarmerki við margar grundvallarforsendur efnahagskerfa sem lengi hafa verið hafnar yfir efa. Núverandi kreppa einskorðast samt sem áður ekki við fjármál, heldur hefur til dæmis lyft fram tengslum fjármála og stjórnmála og umhverfis. Kreppan hefur líka varpað ljósi á hinar mikilvægu andlegu og siðgæðislegu hliðar efnahagslífs og fjármála. Fregnir af batamerkjum efnahagslífsins eru fagnaðarefni en mega ekki verða til þess að við leggjum til hliðar áleitnar og mikilvægar spurningar um orsakir kreppurnnar. Þar að auki munum við búa við afleiðingar kreppunnar um langa hríð og þær hafa afgerandi áhrif á stofnanir og samfélagskerfi. Atvinnuleysi ákveðinna hópa samfélagsins verður langvarandi, fátækt heima og erlendis hefur aukist verulega. Kreppan minnir okkur á að skuldsetning hefur borið uppi efnahagslífið og mikilvægt er að gefa því gaum. Auður sem byggir á lánum og skuldsetningu undangenginna ára getur ekki talist auðlegð. Við höfum lítið heyrt frá ábyrgum valdhöfum og áhrifavöldum sem sýnir vilja til að takast á við grundvallaratriði þeirra lána fjármálakerfa heimsins sem leiddu til kreppunnar. Skilningur okkar á kristinni trú og siðgæði leiðir okkur, kirkjur Evrópu, til að skuldbinda okkur til að • dýpka andlega og trúarlega íhugun á orsökum og merkingu fjármálakreppunnar • stuðla að nýjum lífsstíl sem virðir takmörk auðlinda og að hvetja einstaklinga til að lifa hið kristna siðgæði nægusemi. • efla kristna menningu samstöðu, náungakærleika og umhyggju fyrir þeim sem standa höllum fæti í samfélögum okkar, vinnustöðum og þjóðfélaginu öllu • beita forsendum kristins siðgæðis í eigin fjármálum og sérstaklega í fjárfestingum Kirkjur Evrópu biðja stjórnvöld • að gaumgæfa hinar siðferðislegu víddir kreppunnar og endurmeta áhrif efnahagskerfa okkar á mismunandi hópa samfélagsins. • að stuðla að aukinni ábyrgð og gagnsæi fjármálastofnana efnahagslífsins • að sjá sem frumskyldu stjórnvalda að stuðla að bættum aðstæðum hinna fátækustu og veikustu samfélagsins • að tryggja fjármálakerfi sem lýtur frumforsendum réttlætis og sjálfbærni til að eyðileggja ekki lífsskilyrði komandi kynslóða. • Að lyfta fram dæmum um viðskipti sem kirkjur og trúarleg samtök hafa stuðlað að til hliðar við ríkjandi kerfi, svo sem "réttlát viðskipti"(fair-trade), niðurfelling skulda fátækra ríkja og vaxtalaus lán.

http://www.kirkjan.is/annall/erlend/2009-07-20/16.06.18

erlend: Grænu kortin og rauðu

Á morgunfundi okkar með norsku kirkjunni kl. 7.30 var farið yfir þær ályktanir sem fyrir lágu og ýmsar athugasemdir gerðar. Áhugi var á breyttu orðalagi víða og sterkari áherslum, meðal annars að því er varðaði miðausturlönd og stöðu fatlaðra. Ég tók að mér að mæla fyrir orðalagsbreytingu þar sem rætt var um kirkju sem rúmar alla (inclusive church) og bað um að þar yrði fólk með fötlun sérstaklega tilgreint. Ég hafði í höndunum bréf frá EDAN - Ecumenical Disability Advocacy Network - þar sem gerð er tillaga um vinnuhóp á vegum CEC og EDAN um þessi mál. Þessi tillaga var samþykkt. Það urðu að vonum miklar umræður um ályktanirnar og stundum gekk illa að kjósa þegar breytingartillögur voru margar og ruglandi. Stjórnendur eru ekki öfundsverðir af hlutverki sínu en standa sig vel. Við veifum til skiptis grænum kortum og rauðum eða kjósum leynilega (í miðstjórn). Stundum hefur þurft að endurtaka kosningu af því að salurinn var ekki viss um hvað verið var að kjósa um. Á það einkum við þegar um er að ræða breytingartillögur ivð breytingartillögu. Karl biskup þýddi strax ályktunina um efnahagsmál og ég set hana hér inn í næstu færslu. Við ætlum að þýða fleiri og setja inn í vikunni. Í hádegishléi ræddi ég við Leslie Nathaniel sem er nýr fulltrúi ensku kirkjunnar í tengslahópi Porvoo. Eftir rigningardag og tvo kaldari daga er aftur orðið molluheitt úti.

http://www.kirkjan.is/annall/erlend/2009-07-20/15.26.02

erlend: Þankar frá CEC þingi

Í dag er þriðji dagur þings Kirknaráðs Evrópu, sem haldið er í Síbíu. Dagskrá er stíf og heyrst hafa kvartanir, einkum frá minni sendinefndum hér, sem finnst of miklum tíma varið í að ræða skipulagsmál og fleira þar sem stærri kirkjurnar eru í betri aðstöðu til að hafa áhrif og ráða. Það er bæði vegna þess að þær hafa stærri sendinefndir og einnig vegna þess að í þeim sendinefndum eru oft einstaklingar með víðtæka þekkingu á því hvernig þingið virkar og þær hafa kappkostað að koma fulltrúum frá sér í þingnefndir. Íslenska kirkjan, sem hefur aðeins tveggja manna sendinefnd, nýtur góðs af því hve rík hefð er fyrir samstarfi kirknanna á Norðurlöndum og nú reyndar einnig Eystrasaltslanda og Norðurlanda. Fulltrúar þessara kirkna hafa hist þrisvar til að ræða þingmál og tillögur að fólki í stjórnarnefndir og fleira eru gerðar í sameiningu. Þá hefur norska sendinefndin boðið Íslendingunum að sitja morgunverðarfund með þeim á hverjum morgni kl. 7.30 til að líta yfir stöðuna og heyra frá fulltrúum. Það gefur fyllri mynd af þinginu, þar sem tveir einstaklingar geta aðeins tekið þá í hluta þeirra funda og vinnustofa sem eru í boði. Auk þingfunda í sal, sem ýmist fjalla um skipulagsmál og fjármál eða um þema þingsins á einn eða annan hátt, eru málstofur um ýmis mál og vinnuhópar. Ég hef t.d sótt málstofu þar sem kynnt var skjal um grundvallarréttindi kirkna og trúfélaga sem að CEC vinnur að. Þar er m.a. kveðið a um ýmis atriði er varða skáningu trúfélaga og skráningu í trúfélög, rétt til bygginga á húsi til trúarlegra athafna og takmarkanir á rétti yfirvalda til að ráða málefnum trúfélaga. Skjalið er enn á vinnslustigi og þarfnast mun meiri vinnu, en málið er mjög áhugavert. Höfundur þess er austurrískur lögfræðingur og sérfræðingur í mannréttindum. Ég sótti einnig málstofu um CEC og Evrópusambandið, þar sem kynnt voru drög að úttekt á samræðu kirkna og Evrópusambandsins, sem og kirkna og Evrópuráðsins. Formlegar viðræður hófust 1990 þegar þáverandi forseti sambandsins hvatti kirkjurnar til að vera hjarta og sál Evrópusambandsins. Skýrslan greinir frá 100 formlegum fundum sem haldnir hafa verð milli þessara samtaka og hvaða þemu hafa verið rædd. Þar sem skýrslan hefur ekki ennþá verið birt var okkur meinað að vitna í hana, en hún birtist bráðlega í heild sinni hjá CEC. Ég hef tekið þátt í vinnuhópi um kirkjur og mannréttindi. Commission on Church in Society skipulagði þann fund. Innan þeirra nefndar starfar vinnuhópur um mannréttindi, og má sjá nokkuð af starfi hans á http://cec-kek.org/content/human_rights.shtml Það var áhugavert að taka þátt í starfi þessa vinnuhóps. Í umræðum kom meðal annars fram að það er ákveðin spenna milli trúfrelsis og annarra mannréttinda. Hvatt til þess að CEC vinni frekar með það. Þetta á meðal annars við um spurningar er varða upphaf lífs og dauða, jafnréttismál og málefni samkynheigðra. Fjölmargar sögur frá Evrópu komu fram í umræðunni. Þar á meðal um erfiðleika minnihlutakirkna, eyðileggingu kristinna minja á Kýpur, stöðu kristinna Serba í Kósóvó, stöðu fatlaðra víða og fleira. Við notum líka tímann til að safna efni sem getur nýst heima og líka til að funda með ýmsum kollegum. Í hádeginu í dag hittum við Karl biskup nokkra meðlimi tengslahóps Porvoo og fórum yfir það sem framundan er á þeim vettvangi. Við ljúkum deginum yfirleitt um klukkan 10 á kvöldin þegar fundum lýkur. Í kvöld endar dagurinn niðri í bæ með Taize kvöldbænum.

http://www.kirkjan.is/annall/erlend/2009-07-20/14.25.38

aeskr: Ársfundur ÆSKR

Ársfundur ÆSKR verður haldinn 15. apríl í Langholtskirkju kl.17.00. Fundurinn er opinn öllum en tveir fulltrúar frá hverjum söfnuði hafa atkvæðisrétt, auk vígðra starfsmanna safnaðar. Nálgast má ársskýrslu ÆSKR hér.

http://www.kirkjan.is/annall/aeskr/2009-04-01/10.32.11

aeskr: Janúarnámskeið 2009

Janúarnámskeið ÆSKR árið 2009 verður í Skálholti dagana 9.-10. janúar. Að venju er vandað til námskeiðsins og lagt upp úr góðu samfélagi. Á föstudagskvöldinu verður áherslan á persónulega uppbyggingu leiðtoganna með helgihaldi, fræðslu og samveru. Á laugardeginum verður annars vegar boðið upp á fræðslu sem miðar við yngri leiðtogana og hins vegar fræðslu fyrir eldri og reyndari leiðtoga og æskulýðsfulltrúa sem bera ábyrgð á starfinu. Halla Jónsdóttir aðjúnkt við menntavísindasvið HÍ fjallar um hvernig á að halda utan um fólkið í starfinu, deila verkefnum, hafa starfsaðstæður hvetjandi og hlúa að starfsfólkinu. Áhersla verður á sjálfboðaliða og hvernig kirkjan getur brugðist við nýjum aðstæðum þar sem söfnuðir hafa úr minni pening að moða eins og ástandið í þjóðfélaginu er núna en á sama tíma hefur aðsókn í starf kirkjunnar verið að aukast. Pétur Björgvin Þorsteinsson djákni í Glerárkirkju á Akureyri kennir leiki, en hann hefur viðað að sér mikið af leikjum í gegnum árin og kynnt sér leikjafræði. Pétur Björgvin hefur verið með nokkur leikjanámskeið á vegum ÆSKEY sem hafa hlotið mjög góðar undirtektir. Námskeiðið er opið öllum frá 16 ára aldri sem eru leiðtogar og aðstoðarleiðtogar í æskulýðsfélögum kirkjunnar. Lagt verður af stað frá Grensáskirkju kl.17.00 föstudaginn 9. janúar og komið til baka í Grensáskirkju kl.18.30 laugardaginn 10. janúar. Þátttaka kostar kr. 10.900 fyrir þátttakendur frá söfnuðum innan Reykjavíkur-prófastsdæma en 12.900 fyrir þátttakendur frá öðrum prófastsdæmum. Innifalið í því eru rútuferðir, gisting með uppbúnu rúmi og matur. Skráning fer fram á skrifstofu ÆSKR í síma 528 4427 eða á netfanginu aeskr@kirkjan.is og er síðasti skráningardagur þriðjudaginn 6. janúar.

http://www.kirkjan.is/annall/aeskr/2009-01-05/14.10.52

aeskr: Í hendi Guðs

Næsta starfsár hjá ÆSKR verður fullt af ýmsum skemmtilegum atburðum. Yfirskrift vetrarins er "Í hendi Guðs" og munu helgistundir og fræðsla á atburðum ÆSKR taka mið af yfirskriftinni. Hægt er að skoða dagskrána fyrir unglingana og leiðtogana hér á síðunni. Í hendi Guðs Unglingar 2. okt Óttist ekki – hræðslumót ÆSKR 11. nóv Keilumót ÆSKR 30. nóv Hjálparstarfsverkefni (fer fram í söfnuðum) 13.15. feb. Vormót 21. mars Atburður gegn kynþáttafordómum (í samstarfi við ÆSKÞ o.fl.) 9. apríl Vaktu með Kristi (í samstarfi við ÆNK og ÆSKÞ) 20. maí Útivistarferð Leiðtogar 27. ágúst Dagskrárfundur 23. sept Morgunverður leiðtoga 25. sept Haustnámskeið 5. nóv Leiðtogasamvera – jólaföndur 7. nóv Æskulýðsfulltrúanámskeið 18. des Morgunverður fyrir leiðtoga 9.-10. jan. Janúarnámskeið ÆSKR 7. feb. Sólheimanámskeið 17. mars Morgunverður leiðtoga 15. apríl Ársfundur ÆSKR 16. maí Vorhátíð leiðtoga Föst verkefni verða grunnnámskeið fyrir leiðtoga og farskóli leiðtogaefna . Einnig höldum við áfram kyrrðarstundum fyrir ungt fólk í samstarfi við miðborgarprest og starfi fyrir þroskahamlaða í samstarfi við prest fatlaðra.

http://www.kirkjan.is/annall/aeskr/2008-06-20/14.08.39

aeskr: Námskeið um mannréttindi í ágúst

Námskeiðið ber yfirskriftina "Mannréttindi fyrir ungt fólk á Norðurlöndum” og verður haldið 17.-22. ágúst í Espoo í Finnlandi sem er rétt fyrir utan Helsinki. Námskeiðið er haldið í samstarfi við Lúterska heimssambandið en samskonar námskeið hafa verið haldin í öðrum heimshlutum. Á námskeiðinu verða alþjóðleg mannréttindi kynnt fyrir þátttakendum og ræddar aðferðir til að bregðast við brotum á mannréttindum. Áhersla er á lögð á að skoða mannréttindi út frá sjónarhóli guðfræðinnar. Gert er ráð fyrir 40 þátttakendum á aldrinum 18-30 ára frá öllum Norðurlöndunum en ÆSKR sendir tvo þátttakaendur. Þátttakendur þurfa að greiða 150 evrur í þátttökugjöld og 30% af fargjaldinu. ÆSKR styrkir fulltrúa sína með því að greiða þátttökugjöldin. Umsóknarfrestur er til 15. maí. Allar nánari upplýsingar um námskeiðin má fá á skrifstofu ÆSKR í síma 5284427.

http://www.kirkjan.is/annall/aeskr/2008-04-28/15.12.48

aeskr: EYCE námskeið í júní

EYCE heldur námskeið á Norður-Írlandi nú í júní. Yfirskrift námskeiðsins er "Tearing down the walls, – hvernig á að leysa ágreining og hvetja til sátta í Evrópu” Námskeiðið er haldið á Corrymeela, Ballycastle, Norður Írlandi 22.-27. júní 2008 Áherslan á námskeiðinu verður meðal annars á því að kynna kenningar um hvernig eigi að taka á vandamálum, hvaða hlutverki kirkjur geta gengt í friðarumræðum og kynna sálfræðina sem notuð er í sáttarumleitunum. Sérstök áhersla verður á umfjöllun um Norður-Írland og hvernig tekið hefur verið á deilunum þar. EYCE hefur mikla reynslu af að halda námskeið um samtöl ólíkra trúarhópa og þar með ólíkrar menningar Það er því mjög áhugavert að taka þátt í námskeiðunum þeirra og kynnast í leiðinni ungu fólki sem býr við mjög ólíkar aðstæður en á samt svo margt sameiginlegt með okkur. Námskeiðið er fyrir ungt fólk á aldrinum 20-30 ára og æskulýðsleiðtoga. Fulltrúar ÆSKR verða að skila skýrslu um námskeiðið til ÆSKR eigi síðar en tveimur vikum eftir að heim er komið. Námskeiðsgjaldið er 200 € sem er fyrir húsnæði, uppihaldi og skoðunarferð. Íslendingar fá 50% af fargjaldinu endurgreitt. ÆSKR styrkir þátttakendur sem fara á vegum sambandsins og starfa í kirkju innan Reykjavíkurprófastsdæma um 25% af fargjaldi og helming þátttökugjalds. Sækja þarf um hjá ÆSKR í síðasta lagi 2. maí næstkomandi.

http://www.kirkjan.is/annall/aeskr/2008-04-28/13.49.50

aeskr: Ársfundur ÆSKR

Ársfundur ÆSKR verður haldinn þann 16. apríl n.k. í Grafarvogskirkju og hefst kl.18.00. Á ársfundinum er rædd árskýrsla ÆSKR, kosið í æskulýðsráð og valið í nefndir á vegum sambandsins. Á ársfundi er tækifæri til að kynna sér betur starfsemi ÆSKR og koma skoðunum sínum á framfæri. Tveir fulltrúar frá hverjum söfnuði hafa atkvæðisrétt á ársfundi ÆSKR en auk þess hafa þjónandi prestar og djáknar í söfnuðum prófastsdæmanna atkvæðisrétt á fundinum. Ársfundur er öllum opinn.

http://www.kirkjan.is/annall/aeskr/2008-04-08/15.13.30

aeskr: Kyrrðardagar fyrir ungt fólk í Skálholti

Kyrrðardagar fyrir ungt fólk í Skálholti verða haldnir dagana 19.-20. apríl. Löng hefð er fyrir kyrrðardögum í Skálholti en þetta er í fyrsta sinn sem haldnir eru kyrrðardagar sérstaklega fyrir ungt fólk. Kyrrðardagarnir eru opnir öllu ungu fólki sem hefur áhuga á að upplifa þögnina og það sem henni fylgir. "Þögnin og kyrrðin veita tækifæri til íhugunar, að mæta sjálfum sér og Guði, að sjá líf sitt í nýju ljósi og láta uppbyggjast og endurnærast á sál og líkama. Fólk leitar líka á kyrrðardaga til að takast á við erfiða ákvörðun eða þungbærar fréttir með stuðningi starfsfólksins í hlýrri þögn. Boðin eru trúnaðarsamtöl og fyrirbænir.”(skalholt.is) Lagt verður af stað frá Grensáskirkju laugardaginn 19. apríl kl.11.00, hádegismatur verður á borðum þegar komið er á staðinn en formleg dagskrá hefst kl. 14.00. Kyrrðardögum líkur í messu kl.11.00 á sunnudeginum en dagskránni lýkur svo kl.14.00 með útskrift nemenda úr grunnnámskeiði fyrir leiðtoga í barna- og unglingastarfi. Áætluð koma í Grensáskirkju er kl.15.30. Umsjón með kyrrðardögum hefur Sigríður Hrönn Sigurðardóttir guðfræðingur og kristniboði og samstarfshópur um leiðtogaþjálfun. Þátttaka á kyrrðardögum kostar 9000.- kr og er innifalið í því gisting, fæði og ferðir til og frá Skálholti. Aðeins er rúm fyrir 20 þátttakendur þar sem allir eru í sérherbergi og því um að gera að skrá sig sem fyrst. Skráning fer fram á skrifstofu ÆSKR í síma 5284427 eða á netfangið aeskr@kirkjan.is til 14.apríl. Kyrrðardagarnir eru samstarfsverkefni fræðslusviðs Biskupsstofu, ÆNK, ÆSKR og ÆSKÞ.

http://www.kirkjan.is/annall/aeskr/2008-04-08/11.04.43

aeskr: Febrúarmót ÆSKR vel heppnað

Helgina 15.-17. febrúar var árlegt æskulýðsmót ÆSKR haldið í Vatnaskógi. Að þessu sinni var yfirskriftinn Enginn eins og ÉG! og var áherslan í fræðslunni og hugleiðingum að hver og einn er einstök sköpun Guðs og óendanlega dýrmætur sem slíkur. Dagskráin var fjölbreytt og skemmtileg. Kvöldvökur og diskótek, messa og spurningakeppni æskulýðsfélaganna þar sem MeMe senior bar sigur úr bítum með frábærri frammistöðu. Einnig var boðið upp á fjölbreytta hópa á laugardeginum þar sem m.a. var hægt að velja pottaspjall, föndur, graffa, videohóp, ljósmyndamaraþon, fantasíuförðun, fréttahóp og söng. Stemningin hjá þeim 180 unglingum og leiðtogum sem voru á mótinu var mjög góð og öll samskipti og þátttaka til fyrirmyndar. Fréttahópurinn var duglegur að taka myndir á mótinu og hér má sjá þær. ÆSKR þakkar öllum sem voru á mótinu fyrir samveruna og sérstakar þakkir fær móstnefndin sem lagði á sig mikla vinnu til að skipuleggja og framkvæma metnaðarfulla og skemmtilega dagskrá en í mótsnefnd voru Anna Arnardóttir æskulýðsfulltrúi Digraneskirkju, Sigurvin Jónsson æskulýðsfulltrúi Neskirkju og Grétar H. Gunnarsson æskulýðsfulltrúi í Árbæjarkirkju.

http://www.kirkjan.is/annall/aeskr/2008-03-03/10.57.20

aeskr: Dagskrá mótsins Enginn eins og ÉG!

Enginn eins og ÉG! mót ÆSKR er fullt af skemmtilegri dagskrá og ættu allir sem koma á mótið að finna eitthvað sem þeir hafa áhuga á. Eins og nafnið gefur til kynna þá verður sjónum beint að okkur sjálfum og sjálfsmyndinni og fer fram vönduð fræðsla um efnið. Hugleiðingar og messa mótsins verða einnig tengdar yfirskriftinni og veltum við upp spurningunum – hvernig sé ég mig? Hvernig sjá aðrir mig? Hvernig sé ég aðra? Og hvernig sér Guð mig? Á síðustu mótum hefur verið lögð áhersla á söng og hefur ÆSKR fengið hjómsveit til að stjórna söngnum sem hefur gefist vel. Að þessu sinni erum við með nýja hljómsveit sem er skipuð leiðtogum og unglingum úr MeMe í Digraneskirkju, Grafarvogskirkju auk öflugs liðsmanns frá Garði á Suðurnesjum. Hljómsveitin þreytti frumraun sína á Sólheimanámskeiðinu þann 2. febrúar og hefur sjaldan sést annað eins, því má búast við miklum og kröftugum söng á mótinu. Á laugardeginum fer fram spurningakeppni ÆSKR og mætir hvert félag með þriggja manna lið sem þarf að vera undirbúið undir að svara jafnt almennum spurningum sem Biblíuspurningum. Að venju verður hópastarf á laugardeginum þar sem boðið er upp á fjölbreytta afþreyingu og skemmtun. Hér fyrir neðan má svo sjá dagskrá mótsins. Föstudagur 18.00 Lagt af stað frá Breiðholtskirkju 19.10 Komið í Vatnaskóg og farangur settur í herbergi 19.30 Kvöldmatur (matsalur) 20.30 Kvöldvaka – Ég sé þig! (íþróttahús) 22.00 Kvöldkaffi Frjáls tími; heitir pottar, spil í matsal, spjall í Gamla, söngur í kapellu 23.00 Diskótek (íþróttahús) Frjáls tími 01.00 Stund fyrir svefninn (íþróttahús) 01.30 Ró (hver í sínu rúmi) Laugardagur 9.00 Vakning 9.30 Morgunmatur (matsalur) 10.00 Morgunstund(íþróttahús) Bæn, fræðsla og verkefni 12.00 Matur (matsalur) 13.00 Hópar, skyldumæting – (út um allt, skráning í matsal) ýmsir hópar m.a. leiklist, söngur,stuttmyndagerð, stækkum táknin, föndur, mission impossible 15.30 Kaffi (matsalur) 16.00 Spurningakeppni (matsalur) Einnig í boði; heitir pottar, spjall í Gamla, hópavinna, útileikir ofl. 19.30 Matur (matsalur) 20.30 Kvöldvaka - atriðakeppni -úrslit í spurningakeppni 22.30 Kvöldkaffi Frjáls tími; heitir pottar, spil í matsal, spjall í kapellu 00.01 Miðnæturleikur – vera vel klædd 02.00 Ró Sunnudagur 9.30 Vakning 10.00 Morgunmatur 11.00 Mögnuð morgunstund - leynigestir 12.30 Frágangur og farangur út í rútur 13.00 Matur 13.30 Messa í Hallgrímskirkju við Hvalfjarðarströnd 16.00 Heimkoma í Breiðholtskirkju

http://www.kirkjan.is/annall/aeskr/2008-02-04/15.36.32

Athugið að þennan lista má einnig sækja sem RSS

Spurningar og svör

Fréttir af kirkjan.is

Nýtt á kirkjuvefjum

Nýlega uppfært

Allir annálar

Vefir kirkjunnar

Vefir sókna

Annálar æskulýðsfélaga

Lúkas
USH

RSS veitur

Annálar eru sjálfvirkt birtir á rss formi. Bæta þarf /rss.xml aftan við heiti annálsins til að skoða skránna, svo http://www.kirkjan.is/annall/[heiti annáls]/rss.xml.