Austurlandsprófastsdæmi

Fyrsti héraðsfundur nýstofnaðs Austurlandsprófastsdæmis verður haldinn á Eiðum laugardaginn 25. febrúar nk. Fundurinn hefst með guðsþjónustu í Eiðakirkju kl. 11 árdegis og héraðsfundarstörf fara svo fram í Kirkjumiðstöðinni við Eiðavatn. Á fundinn eru boðaðir prestar prófastsdæmisins og tveir fulltrúar frá hverri sókn, að jafnaði formaður og safnaðarfulltrúi. “Starfsmönnum sókna og prófastsdæmis svo og öllum áhugamönnum innan Þjóðkirkjunnar um kirkjuleg málefni er heimilt að mæta á héraðsfundi með málfrelsi og tillögurétt,” svo sem í starfsreglum greinir. Héraðsnefndir gömlu Múla- og Austfjarðaprófastsdæmanna starfa fram að héraðsfundi, en þá verður kjörin ný héraðsnefnd samkvæmt þar að lútandi reglum. (Myndin er frá héraðsfundi Múlaprófastsdæmis 2010.)

Austurlandsprófastsdæmi boðar í samstarfi við Biskupsstofu til námskeiðs fyrir þá sem sitja í sóknarnefndum prófastsdæmisins. Námskeiðinu er ætlað að styrkja sóknarnefndafólk í sínu mikilvæga hlutverki í þágu kristnilífsins í fjórðungnum. Námskeiðið verður haldið í Safnaðarheimili Reyðarfjarðarkirkju laugardaginn 4. febrúar kl. 10:30-14:30.

Dagskrá námskeiðsins:
10:30 Helgistund – sr. Davíð Baldursson prófastur
10:45 Þjóðkirkjan, þjónusta hennar og samstarfssvæðin – umsj. óákv.
12:00 Matarhlé
12:30 Hlutverk sóknarnefnda skv. lögum og reglum sem um þær gilda – Guðmundur Þór Guðmundsson, lögfræðingur og framkvæmdastjóri Kirkjuráðs.
14:00 Fyrirspurnir og umræður.
14:30 Námskeiðslok og heimferð

Námskeiðið er sóknarnefndarfólki að kostnaðarlausu en gert ráð fyrir að söfnuðir greiði hádegismatinn fyrir sitt fólk. Athygli er vakin á að Kirkjuþing samþykkti í nóvember sl. nýjar starfsreglur um sóknarnefndir. Gott tækifæri verður á námskeiðinu til að kynna sér þessar nýju reglur. Þeir sem starfa í sóknarnefndum á Austurlandi eru hvattir til að fjölmenna á námskeiðið og nýta tækifærið einnig til að koma með fyrirspurnir um það sem á þeim brennur í safnaðarstarfinu.

Vegna málsverðarins eru sóknarnefndarformenn beðnir að tilkynna þátttöku úr sínum sóknum til héraðsprests prófastsdæmisins (holmgrimur@simnet.is, s. 896-0918) í seinasta lagi 1. febrúar nk.

Nú er komið að því! Úrslitin í spurningakeppni fermingarbarna á Austurlandi veturinn 2011-2012 verða haldin sunnudaginn 29. janúar nk. kl. 14:00 á Eiðum. Keppnin hefst með fjölskylduguðsþjónustu í Eiðakirkju kl. 14, síðan verður haldið í Kirkjumiðstöðina við Eiðavatn þar sem boðið verður upp á léttar kaffiveitingar og sjálf spurningakeppnin fer fram þar. Gert er ráð fyrir að keppninni ljúki ekki seinna en kl. 17:00.

Þau lið sem hafa unnið sér þátttökurétt í undanúrslitum eru frá Egilsstöðum, Stöðvarfirði/Breiðdalsvík, Borgarfirði og Reyðarfirði. Fyrst verður keppt í undanúrslitum og sigurvegararnir úr þeim viðureignum keppa síðan til úrslita. Allir keppendur fá gjöf sem viðurkenningu fyrir þátttökuna, en sigurvegarar keppninnar fá einnig vegleg verðlaun auk farandbikars.

Dómari keppninnar verður líkt og í fyrra Stefán Bogi Sveinsson, Útsvarskappi. Áhorfendum mun nú einnig gefast kostur á að taka þátt í laufléttri áhorfendakeppni þar sem vegleg verðlaun verða í boði. Fjölskyldumeðlimir, bekkjarfélagar og aðrir stuðningsmenn eru að sjálfsögðu velkomnir!

Æskulýðssamböndin í Austurlandsprófastsdæmi (ÆSKA) og Eyjafjarðar- og Þingeyjarprófastsdæmi (ÆSKEY) standa í sameiningu fyrir helgarsamveru á Hrafnagili og Akureyri síðustu helgina í febrúar. Gert er ráð fyrir um 100 unglingum af Austur- og Norðurlandi. Unglingarnir eiga það allir sameiginlegt að vera virkir þátttakendur í kirkjustarfinu. Mótsstjóri er sr. Guðmundur Guðmundsson, héraðsprestur. Þema mótsins er sótt í Biblíuna: ,,Jesús segir: Náð mín nægir þér”. Lesa áfram á vef Eyjafjarðar- og Þingeyjarprófastsdæmis.

Davíð Þór Jónsson guðfræðingur hefur verið ráðinn fræðslufulltrúi prófastsdæmisins frá 1. mars til 31. ágúst nk. í leyfi sr. Þorgeirs Arasonar. Davíð Þór hefur starfað sem útvarps- og sjónvarpsmaður, leikari, þýðandi, skáld, ritstjóri og pistlahöfundur. Fræðslufulltrúi sinnir ýmsum verkefnum á vettvangi prófastsdæmisins, einkum á sviði æskulýðs- og fræðslumála og annars safnaðarstarfs. Starfsstöð hans er í Fellabæ. Predikun Davíðs Þórs í Egilsstaðakirkju frá nýliðnu gamlárskvöldi má lesa hér.

Biskup Íslands hefur skipað sr. Davíð Baldursson, sóknarprest Eskifjarðarprestakalls, prófast Austurlandsprófastsdæmis frá 1. febrúar nk. að undangenginni skoðanakönnun meðal sóknarpresta og formanna sóknarnefnda í prófastsdæminu. Sr. Davíð hefur þjónað Eskifjarðarprestakalli frá árinu 1977 og var prófastur Austfjarðaprófastsdæmis fyrir sameiningu prófastsdæmanna á Austurlandi.

Jónas Þór Jóhannsson tók þessar myndir á jólatónleikum Egilsstaðakirkju 3. janúar sl.

Kór Egilsstaðakirkju

Barnakór Egilsstaðakirkju, stjórnandi Sigríður Laufey Sigurjónsdóttir

Unglingakór Egilsstaðakirkju, stjórnandi Margrét Lára Þórarinsdóttir

Kór Vallaness- og Þingmúlakirkna

Eygló Daníelsdóttir lék á flautu

Allir kórarnir sungu saman í lokin

Tónleikarnir voru vel sóttir eins og sjá má

Jólatónleikar Egilsstaðakirkju eru jafnan haldnir á fyrstu dögum nýs árs og verða að þessu sinni í kvöld, þriðjudaginn 3. janúar kl. 20 í kirkjunni. Fram koma: Kór, Barnakór, Unglingakór og Kammerkór Egilsstaðakirkju ásamt Kór Vallaness og Þingmúla. Stjórnandi og undirleikari er Torvald Gjerde. Aðgangur ókeypis og allir velkomnir.

Um 50 manns sóttu sameiginlega aðventustund Eiða- og Hjaltastaðarsókna, sem fram fór í Hjaltastaðarkirkju sl. sunnudag, 18. desember, þrátt fyrir að fresta þyrfti stundinni um viku vegna veðurs. Boðið var upp á fjölbreytta dagskrá í tali og tónum undir stjórn sóknarprests og undirbúningsnefndar og eftir stundina gæddu viðstaddir sér á heitu súkkulaði og kökum. Á myndinni að neðan er söngsveitin Hjartafimmurnar búin að kalla börnin í kirkjunni upp til að syngja með sér jólalag.

Safnaðablöð komu út nú fyrir jólin í Egilsstaðaprestakalli og Valþjófsstaðarprestakalli. Þau má lesa hér á síðunni með því að smella hér fyrir Egilsstaðaprestakall (ath. útgáfa í lágri upplausn) og smella hér fyrir Valþjófsstaðarprestakall (best er að hægrismella og vista skrána áður en hún er skoðuð).