Öskudagur markar upphaf föstunnar. Næsti sunnudagur, 21. febrúar, er því 1. sunnudagur í föstu. Jafnframt er hann konudagurinn. Guðsþjónustur í Múlaprófastsdæmi á þessum degi eru sem hér segir:
Í Bakkagerðiskirkju verður sunnudagaskóli kl. 11.
Í Egilsstaðakirkju messar sr. Vigfús I. Ingvarsson kl. 14 og á Sjúkrahúsinu kl. 15. Barnastarfið er á sínum stað kl. 11.
Í Kirkjuselinu í Fellabæ leiðir sr. Lára G. Oddsdóttir kvöldmessu í léttum dúr kl. 20. Barnastarfið er kl. 11 á laugardaginn.
Í Seyðisfjarðarkirkju messar sr. Cecil Haraldsson kl. 14 og barnaguðsþjónustan er kl. 11.
Í Vopnafjarðarkirkju messar sr. Stefán Már Gunnlaugsson kl. 11 og barnastarfið er á sama tíma.
Verið öll velkomin til kirkju!
Davíð Þór, 18/2 2010
Barna- og fjölskylduguðsþjónusta verður í Valþjófsstaðarkirkju á sunnudaginn, 14. febrúar, kl. 11:00.
Yngri börnin fá afhent barnaefni sunnudagaskólans. Allir velkomnir.
Umsjón með stundinni hefur sr. Lára G. Oddsdóttir, sóknarprestur.
Davíð Þór, 11/2 2010
Guðsþjónustur í prófastsdæminu næstkomandi sunnudag, 7. febrúar, sem er Biblíudagurinn:
Í Bakkagerðiskirkju verður messa kl. 14. Einnig sunnudagaskóli kl. 11.
Í Egilsstaðakirkju verður guðsþjónusta fyrir alla fjölskylduna kl. 11, “5 ára messa”. Fimm ára börn heiðurgestir og Barnakórinn syngur.
Í Seyðisfjarðarkirkju verður almenn guðsþjónusta kl. 14. Einnig barnaguðsþjónusta kl. 11.
Þá verður sunnudagaskóli í Skeggjastaðakirkju og Vopnafjarðarkirkju kl. 11 og kirkjuskólinn í Fellabæ á laugardaginn kl. 11.
Ritningarlestra og bænir Biblíudagsins má lesa hér.
Davíð Þór, 5/2 2010
Barna- og æskulýðsstarf safnaðanna í Múlaprófastsdæmi er nú komið í fullan gang í vetur.
Í Bakkagerðiskirkju er kirkjuskóli um það bil annan hvorn mánudag kl. 14 og TTT-starf í Heiðargerði sömu daga kl. 15:30.
Í Egilsstaðakirkju er sunnudagaskóli hvern sunnudag kl. 11 og Stjörnustund fyrir 2.-4. bekk á fimmtudögum kl. 17. Í safnaðarheimilinu er: TTT-starf á þriðjudögum kl. 15:30 og æskulýðsfélagið Bíbí á fimmtudögum kl. 20.
Í Kirkjuselinu í Fellabæ er kirkjuskóli á laugardögum kl. 11 í okt., nóv., feb. og mars.
Í Seyðisfjarðarkirkju er kirkjuskólinn á þriðjudögum kl. 15:15 og TTT-starf sömu daga kl. 19:30.
Í Skeggjastaðakirkju er opið hús fyrir 1.-7. bekk í safnaðarheimilinu, miðvikudaga kl. 17-18.
Í Vopnafjarðarkirkju er sunnudagaskóli á sunnudögum kl. 11, TTT-starf á þriðjudögum kl. 14-15 og æskulýðsfélagið á þriðjudögum kl. 20.
Davíð Þór, 4/2 2010
Unglingarnir í æskulýðsfélögum kirkjunnar á Vopnafirði og Héraði voru í hópi yfir 150 ungmenna frá Norður- og Austurlandi sem tóku þátt í vel heppnuðu æskulýðsmóti í Stóru-Tjarnaskóla í Ljósavatnsskarði helgina 29.-31. janúar sl. ásamt leiðtogum sínum. Þátttakendur úr Múlaprófastsdæmi voru alls 45.
Yfirskrift mótsins var fengin úr Jeremía 29.11: „Fyrirætlanir til heilla,“ og vísaði í þá fræðslu sem þátttakendur fengu. Þar var áhersla lögð á mannréttindi, að allir ættu rétt á sömu tækifærum og að Guð hefði góðar fyrirætlanir með líf allra.
Sr. Bolli Pétur Bollason, sóknarprestur Laufásprestakalls, bar ásamt Pétri Björgvini Þorsteinssyni djákna í Glerárkirkju, hitann og þungann af skipulagningu mótsins. Dagskráin var fjölbreytt en auk fræðslu og helgistunda má nefna kvöldvöku, sundlaugarpartý og diskótek og ferð til Akureyrar þar sem þátttakendur komust á skauta eða í bíó og tóku þátt í hæfileikakeppninni HÆNU sem er árviss viðburður í kirkjustarfi ungs fólks á Norðausturhorninu. Myndir frá HÆNU má sjá með því að smella hér. Þess má geta að sigurvegarar keppninnar í flokki dans- og líkamstjáningar voru þær Alexandra Sigurdórsdóttir, Sandra Björk Steinarsdóttir, Steinunn Bjarkey Gunnlaugsdóttir og Valdís Ellen Kristjánsdóttir frá Egilsstöðum, en þær sýndu n.k. Hip-hop dans við lagið “Show me the money”.
Mótinu lauk með æskulýðsguðsþjónustu í Þorgeirskirkju við Ljósavatn og höfðu allir mótsgestir undirbúið sitt framlag til guðsþjónustunnar í hópavinnu, með söng, ritningarlestri, bænagjörð, leiklist, predikun og skreytingum. Ekki er annað hægt að segja en að mótið hafi farið vel fram, þátttakendur að langmestu leyti verið til fyrirmyndar og komið heim kátir á sunnudagskvöldinu.
Davíð Þór, 4/2 2010
Nú stendur yfir alþjóðleg, samkirkjuleg bænavika fyrir einingu kristinna manna. Í kvöldmessu í Kirkjuselinu í Fellabæ nk. sunnudagskvöld, 24. janúar kl. 20, verður lesið, hugleitt og beðið út frá þemum bænavikunnar.
Í kvöldmessunum í Kirkjuselinu er notað einfaldara messuform en í hefðbundinni messu og sungnir aðgengilegir söngvar. Að þessu sinni verða sungnir hinir fögru sálmar frá bænum Taizé (borið fram te-se) í Frakklandi.
Sr. Lára G. Oddsdóttir þjónar fyrir altari og sr. Þorgeir Arason predikar. Organisti er Kristján Gissurarson. Almennur safnaðarsöngur. Þetta er sameiginleg messa safnaðanna á Héraði. Allir eru hjartanlega velkomnir og kaffisopi verður í boði eftir stundina.
Davíð Þór, 21/1 2010
María Ellingsen leikkona heldur námskeið fyrir starfsmenn í barnastarfi kirkjunnar á Austurlandi laugardaginn 16. janúar nk. kl. 11:00-15:30 í Kirkjumiðstöðinni við Eiðavatn. Námskeiðið nefnist “Að miðla fjársjóði” en boðskapur kristinnar trúar er sannarlega sá fjársjóður, sem barnastarf kirkjunnar leitast við að miðla.
Trúlega er María Ellingsen flestum Íslendingum að góðu kunn fyrir störf sín að leiklist en færri vita að hún er einnig þrautreyndur sunnudagaskólakennari í Dómkirkjunni og höfundur þess fræðsluefnis, sem notað er í vetur í barnastarfi Þjóðkirkjunnar.
Í fyrri hluta námskeiðsins á laugardaginn fjallar María um framkomu, raddbeitingu og tjáningu, en í seinni hlutanum fjallar hún sérstaklega um barnaefni kirkjunnar og miðlun þess. Námskeiðið er haldið í samstarfi Múla- og Austfjarðaprófastsdæma og er ætlað prestum og leiðbeinendum í kirkjustarfinu, á svæðinu frá Bakkafirði til Djúpavogs.
Davíð Þór, 15/1 2010
Sr. Jóhanna I. Sigmarsdóttir, sóknarprestur á Eiðum og prófastur í Múlaprófastsdæmi, verður í námsleyfi frá 15. janúar til 14. apríl 2010.
Sr. Davíð Baldursson á Eskifirði, prófastur Austfjarðaprófastsdæmis, gegnir einnig störfum prófasts í Múlaprófastsdæmi á þessum tíma. Sr. Þorgeir Arason þjónar Eiðaprestakalli á sama tíma.
Davíð Þór, 15/1 2010
Kirkjulegt æskulýðsmót verður haldið á Norðurlandi helgina 29.-31. janúar nk. og munu tvö æskulýðsfélög í Múlaprófastsdæmi taka þátt, Bíbí á Héraði og Æskulýðsfélag Hofsprestakalls.
Gist verður í Stóru-Tjarnaskóla og dagskrá fer fram þar og á Akureyri, þar sem m.a. er ætlunin að taka þátt í HÆfileikakeppni NorðAusturlands (HÆNA)! Mótinu lýkur með æskulýðsguðsþjónustu í Þorgeirskirkju á sunnudeginum.
Mótið er samstarfsverkefni margra kirkna á Norður- og Austurlandi og er áætlað að yfir 100 unglingar taki þátt. Leiðtogar æskulýðsstarfsins á hverjum stað fyrir sig veita nánari upplýsingar um ferðalagið. Bækling um mótið má nálgast með því að smella hér og upplýsingar um hæfileikakeppnina má sjá með því að smella hér.
Davíð Þór, 12/1 2010
Emmaus, námskeið um trúna og tilveruna, hefst í safnaðarheimili Egilsstaðakirkju þriðjudaginn 12. janúar nk. og stendur í sex vikur.
Er Guð til? Kemur hann mér við? Hvernig get ég beðið og skiptir Biblían einhverju máli?
Ef þú vilt fá tækifæri til að ræða þessar og fjölmargar aðrar spurningar gæti Emmaus-námskeiðið verið fyrir þig!
Emmaus-námskeiðið verður kennt sex næstu þriðjudagskvöld kl. 19:30-21:00 í safnaðarheimilinu, Hörgsási 4, Egilsstöðum. Allir eru velkomnir og námskeiðið er þátttakendum að kostnaðarlausu.
Nánari upplýsingar um námskeiðið má lesa hér.
Þann 23. febrúar hefst svo hjónanámskeið á Egilsstöðum.
Davíð Þór, 5/1 2010
