TTT-mót Austurlandsprófastsdæmis 2013, þ.e. vormót 10-12 ára barna í kirkjustarfinu, voru haldin í Kirkjumiðstöðinni við Eiðavatn helgina 12.-14. apríl nk. Yfirskrift mótanna var: Með gleði og fögnuð í hjarta!
Þátttakendur á þessum tveimur sólarhringsmótum voru alls yfir 100 börn frá 12 TTT-hópum í prófastsdæminu og höfðu þau sér til halds og trausts yfir 30 leiðtoga, presta, foreldra og aðstoðarleiðtoga. Á dagskrá mótsins var m.a. boðið upp á útileiki, hárgreiðslukeppni, kvöldvöku, fótboltaspilsmót, listasmiðju og spurningakeppni. Þá voru helgistundir að kvöldi og morgni og guðsþjónusta í mótslok, en á þessum stundum var unnið með dæmisögur Jesú í Lúkasarguðspjalli um týndan sauð, drökmu og son.
Hér að neðan má sjá myndir af mótinu, sem Hlín Stefánsdóttir tók:
Þorgeir, 19/3 2013
Kirkjutíðindi vorsins 2013 fyrir Egilsstaðaprestakall og Valþjófsstaðarprestakall eru komin út. Í blaðinu má m.a. finna upplýsingar um helgihald fram undan og nöfn fermingarbarna vorsins. Blaðið má lesa hér á vefnum: Kirkjutíðindi Vor 2013
Þorgeir, 19/3 2013
Starfsfólk óskast að sumarbúðunum í Kirkjumiðstöð Austurlands við Eiðavatn í sumar. Umsóknarfrestur er til 2. apríl nk.
Sumarbúðirnar munu í ár starfa í 4-5 vikur fyrri hluta sumars. Um er að ræða fjölbreytt störf leiðtoga með börnum í kirkjulegu sumarbúðastarfi. Nánari upplýsingar um sumarbúðirnar er að finna hér.
Nota ber sérstakt umsóknareyðublað, sjá hér: Umsókn um starf í KMA 2013. Umsóknir berist Þorgeiri Arasyni, Einbúablá 33, 700 Egilsstaðir, eða rafrænt á thorgeir.arason (hjá) kirkjan.is. Öllum umsóknum verður svarað. Þorgeir veitir jafnframt nánari upplýsingar í síma 847-9289.
Vakin er athygli á að með vísan til 10. gr. æskulýðslaga nr. 70/2007 svo og siðareglna vígðra þjóna og annars starfsfólks Þjóðkirkjunnar (samþ. á Kirkjuþingi 2009) þurfa umsækjendur að gefa leyfi sitt til að aflað sé upplýsinga um þá úr Sakaskrá ríkisins varðandi hugsanleg brot á ákvæðum XXII. kafla almennra hegningarlaga eða brot gegn ákvæðum laga um ávana- og fíkniefni nr. 65/1974.
Þorgeir, 15/3 2013
Sunnudaginn 17. mars halda bæði Ássókn í Fellum og Egilsstaðasókn sínar lokasamverur barnastarfsins í vetur:
Ássókn í Fellum – Kirkjuselið í Fellabæ:
Fjölskylduguðsþjónusta – Lokahátíð vetrarstarfsins í Kirkjuskólanum – TTT-hópnum – Fermingarfræðslunni verður í Kirkjuselinu sunnudaginn 17. mars kl. 11:00.
Á eftir verður boðið upp á pylsur, safa, snúða og kaffi.
Egilsstaðakirkja:
Sunnudagaskólinn og Stjörnustundin fara í ferðalag sunnudaginn 17. mars og bjóða foreldrunum með. Farið frá Egilsstaðakirkju kl. 10:30 og komið aftur um kl. 13. Leikir, grill og gaman!
Sóknarprestar
Þorgeir, 12/3 2013
Æskulýðsdagur Þjóðkirkjunnar er á sunnudaginn, 3. mars 2013.
Þá verður að vanda sameiginleg fjölskylduguðsþjónusta safnaðanna á Héraði í Egilsstaðakirkju kl. 11, með þátttöku barna og unglinga.
Einnig verður æskulýðsmessa í Reyðarfjarðarkirkju þennan dag með þátttöku ungmenna og hefst hún kl. 14.
Þorgeir, 27/2 2013
Samvera verður í Kirkjuselinu í Fellabæ á alþjóðlegum bænadegi kvenna, föstudaginn 1. mars 2013 kl. 20.
Á eftir verður boðið upp á kaffi og pönnukökur.
Allir eru velkomnir.
Undirbúningsnefndin
Þorgeir, 27/2 2013
- Frá spurningakeppninni 2013
Úrslit í spurningakeppni fermingarbarna á Austurlandi 2012-2013 fóru fram sunnudaginn 10. febrúar í Eskifjarðarkirkju og voru hluti af dagskrá æskulýðsmótsins í Fjarðabyggð um helgina. Keppnin var hörð og spennandi og úrslitin réðust ekki fyrr en í síðustu spurningu!
Það var lið Egilsstaðaprestakalls sem bar sigur úr býtum að lokum og var það skipað Ásu Þorsteinsdóttur, Eysteini Einarssyni og Guðmundi Davíðssyni. Í öðru sæti varð lið Hofsprestakalls, skipað Hugrúnu Ingólfsdóttur, Unnari S. Halldórssyni og Viktori Má Heiðarssyni. Í þriðja sæti varð lið Eskifjarðarkirkju sem þau Dagný Freyja Guðmundsdóttir, Jökull Logi Sigurbjarnarson og Sóley Arna Friðriksdóttir skipuðu. Fjögur lið unnu sér þátttökurétt í úrslitunum en sameiginlegt lið Heydala- og Djúpavogsprestakalla dró sig úr keppni vegna forfalla.
Skálholtsútgáfan og ýmis fyrirtæki á Austurlandi gáfu verðlaun en sigurliðið ár hvert hlýtur einnig farandbikar til varðveislu í ár. Þetta er í þriðja sinn sem keppnin er haldin og hefur lið Egilsstaðakirkju/Egilsstaðaprestakalls farið með sigur af hólmi öll árin. Spyrill í ár var Hjalti Jón Sverrisson en spurningahöfundur er héraðsprestur og önnuðust hann og sr. Jóna Kristín Þorvaldsdóttir dómgæslu.
Undanriðlar spurningakeppninnar fara að jafnaði fram í fermingarbúðum á Eiðum á haustin en úrslitakeppnin er svo haldin snemma á vorönn. Um helmingur spurninga er úr efni fermingarfræðslunnar en hinn helmingurinn tengist almennri þekkingu s.s. á íþróttum, landafræði og sjónvarpsefni. Það er Prestafélag Austurlands sem stendur að keppninni.
Þorgeir, 12/2 2013
- HÆNA 2013 – Verðlaunahafar
HÆNA – HÆfileikakeppni NorðAusturlands árið 2013 fór fram í Grunnskólanum á Reyðarfirði laugardagskvöldið 9. febrúar og var hluti af dagskrá æskulýðsmótsins um helgina þar á staðnum.
13 glæsileg atriði kepptu í ár og mikil stemmning í salnum. Dómnefnd ársins skipuðu: Tinna Hermannsdóttir æskulýðsleiðtogi á Akureyri, Hjalti Jón Sverrisson tónlistarmaður, Laufey Brá Jónsdóttir leikkona og sr. Davíð Baldursson prófastur á Austurlandi. Umsjónarmaður keppninnar er sr. Sunna Dóra Möller æskulýðsprestur í Akureyrarkirkju.
Verðlaunahafar keppninnar í ár voru: 1. sæti: Hildur Dóróthea Þórðardóttir frá Akureyrarkirkju (10. bekk), sem spilaði á píanó “We found love.” 2. sæti: Ágúst Máni Jóhannsson frá Hofsprestakalli í Vopnafirði (9. bekk), Ingi Þór Halldórsson frá Laufásprestakalli (10. bekk) og Þórkatla Haraldsdóttir frá Akureyrarkirkju (10. bekk), sem sungu og spiluðu “Simple man.” (Þórkatla var jafnframt sigurvegari keppninnar 2012, sem fram fór á Akureyri.) 3. sæti deildu tvö atriði: Ingibjörg Dís Níelsdóttir frá Akureyrarkirkju (10. bekk), sem söng “Hvað er ást?” og þær Edda Björk Vatnsdal, Gabríela Sól Magnúsdóttir og Sigurrós Halldórsdóttir sem fluttu lagið “Wherever you will go.”
Til tíðinda bar á keppninni að þessu sinni að nýr farand-verðlaunagripur var afhentur, forláta plasthæna sem gefur frá sér óhljóðagagg mikið, og var það sr. Gunnlaugur Stefánsson í Heydölum sem gaf hænuna eftir nýlega ferð sína í Asíu!
Þorgeir, 12/2 2013
- Unglingahópurinn við Eskifjarðarkirkju
Æskulýðsmót kirkjunnar á Norður- og Austurlandi fór fram helgina 8.-10. febrúar sl. í Grunnskólanum á Reyðarfirði. Þetta var fimmta árið í röð sem mót af þessu tagi fór fram og eru þau haldin til skiptis í landshlutunum tveimur. Mótið bar að þessu sinni yfirskriftina “Samfélag í trú og gleði” og átti það vel við um andrúmsloftið á mótinu þar sem fræðsla, helgihald og skemmtun fór saman. Boðið var upp á fjölbreyttar smiðjur og verkstæði, þar sem unnið var með leiklist, myndlist, tónlist, lærð glíma, hægt að kynna sér starf í björgunarsveit eða gerast fjölmiðla- og gjörningafólk. Unglingarnir sýndu afrakstur vinnunnar í guðsþjónustu í Eskifjarðarkirkju í mótslok. Kvöldvaka og diskótek voru á sínum stað.
Mótsgestir voru tæplega 100, 72 unglingar og um 20 leiðtogar, leiðbeinendur og prestar. Stærstu hóparnir komu að þessu sinni frá Akureyri og Vopnafirði en einnig voru þátttakendur frá Laufásprestakalli, Egilsstöðum, Reyðarfirði, Fáskrúðsfirði, Stöðvarfirði, Breiðdalsvík og Djúpavogi. Er óhætt að segja að unglingarnir hafi verið til fyrirmyndar í alla staði varðandi þátttöku, framkomu og umgengni og gaman að sjá hve frjó og virk þau voru í hópastarfi og undirbúningi guðsþjónustu.
Mótsstjóri var Þorgeir Arason héraðsprestur en mótsnefnd skipuðu Hjörtur Elí Steindórsson og Jóhanna Sigfúsdóttir, æskulýðsleiðtogar frá Reyðarfirði og framhaldsskólanemar, Jóna Kristín Þorvaldsdóttir sóknarprestur á Fáskrúðsfirði og Stefán Már Gunnlaugsson sóknarprestur á Vopnafirði. Gjörningahópur mótsins vann heimasíðu þess þar sem hægt er að skoða myndir o.fl.: http://kuku2013.tumblr.com/
Þorgeir, 12/2 2013
Börnin skemmtu sér vel!
Helgina 18.-20. janúar sl. fór fram á Vopnafirði ein af þremur námskeiðshelgum vetrarins í Farskóla leiðtogaefna í Austurlandsprófastsdæmi.
Um 20 ungmenni víða að af Austurlandi tóku þátt í námskeiðinu sem fór fram í veiðihúsinu Árhvammi og lauk með sérstakri fjölskyldusamveru á sunnudeginum sem ungmennin á námskeiðinu undirbjuggu og var vel sótt af börnum og foreldrum á staðnum.
Lesa áfram á vef Hofsprestakalls…
Þorgeir, 29/1 2013
