Breiðholtskirkja

Miðvikudaginn 7. mars verður samverustund í félagsskapnum Maður er manns gaman.  Stundin hefst klukkan 13:30 og þá fáum Norbert Muller hjúkrunarfræðing á Heilsustofnun NLFÍ til að fjalla um húmor og hlátur.  Kaffi og kleina í lok stundarinnar.  Allir hjartanlega velkomnir.

Kyrrðar- og bænastund er alla miðvikudaga og hefst hún klukkan 12.  Eftir stundina er boðið upp á létta hádegishressingu.

Fyrsti sunnudagurinn í mars er helgaður börnum og unglingum í kirkjum landsins.  Í Breiðholtskirkju verður æskulýðsguðsþjónusta kl. 11 sem fermingarbörn vetrarins hafa undirbúið.  Þau munu sjá um söng, upplestur og bænir í guðsþjónustunni og undirbúa hressinguna sem verður í safnaðarheimilinu að stundinni lokinni.  Það er því von á skemmtilegri og uppbyggilegri stund í kirkjunni nk. sunnudag þar sem ungir sem aldnir lofa Guð í sameiningu.   Sr. Bryndís Malla Elídóttir sér um stundina ásamt Erni Magnússyni organista.

Það voru dálítið skrýtnir, en skemmtilegir, gestir sem heimsóttu okkur í kirkjuna í gær.  Takk fyrir heimsóknina góðu vinkonur og vinir.   Sjáumst svo á sunnudaginn í fjölskylduguðsþjónustunni.

Á morgun, miðvikudag, verður kyrrðarstund í kirkjunni klukkan 12.  Tónlist, hugvekja og fyrirbænir.  Eftir stundina er boðið uppá létta hádegishressingu í safnaðarheimilinu.

Klukkan 13:30 hefst samvera fyrir eldri borgara.  Gestur dagsins verður María Eiríksdóttir, kennari, og mun hún flytja okkur erindi um Krist og vísindin.  Spjall og kaffisopi í lok stundarinnar.  Allir hjartanlega velkomnir.

TTT (tíu til tólf ára) starfið fellur niður á öskudag og vegna vetrarfría í skólum fellur einnig starf Kirkjukrakka niður á fimmtudeginum.  Minni hins vegar á frábæra fjölskylduguðsþjónustu á sunnudaginn.

Vitanlega eru öll börn í búningum velkomin að syngja fyrir okkur á öskudaginn og fá jafnvel að launum eitthvert gotterí!

Messa kl. 11.  Sr. Bryndís Malla Elídóttir prédikar og þjónar fyrir altari, organisti er Örn Magnússon og kór kirkjunnar syngur.  Messuhópur tekur virkan þátt og fermingarbörn eru hvött til þátttöku.  Sálmarnir sem sungnir verða eru nr. 584, nr. 9, nr. 25 og nr. 343 og 366.  Kaffisopi í safnaðarheimilinu að messu lokinni.

Sunnudagaskóli kl. 11 í umsjón djákna kirkjunnar Nínu Bjargar Vilhelmsdóttur.  Söngur, sögur og fræðsla í bland við gleði og umhyggju.  Sunnudagaskólinn er fyrir börn á öllum aldri sem vilja eiga góða stund í kirkjunni á sunnudagsmorgnum.  Hressing í lokin fyrir börn og fullorðna.

Hollvinafélag Breiðholtskirkju boðar til aðalfundar í kvöld þriðjudaginn 14. febrúar kl. 20.   Allir hollvinir og velunnarar kirkjunnar eru hvattir til þess að mæta og taka virkan þátt í umræðum um kirkjustarfið.  Te, kaffi og hollt meðlæti kr.  500.  Nýjir félagsmenn sérstaklega velkomnir. 

Dagskrá:  Kosning fundarstjóra og ritara / skýrsla formanns / reikningar / breytingar á samþykktum félagsins / ákvörðun árgjalds / kosningar/ önnur mál.

….er bókin bókanna.  Þennan söng þekkja sjálfsagt all flestir og hann var sunginn hátt og snjallt í kirkjunni í dag.

Börnin í sunnudagaskólanum bjuggu til sína eigin Biblíu í dag sem þau kalla litlu Biblíuna.  Það var því vel við hæfi að fyrsta versið sem sett var inní Litlu Biblíuna þeirra væri textinn úr Jóh. 3:16, svo elskaði Guð heiminn að hann gaf son sinn eingetinn til þess að hver sem á hann trúir glatist ekki heldur hafi eilíft líf.  Þessi orð eru einnig þekkt sem Litla Biblían og eru mörgum kær.  Hvaða orð úr Biblíunni eru þér kær?

Hér má sjá fleiri myndir

Lesa áfram …

Messa kl. 11. Prestur sr. Gísli Jónasson, organisti Örn Magnússon félagar úr kór kirkjunnar syngja.  Messuhópur tekur virkan þátt.  Tekið verður á móti gjöfum til Biblíufélagsins sem er elsta starfandi félag landsins.  Molasopi í safnaðarheimilinu að messu lokinni.

Sunnudagaskóli kl. 11 í umsjón Nínu Bjargar Vilhelmsdóttur.  Fjársjóðsleit, fræðsla, söngur og gleði við allra hæfi.  Djúshressing í lokin. 

“Ég varð glaður þegar menn sögðu við mig: Göngum í hús Drottins.” Sl. 122 

Góður hópur kvenna og barna hittist í safnaðarheimilinu milli kl. 10 og 12 á föstudagsmorgnum.  Umsjón með foreldramorgnunum hefur Emilía G. Svavarsdóttir.  Gestir koma reglulega með erindi, fræðslu eða kynningu er snýr sérstaklega að umönnun barna.  Góð aðstaða er fyrir börnin í safnaðarheimilinu og gott aðgengi fyrir vagna eða kerrur.  Boðið er upp á kaffi og meðlæti.  Allar nánari upplýsingar má fá í síma 587 1500.