Eftir indæla helgigöngu er rétt að segja frá og birta myndir frá göngunni og helgistundunum.

Göngumenn komu á bifreiðum sínum að Krosshólaborg og fóru þaðan klukkan 14 að Auðartóftum í skólabíl.

Eftir stutta frásögn um Auðartóft var haldinn þar helgistund.  Gísli Helgason lék á blokkflautu.  Halla Steinólfsdóttir, oddviti Dalamanna, las ritningarlestur og Vilborg Davíðsdóttir, rithöfundur, las úr Landnámu.

Lauk stundinni með að sungið var fyrsta versið í hinum gamla írska sálmi, “Morning has broken”, “Líður að dögun”.

Hófst þá gangan og gengið var að Hvammskirkju.  Gengið var um 1,5 kílómeter og var kraftur í göngumönnum, í farabroddi var keltneskur göngukross.

Þegar komið var að Hvammskirkju var sagt frá viðskiptum Gullbrár og Auðar og síðan Gullbrár og Skeggja sem enduðu í að gull hinar heiðnu Gullbrár var notað til að byggja hina fyrstu Hvammskirkju.  Reisti Auður krossa þrjá yfir Krossagili.

Í Hvammi hóf Gísli helgistundina með írskum tónum á blokkflautu sinni.  Staðarprestur, Óskar Ingi Ingason, sagði frá kirkjunni og Hanna Valdís Jóhannsdóttir las ritningarlestur.  Vilborg las á ný úr Landnámu.

Eftir bæn endaði stundin með að sungin voru síðustu tvö vers í sálminum Líður að dögun.

Frá Hvammi var haldið um 1,5 kílómeters leið gamla veginn með hlíðinni að Skerðingsstöðum og áfram bílveginn að Krosshólaborg.

Eftir góða veðrið í Hvammi fagnaði vindurinn okkur svo að ákveðið var að hafa síðustu helgistundina austan við borgina í skjóli.

Sagði  staðarprestur frá að fundist hefði í vikunni í bók  Jóns Þorkelssonar ”Þjóðsögur og munnmæli” bæn eftir Auði djúpúðgu.  Var bænin dreifð prentuð til viðstaddra.  Gísli hóf að vanda að sinni snilld stundina með blokkflautuleik og beðið var bæn Auðar.

Sagði Óskar Ingi frá því þegar krossinn var reistur fyrir 45 árum, en sú saga er hér neðst í fréttinni.

Sunginn var meira en þúsund ára írskur sálmur “Be thou my vision“, “Rop tú mo baile”, en séra Sigurbjörn Einarsson, biskup, orti sálm við lagið.  Sóknarnefndarformaðurinn, Jón Egill Jóhannsson las guðpjall og Halla las úr Landnámu.  Eftir meiri sálmasöng sagði séra Gunnþór Ingason, sérþjónustuprestur, frá heilögum Kollumkilla og Vilborg las kafla úr bók sinni um Auði, þar sem írskur munkur flytur Auði hugvekju.

Beðið var bænar og þar af hluta úr Brjóstvörn Patreks, forn írsk bæn sem séra Gunnþór hefur þýtt.

Eftir sálmasöng var gengið til altaris, en brauðið sem var helgað var eldað í langeldinum á Eiríksstöðum að gömlum sið.  Lauk stundinni með sálmasöng og blessun.

Eftir helgistundina boðu bændurnir á Skerðingsstöðum í rausnarlegt kaffi heima á bænum og þar áttu viðstaddir áfram góða og gefandi stund.

Þakka ber hlut allra sem lögðu lið, undirbúningshópnum, bændum á Skerðingsstöðum og í Hvammi, Gísla Helgasyni, Vilborgu og öllum þeim 50 sem tóku þátt.  Ekki er síst þáttur séra Gunnþórs Ingasonar stór, en hann starfar því að virkja betur okkar keltneska arf.  Hann sá um helgistundirnar ásamt staðarpresti.

Fleiri myndir eru á myndasíðu Dalabyggðar.

Það var kvenfélagið Guðrún Ósvífursdóttir í Hvammssveit sem átti heiðurinn af því að krossinn var reistur, ásamt öðrum kvenfélögum í Dölum.  Séra Pétur T. Oddson í Hvammi hafði borið hugmyndina upp á héraðsfundi á Stóra -Vatnshorni 1950.  Að frumkvæði Unnar Guðjónsdóttur, ekkju sr. Péturs,  var þetta mál tekið fyrir á aðalfundi Sambands breiðfirskra kvenna 1953 sem haldinn var á Kvennabrekku í Dölum.

1962 hitti Kristín B. Tómasdóttir, kvenfélagskona, fyrir listmanninn Guðmund í Miðdal og fór fram á það við hann í umboði nefndarinnar að hann gerði tillögu að minnismerkinu. Guðmundur gerði frumteikningu að minnismerki en dó skömmu síðar og varð því ekkert úr þessum áformum.

Sr. Ásgeir Ingibergsson í Hvammi mælti þá með því að leitað yrði til Ársæls Magnússonar, steinsmiðs í Reykjavík, um gerð minnismerkisins og tóku nefndarkonur vel undir það. Teikning Ársæls að steinkrossi var samþykkt og sá hann um smíði krossins samkvæmt henni.

Röskir karlmenn úr sveitinni komu krossinum upp á Krosshólaborg í þremur hlutum, járnbundu hann og steyptu niður á hólinn.

Hr. Sigurbjörn Einarson, biskup Íslands, blessaði minningarkrosssinn við helgistund sem fram fór undir Krosshólaborg 8. ágúst 1965, eftir að Janet Ingibergsson, írsk eiginkona séra Ásgeirs í Hvammi, hafði afhjúpað hann á hæðinni.  Biskup og sóknarprestur fluttu tölur og samkór kirkjukóra í Dalasýslu sungu. Eftir helgistundina fór fram kaffisamsæti/ kirkjukaffi í Laugaskóla í boði kvenfélagskvenna í Dalasýsla. Þangað komu saman um 600 manns og fögnuðu þessum sögulega viðburði.

Fyrir 2 árum, 13. júlí 2008, var haldinn guðsþjónusta á Krosshólaborg.  Þar komu þær kvenfélagskonur úr kvenfélaginu Guðrún Ósvífursdóttir, og afhjúpuðu söguskilti.  Var það fyrsta guðsþjónusta á staðnum í 43 ár.

Margt var um manninn, en viðstaddir voru um 170 manns.  Boðið var í kaffi á eftir við borgina.

Merki: Auðartóftir, Helgiganga, Hvammskirkja, Krosshólaborg, myndir, Starfshóps þjóðkirkjunnar um helgistaði á föruleiðum

Óskar Ingi Ingason, 19/6 2010 kl. 21.20