Aðventan er gengin í garð og líða fer að jólum. Aðventumessa verður þann 11. desember, kl.14 í Hóladómkirkju. Sr. Gunnar Jóhannesson sóknarprestur þjónar fyrir altari og börn úr leik- og grunnskóla taka virkan þátt. Að messu lokinni verður kirkjugestum boðið upp á kakó, kaffi og þjóðlegt bakkelsi í húskynnum Grunnskólans.
Aðventukvöld kirkjukórsins verður 15. desember og nánar auglýst síðar.
sigridur.gunnarsdottir, 2/12 2005
Á sóknarnefndarfundi 29. nóvember s.l. urðu breytingar á skipan sóknarnefndar. Sigríður Gunnarsdóttir lét af formennsku í stjórninni en hún er flutt búferlum á Sauðárkrók. Sigurbjörg Ólafsdóttir fyrsti varamaður tekur sæti í nefndinni. Ný stjórn skipti með sér verkum, Björg Baldursdóttir ritari og varaformaður tók við embætti formanns og mun hún einnig taka sæti í Hólanefnd. Sigurbjörg mun gegna starfi ritara en Hörður Jónsson verður áfram gjaldkeri.
Fráfarandi formanni voru færðar þakkir fyrir unnin störf og óskar nýrri sóknarnefnd allrar blessunar í starfi.
sigridur.gunnarsdottir, 2/12 2005
Taize messa verður í Hóladómkirkju að kvöldi sunnudagins 20. nóvember næstkomandi, kl.21.
Kór Hóladómkirkju leiðir sönginn við undirleik Jóhanns Bjarnasonar organista. Krakkar úr 10-12 ára starfinu og fermingarbörn aðstoða við messugjörðina.
Sr. Gunnar Jóhannesson þjónar fyrir altari og flytur hugvekju. Allir nær og fjær eru hjartanlega velkomnir og sérstaklega er stúdentum við Hólaskóla boðið að koma til kirkju og taka þátt í stundinni.
sigridur.gunnarsdottir, 18/11 2005
Sunnudaginn 30. október verður almenn messa með altarisgöngu kl.11. Sr. Gunnar Jóhannes sóknarprestur þjónar fyrir altari og prédikar, organisti Jóhann Bjarnason og kór Hóladómkirkju leiðir safnaðarsöng.
Áður auglýst taize-messa frestast til 20. nóvember og verður nánar auglýst síðar.
sigridur.gunnarsdottir, 27/10 2005
Sr. Sighvatur Birgir Emilsson andaðist þann 1. október s.l. í Noregi. Sighvatur var fæddur 29. júní 1933. Hann var settur sóknarprestur á Hólum 1976 og vígðist 3. október sama ár. Sighvatur þjónaði Hólasókn 1976- 1985 og var stundakennari við barnaskólann á Hólum 1976-1979. Útförin verður gerð frá Savernkirkju 11. október kl.12 en minningarathöfn á Íslandi verður auglýst síðar. Þeim sem vilja minnast hins látna er bent á Hjálpræðisherinn á Íslandi. Eftirlifandi eiginkona Sighvats er Anna Einarsdóttir og bjuggu þau í Larvik í Noregi.
sigridur.gunnarsdottir, 10/10 2005
Aðalbjörg Halldórsdóttir lést 27.september s.l. Hún var jarðsungin frá Akureyrarkirkju í gær.
sigridur.gunnarsdottir, 4/10 2005
Sóknarprestur hefur sent frá sér fréttabréf þar sem greinir frá helgihaldi í prestakallinu út árið. Þar kemur m.a. fram að guðsþjónustur verða tvisvar í mánuði í Hóladómkirkju. Flest ættu að finna eitthvað við sitt hæfi í kirkjunni og boðið verður upp á fleira en hefðbundnar sunnudagsmessur. Kvöldbænirnar verða á sínum stað kl. 18, alla miðvikudaga og þá sunnudaga sem ekki er messað. Í vetur hefur umsjón með kvöldbænum Inga María Stefánsdóttir og er hún boðin velkomin til starfa við kirkjuna.
Helgihald í Hóladómkirkju verður sem hér segir fram til áramóta. (Athugið messutímann!):
sigridur.gunnarsdottir, 3/10 2005
Almenn safnaðarmessa með altarisgöngu verður á sunnudaginn kemur, þann 2. október og hefst kl.14. Sr. Gunnar Jóhannesson sóknarprestur prédikar og þjónar fyrir altari, kór Hóla- og Viðvíkursókna leiðir söng og organisti er Jóhann Bjarnason. Verið velkomin!
sigridur.gunnarsdottir, 27/9 2005
Mikil hátíð var að Hólum í gær þegar Jón Aðalsteinn Baldvinsson biskup vígði sinn fyrsta vígsluþega, Sólveigu Höllu Kristjánsdóttur guðfræðing. Um hundrað manns voru viðstödd vígsluna og þáðu kaffiveitingar undir Byrðunni í boði vígslubiskupshjónanna að athöfn lokinni.
sigridur.gunnarsdottir, 19/9 2005
Sunnudaginn 18.september kl.14 verður vígsluathöfn í Hóladómkirkju. Þá mun Jón Aðalsteinn Baldvinsson vígslubiskup vígja Sólveigu Höllu Kristjánsdóttur guðfræðing
til prestsþjónustu við Akureyrarkirkju.
Sr. Svavar A. Jónsson lýsir víglsu. Vígsluvottar verða sr. Gunnar
Jóhannesson, sr. Hannes Örn Blandon prófastur, sr. Solveig Lára
Guðmundsdóttir og Pétur Björgvin Þorsteinsson djákni. Kór Akureyrarkirkju leiðir söng, organisti verður Björn Steinar Sólbergsson og Sigríður Gunnarsdóttir meðhjálpari.
sigridur.gunnarsdottir, 13/9 2005
VETRARDAGSKRÁ
frá 10. september 2011
Kirkjan er höfð læst þegar ekkert helgihald fer fram en kirkjuvörður sýnir kirkjuna þegar þess er óskað. Síminn er 895 9850.
Safnaðarmessur verða u.þ.b. mánaðarlega og verða auglýstar sérstaklega.
Hina sunnudagana eru kvöldbænir kl. 18:00 - 18:15 þar sem fer fram víxllestur og bæn.
Hringt er til tíða u.þ.b. 15 mínútum fyrir tímann.
Fyrirbænaefnum má koma til víglsubiskups í síma 453 6300 og í tölvupósti á biskup@holar.is eða til kirkjuvarðar í 895 9850 eða á laufgud@mail.holar.is
Kvöldbænireru einnig á miðvikudögum með sama hætti.
Hólum í Hjaltadal, 551 Sauðárkróki. Sími 453 6300 , fax 453 6301 · Kerfi 
