Hóladómkirkja

Barokkveislan stendur nú sem hæst.  Auðunarstofa hefur verið þétt setin á öllum þeim tónleikum og fyrirlestrum sem haldnir hafa verið þar undanfarna daga og á laugardagstónleikum Láru Sóleyjar og Eyþórs Inga var setið í hverju horni.

Lesa áfram …

Það var vel við hæfi að konur skipuðu stóran sess þennan kvenréttindadag.

Í morgunmessunni þar sem sr. Gunnar þjónaði var Laufey Guðmundsdóttir forsöngvari, en hún er einmitt nemandi Alexöndru Chernyshovu sem hreif hug og hjörtu tónleikagesta síðdegis þennan sólbjarta sunnudag.  Með henni lék Katie Buckley forkunnarvel á hörpu.  Á efnisskránni voru margar frábærar óperuaríur og vinsæl lög úr söngleikjum.  Þeim er þökkuð heimsóknin heim til Hóla.

Næstkomandi sunnudag, 19. júní verður guðsþjónusta kl. 11 í umsjá sr. Gunnars Jóhannessonar og kl. 14 verða fyrstu reglulegu tónleikarnir á þessu sumri.  Það eru Alexandra Chernyshova sópran og Katie Buckley hörpuleikari sem skemmta.  Aðgangur er ókeypis og allir velkomnir meðan húsrúm leyfir.

Séra Jón A. Baldvinsson vígslubiskup þjónar í hátíðarmessunni sem verður n.k. sunnudag 12. júní. Hann mun í messunni ferma Gunnhildi Höllu Ármannsdóttur úr Garðabæ. Foreldrar hennar eru miklir “Hólavinir” og hafa margoft haldið hér tónleika og spilað við ýmis tækifæri. Þau eru Hallfríður Ólafsdóttir flautuleikari og Ármann Helgason klarinettleikari. Mun fjölskyldan taka þátt í tónlistarflutningi í kirkjunni þennan dag. Kirkjukórinn og Jóhann organisti sjá að öðru leyti um tónlistina.

Séra Hörtur Pálsson hélt upp á sjötugsafmælið sitt s.l. sunnudag með því að þjóna við fyrstu guðsjónustu sumarsins. Dóttursonur hans Hjörtur Páll Eggertsson lék á selló bæði í kirkjunni og í kaffinu á eftir. Fjölmenni var og sól í sinni gesta.

Fyrsta sumarmessan verður næstkomandi sunnudag 5. júní kl. 14. Þá messar séra Hjörtur Pálsson, en hann mun starfa við kirkjuna í sumar eins og undanfarin ár.
Tónleikaröðin hefst að þessu sinni kl. 14 þann 19. júní með tónleikum Alexöndru Chernyshovu, sópransöngkonu og Katie Buckley, hörpuleikara.

Hópur ungs fólks sást við vinnu við Hóladómkirkju í morgun. Þetta eru erlendir sjálfboðaliðar sem koma til að fegra og bæta umhverfið. Slíkir hópar koma til Hóla árlega og þökkum þeim fyrir þeirra störf. Hér er sést hluti hópsins sem vann að stígagerð í brekkunni upp að skóla.

Siðgæði, samskipti og sálgæsla var yfirskrift ráðstefnu Prestafélags hins forna Hólastiftis sem haldin var á hólum 29. - 31. maí. Þátttakendum á þessari árlegu ráðstefnu fer stöðugt fjölgandi. Hún byggist á tíðagjörð, fyrirlestrum og ekki síst samveru prestanna.

Fyrirlesarar í ár voru Dr. Sigríður Halldórsdóttir prófessor, Kristján Már Magnússon sálfræðingur, sr. Ragnheiður Karítas Pétursdóttir og sr. Gunnlaugur Garðarsson sem á veg og vanda af skipulagningunni. Hér sést hann ásamt hluta hópsins við morguntíð í kirkjunni.

Sr. Kristinn, sr. Þorgrímur, sr. Gunnlaugur        sr. Jón

Lesa áfram …

Nú líður víðast hvar að lokum barna- og unglingastarfs í söfnuðum kirkjunnar enda sumar í nánd. Að því tilefni er gjarnan lagt meira í síðustu samveru starfsins en venjulega.
Hér á Hólum höfum við mikinn áhuga á því að bjóða staðinn og Hóladómkirkju fram sem vettvang fyrir uppskeruhátíð eða vorhátíð barna- og unglingastarfsins. Með þessu bréfi viljum við bjóða áhugasömum hópum að láta vita af sér.
Hugmyndin er að hópur sunnudagaskólabarna og/eða hópur barna í tíu til tólf ára starfi (eða börn á öðrum aldri eftir atvikum) sæki Hóla heim ásamt fylgdarliði (presti, leiðtogum, foreldrum) og geri sér glaðan dag.
Sr. Gunnar Jóhannesson sóknarprestur á Hólum hefur umsjón með og stýrir dagskrá dagsins í samráði við forsvarsmenn viðkomandi hópa.
Dagskráin samanstendur af fræðslu og leik sem helgast af veðri og tíma. Haldin verður helgistund/söngstund í Hóladómkirkju sniðin að aldri barnanna. Farið verður í ýmsa leiki og slegið á létta strengi. Hólastaður býður upp á fallegt umhverfi sem nýta má á skemmtilegan hátt, m.a. skóginn og Auðunarstofu. Gert er ráð fyrir sameiginlegum matartíma – í góðu veðri má grilla. Þá er hægt að ljúka samverunni á ferð í sundlaugina á Hólum.
Gert er ráð fyrir því að hópar leggi með sér mat til ferðarinnar og standi straum af ferðakostnaði.
Þeir sem eru áhugasamir eða óska eftir frekari upplýsingum geta snúið sér til sr. Gunnars Jóhannessonar í síma 892 9115.
Verið hjartanlega velkomin heim að Hólum.

Svo skemmtilega vill til að organistarnir við dómkirkjurnar á Hólum og í
Skálholti eru bræður. Það eru þeir Jóhann Bjarnason sem hefur þjónað Hólum í mörg ár og Jón Bjarnason sem tók við embættinu í Skálholti á síðasta ári.

Nú um helgina efna þeir til sameiginlegs kórsöngs syðra. Messað verður í Skálolti sunnudaginn 10. apríl kl. 14:00. Sr. Jón Aðalsteinn á Hólum predikar og þjónar fyrir altari ásamt sóknarprestinum í Skálholti sr. Agli Hallgrímssyni.