Hóladómkirkja

Næstkomandi sunnudag 31. júlí   munu 3 ungar konur flytja Ave Maríur og Händel aríur í kirkjunni.  Þetta eru þær Helena Guðlaug Bjarnadóttir sópran, Margrét Sigurðardóttir flautuleikari og Sigrún Magna Þórsteinsdóttir orgelleikari. Þær bætast í hóp okkar góðu listamanna sem gleðja gesti og heimamenn hvern sunnudag.

Nú síðast, 24. júlí, söng Björg Þórhallsdóttir fyrir fullri kirkju úrval íslenskra sönglaga með hörpuleik Elísabetar Waage, og bættist þeim stöllum liðsauki að þessu sinni þar sem var Hilmar Örn Agnarsson sem lék bæði á harmóníum og á kirkjuorgelið.

Hjónin Guðný Guðmundsdóttir og Gunnar Kvaran heiðruðu staðinn með komu sinni hingað þann 17. júlí.

Séra Hjörtur Pálsson messar n.k. sunnudag og hefst guðsþjónustan kl. 11.  Organisti verður Sólveig Sigríður Einarsdóttir (mynd úr Húnahorninu 2010)

Um næstu helgi er komið að hinum árlegu tónleikum Laufeyjar Sigurðardóttur fiðluleikara og Páls Eyjólfssonar gítarleikara.  Þau verða með sunnudagstónleikana í kirkjunni þann 10. júlí kl. 14. 

Þau Laufey og Páll hafa spilað saman um langt árabil.  Þessi mynd er fengin af vefsíðu Páls og er frá 1997.

Barokkveislan stendur nú sem hæst.  Auðunarstofa hefur verið þétt setin á öllum þeim tónleikum og fyrirlestrum sem haldnir hafa verið þar undanfarna daga og á laugardagstónleikum Láru Sóleyjar og Eyþórs Inga var setið í hverju horni.

Lesa áfram …

Það var vel við hæfi að konur skipuðu stóran sess þennan kvenréttindadag.

Í morgunmessunni þar sem sr. Gunnar þjónaði var Laufey Guðmundsdóttir forsöngvari, en hún er einmitt nemandi Alexöndru Chernyshovu sem hreif hug og hjörtu tónleikagesta síðdegis þennan sólbjarta sunnudag.  Með henni lék Katie Buckley forkunnarvel á hörpu.  Á efnisskránni voru margar frábærar óperuaríur og vinsæl lög úr söngleikjum.  Þeim er þökkuð heimsóknin heim til Hóla.

Næstkomandi sunnudag, 19. júní verður guðsþjónusta kl. 11 í umsjá sr. Gunnars Jóhannessonar og kl. 14 verða fyrstu reglulegu tónleikarnir á þessu sumri.  Það eru Alexandra Chernyshova sópran og Katie Buckley hörpuleikari sem skemmta.  Aðgangur er ókeypis og allir velkomnir meðan húsrúm leyfir.

Séra Jón A. Baldvinsson vígslubiskup þjónar í hátíðarmessunni sem verður n.k. sunnudag 12. júní. Hann mun í messunni ferma Gunnhildi Höllu Ármannsdóttur úr Garðabæ. Foreldrar hennar eru miklir “Hólavinir” og hafa margoft haldið hér tónleika og spilað við ýmis tækifæri. Þau eru Hallfríður Ólafsdóttir flautuleikari og Ármann Helgason klarinettleikari. Mun fjölskyldan taka þátt í tónlistarflutningi í kirkjunni þennan dag. Kirkjukórinn og Jóhann organisti sjá að öðru leyti um tónlistina.

Séra Hörtur Pálsson hélt upp á sjötugsafmælið sitt s.l. sunnudag með því að þjóna við fyrstu guðsjónustu sumarsins. Dóttursonur hans Hjörtur Páll Eggertsson lék á selló bæði í kirkjunni og í kaffinu á eftir. Fjölmenni var og sól í sinni gesta.

Fyrsta sumarmessan verður næstkomandi sunnudag 5. júní kl. 14. Þá messar séra Hjörtur Pálsson, en hann mun starfa við kirkjuna í sumar eins og undanfarin ár.
Tónleikaröðin hefst að þessu sinni kl. 14 þann 19. júní með tónleikum Alexöndru Chernyshovu, sópransöngkonu og Katie Buckley, hörpuleikara.

Hópur ungs fólks sást við vinnu við Hóladómkirkju í morgun. Þetta eru erlendir sjálfboðaliðar sem koma til að fegra og bæta umhverfið. Slíkir hópar koma til Hóla árlega og þökkum þeim fyrir þeirra störf. Hér er sést hluti hópsins sem vann að stígagerð í brekkunni upp að skóla.