Ísafjarðarkirkja

 

Syndin gegn náttúru og mannkyni

Við ógnum lífi okkar og umhverfi með því að menga loft, jörð, fæðu og vatn.  Ýmis efni, sem búin eru til, eyðileggja vistkerfi og eru raunveruleg ógn við líf, heilsu og lífsgæði.  Kostnaðurinn, sem hlýst af lakari heilsu af mengunarvöldum, er gríðarlegur og kostar samfélagið mikið.  Að afneita því að heilsutjón almennings af mengunarvöldum sé staðreynd er synd gegn Guði og náttúrunni.

Stór hnattvæn vistkerfi eins og heimshöfin eru sameiginleg eign allra þjóða og eiga að njóta verndar alþjóðasamfélagsins.  Aðgerðir til mótvægis á súrnun heimshafanna eru nauðsynlegar.  Spilling hafanna er synd gegn Guði.

Aðgangur að hreinu og óspilltu vatni eru almannagæði.  Það er á ábyrgð alþjóðasamfélagsins að varðveita og hindra spillingu þeirra gæða.  Hindrun í aðgangi að vatni til lífsviðurværis og ræktunar er glæpur gegn grundvallar mannréttindum og sköpunarverkinu.

Magnús Erlingsson, 15/10 2018

Fundur með foreldrum fermingarbarna

Mánudagskvöldið 15. október kl. 20:30 var haldinn fundur með foreldrum fermingarbarna í Ísafjarðarkirkju.  Sóknarpreturinn kynnti fermingarstörf vetrarins.  27 börn eru skráð í fermingarfræðsluna og hefjast vikulegar kennslustundir innan skamms.

Þá var rætt um fermingarmessurnar, sem verða næsta vor.  Ákveðið var að ferma á eftirtöldum dögum:  Í Ísafjarðarkirkju á skírdag, sjómannadaginn, hvítasunnu og sunnudaginn 16. júní.  Ákveðið var að ferma í Hnífsdalskapellu á hvítasunnu.

Magnús Erlingsson, 12/10 2018

Messa í Ísafjarðarkirkju

Sunnudaginn 14. október kl. 11:00 var messa í Ísafjarðarkirkju.  Kór Ísafjarðarkirkju söng.  Organisti var Tuuli Rähni og prestur sr. Magnús Erlingsson.  Þema þessarar messu var sköpunin.  Fjallað var um sköpunarsögu Biblíunnar í predikun og textum.  Sálmarnir tóku einnig mið af efninu.  Fermingarbörn aðstoðuðu við messuna.  Hér fyrir neðan er hægt að skoða textana og lesa predikunina.

Predikun á 20. sd.e.trin. 2018

Sköpunin

Lexía:  Gen 1.1-10

Í upphafi skapaði Guð himin og jörð.  Jörðin var þá auð og tóm. Myrkur grúfði yfir djúpinu en andi Guðs sveif yfir vötnunum. Þá sagði Guð: „Verði ljós.“ Og það varð ljós. Guð sá að ljósið var gott og Guð greindi ljósið frá myrkrinu. Guð nefndi ljósið dag en myrkrið nótt. Það varð kvöld og það varð morgunn, hinn fyrsti dagur. Þá sagði Guð: „Verði festing milli vatnanna og hún greini vötn frá vötnum.“ Þá gerði Guð festinguna. Skildi hún milli vatnanna sem voru undir festingunni og vatnanna sem voru yfir festingunni. Og það varð svo. Og Guð nefndi festinguna himin.  Það varð kvöld og það varð morgunn, hinn annar dagur. Þá sagði Guð: „Vötnin undir himninum safnist saman í einn stað og þurrlendið komi í ljós.“ Og það varð svo. Guð nefndi þurrlendið jörð og safn vatnanna nefndi hann haf. Og Guð sá að það var gott.  

Pistill:  Gen 1.26-28, 1.31-2.4

Þá sagði Guð: „Vér viljum gera manninn eftir vorri mynd, líkan oss.  Hann skal drottna yfir fiskum sjávarins, fuglum loftsins, búfénu, villidýrunum og allri jörðinni og öllum skriðdýrum sem skríða á jörðinni.“ Og Guð skapaði manninn eftir sinni mynd. Hann skapaði hann eftir Guðs mynd.  Hann skapaði þau karl og konu. Guð blessaði þau.  Og Guð sagði við þau: „Verið frjósöm, fjölgið ykkur og fyllið jörðina, gerið ykkur hana undirgefna og ríkið yfir fiskum sjávarins og fuglum himinsins og öllum dýrum sem hrærast á jörðinni.“ Og Guð leit allt sem hann hafði gert, og sjá, það var harla gott. Og það varð kvöld og það varð morgunn, hinn sjötti dagur. Himinn og jörð voru nú fullgerð og öll þeirra prýði. Á sjöunda degi lauk Guð verki sínu og hvíldist hinn sjöunda dag frá öllu því er hann hafði unnið. Og Guð blessaði sjöunda daginn og helgaði hann því að þann dag hvíldist Guð frá öllu sköpunarverki sínu sem hann hafði unnið að. Þetta er sagan um uppruna himins og jarðar.  

Guðspjall:  Jóh 1.1-5

Í upphafi var Orðið[ og Orðið var hjá Guði og Orðið var Guð.  Hann var í upphafi hjá Guði.  Allt varð til fyrir hann, án hans varð ekki neitt sem til er.  Í honum var líf og lífið var ljós mannanna.  Ljósið skín í myrkrinu og myrkrið tók ekki á móti því.

Predikun

I.   Náð sé með yður og friður frá Guði föður vorum og Drottni Jesú Kristi.  Amen.   Líklega er engin saga í Biblíunni jafn oft misskilin og mistúlkuð og sköpunarsagan í fyrsta kafla Biblíunnar.  Hversu oft hef ég ekki heyrt fólk segja:  Það gerðist ekki svona!  Jörðin var ekki sköpuð á sjö dögum?  Og það er rétt, sköpun heiminsins tók milljónir ára, svo langan tíma að hugur minn nær ekki utan um þá eilífð.  En þau, sem ætla að nálgast Biblíuna með þessum hætti, gætu allt eins spurt af hverju það standi ekkert í Biblíunni um snjallsíma, tölvur, rafmagnsbíla, internetið, já, halló, það er heldur ekkert minnst á pizzur og Coca Cola.  Og símanúmer lögreglunnar á Ísafirði er ekki einu sinni að finna í Biblíunni!  Staðreyndin er sú að allt þetta, sem ég taldi upp að væri ekki að finna í Biblíunni eru hlutir, sem tilheyra 21. öldinni, nútímanum.  Og nýjustu kenningar í náttúruvísindum eru líka hluti af þekkingu 20. aldarinnar.  Biblían var ekki skrifuð á 20. öldinni.  Hún var skrifið fyrir 2000 árum og elstu hlutar hennar fyrir 3000 árum síðan.  Og hún var skrifuð af mönnum.  Ef engill hefði opinberast og sýnt höfundum Biblíunnar snjallsíma, sagt þeim frá rafmagni eða afstæðiskenningu Einsteins þá hefðu þeir ekki skilið neitt af því, sem engillinn flutti þeim.   Biblían var auðvitað ekki skrifuð sem vísindarit eða kennslubók í náttúruvísindum.  Sem trúarbók á hún meira skylt við bókmenntir og heimspeki.  Sköpunarsagan í Biblíunni er skrifuð til að svara spurningunni af hverju, af hverju er heimurinn eins og hann er?  Hver er tilgangurinn með þessum heimi, sem við lifum í?  Þau, sem ekki trúa á Guð, segja að það sé enginn tilgangur annar en sá sem við gefum okkur sjálf.  Heimurinn hafi orðið til fyrir tilviljun.  Veltum þessu aðeins fyrir okkur?  Ég held hér á Biblíunni.  Þetta er stór bók.  Hugsum okkur að öllum stöfunum í þessari bók væri safnað saman í einn haug ásamt öllum orðabilunum og svo væri tölvu fengið það hlutverk að raða þessum milljón stöfum eða hvað þeir eru nú margir, saman á tilviljanakenndan hátt.  Hversu miklir möguleikar væru á því að tölvan hitti á þessa einu réttu samsetningu, sem gefur okkur þessa bók?  Hverfandi litlar  líkar, minni en engar líkur!  En rithöfundur gæti skrifað svona bók.  En gæti rithöfundur búið til og skapað túnfífil, sem vex hér villtur í hlíðinni?  Gæti hann búið til og skapað gráa köttinn, sem stundum laumast hér inn í kirkjuna?  Nei, alls ekki, því jurtir og lífverur eru svo miklu flóknari smíð heldur en ein stór bók.  Stundum held ég að þau, sem trúa á tilviljanir séu miklu trúaðri og trúgjarnari heldur en við, sem treystum á Guð og trúum því að hann standi að baki alls þess, sem er.

II.   Framan af 20. öldinni gagnrýndu margir setninguna ”Verði ljós og það varð ljós.”  Fáránlegt að láta sér detta í hug að heimurinn eigi sér eitthvað upphaf, heimurinn hefur alltaf verið til!  Þegar ég fæddist árið 1959 hafði enginn heyrt kenninguna um Mikla hvell, kenningu um að heimurinn eigi sér upphaf í mikilli sprengingu, stórum blossa.  Það var nefnilega farið að halla í 1970 þegar sú kenning leit dagsins ljós.  Og þá allt í einu varð þessi setning ”Verði ljós og það varð ljós” ekki svo fráleit heldur rímaði hún við nýjustu kenningar vísindanna.   Hvað kom sköpun alheimsins af stað?  Var það tilviljun að efni alheimsins þéttist og sprakk?  Eru öll náttúrlögmálin tilviljun?  Tilviljun að við erum hér?  Eða er einhver hugsun að baki öllu þessu?  Er Guð til?  Biblían er skrifuð til að svara þessum spurningum.  Biblían er vitnisburður þeirra manna og kvenna, sem trúðu á Guð og voru sannfærð um að Guð stæði að baki veröldinni, undur heimsins væri hans smíð, hans vilji og markmið.   Og takið eftir því hvernig Biblían segir að heimurinn hafi orðið til.  Guð talaði, hann nefndi hlutina, fyrirbærin og þá urðu þau til.  Aðeins það, sem hefur heiti, er til.  Þegar ég var strákur þá var ekki til ofvirkni og athyglisbrestur, í staðinn var sagt að þessi að hinn krakkinn væri mikill fyrir sér eða óþekkur.  Þegar ég var strákur þá var enginn lesblindur því hugtakið lesblinda var ekki til.  Í staðinn var sagt að sumir væru tregir eða tossar.  Það er tungumálið, hugsunin sem skapar og býr til allt sem er.

III.   Textinn um sköpun manneskjunnar er fallegur.  ”Þá sagði Guð: „Vér viljum gera manninn eftir vorri mynd, líkan oss.”  Og Guð skapaði manninn eftir sinni mynd. Hann skapaði hann eftir Guðs mynd.  Hann skapaði þau karl og konu.”  Bæði karlinn og konan eru sköpuð í Guðs mynd.  Með þeim er jafnræði.  Guð er greinilega jafnréttissinni.  Og fyrst karlinn og konan eru bæði sköpuð í Guðs mynd þá er mynd Guðs hvorki karl né kona.  Að segja að Guð hljóti annað hvort að vera karl eða kona er ekkert minna en það að smætta Guð, gera hann að einhverju, sem hann ekki er.   Í hverju er þá guðsmyndin fólgin fyrst hún er ekki fólgin í útlitinu eða kyninu?  Sumir hafa látið sér detta það í hug að guðsmynd manneskjunnar sé fólgin í því að geta trúað á Guð, geta hugsað út fyrir sjálfa sig.  Aðrir hafa bent á að guðsmynd manneskjunnar felist í hlutverki hennar í heiminum, sem er það að drottna yfir veröldinni, manneskjan á að vernda náttúruna, hlúa að lífinu, hún er ráðsmaður Guðs hér á jörðu.   Það eru tvær sköpunarsögur í Biblíunni.  Í öðrum kaflanum kemur önnur sköpunarsaga og hún er allt öðru vísi en sagan í fyrsta kaflanum.  En þar er sagt frá því að Guð hafi leitt dýrin fram fyrir manninn og maðurinn gefið þeim nafn.  Kannski er guðsmynd okkar sú að við getum sett nafn á alla hluti, við getum komið orðum að því sem er, greint og nefnt allt það, sem er.  ”Í upphafi var Orðið og Orðið var hjá Guði.”

IV.  Það er ekki tilviljun að höfundar sköpunarsögunnar í 1. kafla Biblíunnar láti hana gerast á sjö dögum.  Sjö daga vika, það að skipta tímanum upp í sjö daga einingar, var uppfinning manna í Austurlöndum.  Og höfundar sköpunarsögunnar láta sköpunina gerast á einni viku.  Hver dagur vikunnar er helgaður ákveðnum þætti í sköpunarverkinu.  Fyrsti dagur vikunnar er helgaður ljósinu.  Þess vegna heitir hann sunnudagur.  Með þessu vildu höfundarnir benda fólki á að það væri ákveðinn hrynjandi í heiminum, ákveðinn taktur í veröldinni, sjö daga taktur.  Heimurinn er skapaður á sjö dögum.  Við lifum í þessari sjö daga tímaeiningu.  Sköpunarsagan fjallar um vikuna sem tímaeiningu og hluta af Guðs góðu sköpun.   Manneskjan var sköpuð á sjötta degi.  Við erum greinilega ekki kóróna sköpunarverksins.  Því enn var eftir sjöundi dagurinn.  Og hvað gerði Guð þá?  Hann hvíldist.  Sjöundi dagurinn er helgaður hvíldinni.  Þá hvílumst við frá vinnu, slökum á, hugsum, gerum eitthvað skemmtilegt.  Í hvíldinni hafa orðið til mestu sköpunarverk mannsandans.  Þegar manneskjan tók sér hvíld frá brauðstritinu þá fór hún að semja tónlist, segja sögur, syngja, mála málverk, hugsa, pæla, stúdera og njóta lífsins.  Sjöundi dagurinn eru helgaður trúnni á Guð og öllu því, sem manneskjan hefur skapað og hugsað, öllu því, sem við köllum einu nafni menningu.   Þessi hugmynd, að vinna í sex daga og taka sér svo frí þann sjöunda, hafa þá hvíld frá daglegum verkum til að sinna mannsandanum, var boðskapur sköpunarsögunnar.  Og hvílík snilld og allt það, sem sjöundi dagurinn hefur fært okkur.  Manneskjan lifir ekki á brauðinu einu saman.  Hún þarf hvíld og andlega næringu.  Það er boðskapur sköpunarsögunnar.  Dýrð sé Guði, föður og syni og heilögum anda.  Svo sem var í upphafi, er og verður um aldir alda.  Amen.

Magnús Erlingsson, 11/10 2018

Imago dei

Samkvæmt kristnum mannskilningi er ímynd Guðs að finna í hverri manneskju.  Þessi ímynd birtist meðal annars í skynsemi mannsins og því hlutverki, sem Guð fól manninum hér í heimi; en það er að vera ráðsmaður Guðs hér á jörðu.  Þess vegna eru allar manneskjur ábyrgar fyrir umhverfisvánni, sem heimurinn stendur frammi fyrir.

Allar manneskjur þurfa að vinna saman að því að snúa við neikvæðri þróun á umhverfi og náttúru og reyna að finna sjálfbærar lausnir á umhverfisvandanum.  Fræðslu og þekkingu um stöðu mála þarf að miðla til allra til að vekja fólk til vitundar um umhverfisvánna og hvetja fólk til náttúruverndar.  Um leið þurfum við að hlusta á þær raddir ungs fólks, sem undrast að hægt sé að tala um að skapa betri heim án þess að hugsa um umhverfisvánna.  Ábyrgðarleysi okkar til þessa í umhverfismálum má ekki bitna á börnum okkar og barnabörnum, sem þurfa síðar að gjalda fyrir það.

Magnús Erlingsson, 8/10 2018

Guðs góða sköpun

Hugmyndin um „Guðs góðu sköpun“ glatast þegar samfélagið telur manneskjuna sjálfstæða og óháða veru í náttúrunni og hafnar því að æðri vitund eða veruleiki sé til.  Manneskjan lýtur ekki vilja Guðs með því að spilla náttúrunni.  Það er synd gagnvart Guði og mönnum sem og glæpur gegn náttúru jarðar.

Ganga þarf til móts við náttúruna, vera eitt með og í henni og muna að manneskjan er hluti af sköpunarverkinu.  Afleiðing þess að finna fyrir nálægð sköpunar og náttúru er að manneskjan verður sjálfkrafa auðmjúk frammi fyrir sköpuninni.  Með upplifun á náttúrunni getur manneskjan séð Guð opinberast í sköpuninni, náttúrunni.  Manneskjan getur séð kærleika Guðs gagnvart stóru sem smáu opinberast í náttúrunni.

Magnús Erlingsson, 1/10 2018

Kirkjuskólinn í Hnífsdal – fyrsta samvera haustsins

Kirkjuskólinn í Hnífsdal hefst í dag, mánudaginn 1. október kl. 17:00 í Hnífsdalskapellu.

Þetta eru samverur fyrir ung börn á leikskóla- og grunnskólaaldri.  Við byrjum stundina með söng, fræðslu og tilbeiðslu.  Síðan litum við og föndrum.  Boðið er upp á hressingu.

Hvert barn fær bók, sem það safnar í límmiðum.  Allir velkomnir.

Magnús Erlingsson, 1/10 2018

Hvað kosta fötin okkar?

Við Vesturlandabúar njótum þess að kaupa okkur falleg föt og góða skó.  Merkjavöru og tískufatnaði er hampað.  En fæstir hugsa hvað þessi neysta okkar kostar.  Hér eru nokkrar staðreyndir um fataiðnaðinn:

1. Fataiðnaðurinn mengar næstmest af öllum iðnaði í heiminum. Aðeins olíuiðnaðurinn mengar meira.
2. Við verslum 400% meira af fataspjörum nú en við gerðum fyrir tuttugu árum. Það eru 80 billjónir spjara á ári.
3. Aðeins 10% þeirra spjara sem gefnar eru til góðgerðasamtaka endurseljast. Restinni er troðið inn á yfirfulla markaði Þriðja heims ríkja – með þeim afleiðingum að innanlands fataiðnaður og atvinna þurrkast út.
4. Indverskir bændur hafa fyrirfarið sér á síðustu árum sökum skulda tilkominna vegna fjárfestinga þeirra í erfðabreyttum bómullarfræjum – svo plantan geti skilað okkur fleiri spjörum.
5. Einn af hverjum sex jarðarbúum vinnur í fataiðnaðinum. Stærstur hluti konur sem þéna minna en þrjá dollara á dag.

Þeim sem vilja breytingar bendi ég á heimildarmyndina “Minimalism”  á Netflix sem gefur fólki tækifæri til að taka til í troðfullum ruslaskápum hugarfylgsna sinna.  Með þá von að þeir hinir sömu láti sér -hæfilegt- nægja til frambúðar.
Hér er líka umhugsunarverð stikla á Youtube:  https://www.youtube.com/watch?v=NDx711ibD1M

Persónulega þykir mér blóð mæðra og barna, bænda og móður náttúru, klæða mig – og þig – afskaplega illa.

Magnús Erlingsson, 1/10 2018

Kirkjuskólinn á Ísafirði – fyrsta samvera haustsins

Kirkjuskólinn á Ísafirði hefst miðvikudaginn 26. september kl. 16:30 í Ísafjarðarkirkju.

Þetta eru samverur fyrir ung börn á leikskóla- og grunnskólaaldri.  Við byrjum í kirkjunni með söng, fræðslu og tilbeiðslu.  Síðan förum við yfir í safnaðarheimilið og litum þar og föndrum.  Boðið er upp á hressingu.

Hvert barn fær bók, sem það safnar í límmiðum.  Allir velkomnir.

Magnús Erlingsson, 25/9 2018

Aðgerðaráætlun kirkjunnar í umhverfismálum fyrir árin 2018-2020

Handbók um umhverfisstarf í söfnuðum og kirkjustarfi hefur verið birt á vef kirkjunnar, á efnisveitu kirkjunnar.  Þar er lögð áhrsla á að kirkjan stundi siðræn viðskipti með áherslu á hag frumframleiðenda og umhverfisvottaðar vörur.  Eftirfarandi verkefni eru á döfinni:

• Staðið verði fyrir námskeiðum um umhverfismál; t.d. vistmenningu, innkaup á vörum og sorpflokkun.

• Efnt verði til samstarfsverkefna með öðrum hreyfingum, stofnunum og einstaklingum, sem vinna að umhverfismálum og sjálfbærni.

• Tímabil sköpunarverksins, sem efnt var til í fyrsta sinn sl. haust, verði fest í sessi í september ár hvert, með viðburðum, helgihaldi og fræðslu um umhverfismál, t.d. umhverfisdögum í kirkjum og uppskerumessum.

• Sérstök áhersla verði lögð á umhverfisfræðslu í barna-, og æskulýðsstarfi kirkjunnar, svo og í fermingarstarfi.

• Einnota plastmálum verði útrýmt úr safnaðarstarfi kirkjunnar þegar í stað.  Notkun annarra einnota áhalda, borðbúnaðar og umbúða í safnaðarstarfi kirkjunnar verði hætt fyrir árslok 2018.

• Gert verði sérstakt átak í endurheimt votlendis á kirkju- og prestssetursjörðum með sambærilegum hætti og gert hefur verið í Skálholti.  Haldið verði áfram skógrækt og landgræðslu á kirkjujörðum með endurnýjuðum krafti.

• Undirbúinn verði farvegur fyrir stærri söfnuði til þess að fá vottun á sjálfbærri starfsemi sinni hjá Umhverfisstofnun.

Magnús Erlingsson, 24/9 2018

Guðsþjónusta á Hlíf

Guðsþjónusta var á Hlíf, Torfnesi sunnudaginn 23. september kl. 14:00.  Kór Ísafjarðarkirkju söng.  Organisti var Tuuli Rähni og prestur sr. Magnús Erlingsson.

Eftir guðsþjónustuna var boðið upp á kaffi og kökur.

Magnús Erlingsson, 20/9 2018

Ísafjarðarkirkja er evangelísk lútersk kirkja.
Sóknarprestur er sr. Magnús Erlingsson. Sími prestsins er 844-7153. Netfang hans er isafjardarkirkja@simnet.is.
Kirkjuþjónn og kirkjugarðsvörður er Elvar Ingason. Sími 456-3560.

Laugardagur

Í Ísafjarðarkirkju er yfirleitt messað á sunnudögum kl. 11:00.

Dagskrá ...