Fyrsti fermingarfræðslutíminn verður sunnudagskvöldið 5. september og hefst kl. 19.30 og lýkur kl. 22.  Börnin mæta með Kirkjulykilinn með sér. Þau sem ekki komust í messuna síðasta sunnudag fá Kirkjulykilinn nú á sunnudaginn.

Skráning í fermingarstarfið veturinn 2010 - 2011 stendur yfir.

Öllum börnum sem búa í sókninni og eru fædd árið 1997 hefur verið sent bréf með upplýsingum um skráningu og dagskrá vetrarins. Bréfið má lesa hér fyrir neðan.

Þau börn sem ekki hafa fengið þetta bréf eru beðin um að hafa samband við Langholtskirkju og fá bréfið sent.

Fermt verður eftirfarandi daga vorið 2011:
- 10. apríl kl. 11
- 17. apríl, pálmasunnudag, kl. 11 og kl. 13
- 25. apríl, annan páskadag, kl. 11
- 12. júní, hvítasunnudag, kl. 11

Þeir sem vilja senda fyrirspurn til sóknarprests um starfið eða fermingardaga geta bent á netfangið: jonhelgi (hjá) langholtskirkja.is.
Einnig er hægt að hringja í Langholtskirkju í síma 5201300.
Í upphafi fermingarstarfsins verður fundur með foreldrum og fermingarbörnunum þar sem starfið næsta vetur verður kynnt.

Bestu kveðjur
Jón Helgi Þórarinsson
sóknarprestur

Eftirfarandi bréf hefur verið sent í til allra 13 ára barna sem búa í Langholtssókn.

Langholtskirkja

www.langholtskirkja.is

Jón Helgi Þórarinsson, sóknarprestur

9. ágúst 2010

Velkomin í fermingarstarfið í Langholtskirkju veturinn 2010 - 2011

Bréf til allra 13 ára barna sem búa í Langholtssókn og foreldra þeirra

Skráning er hafin í fermingarstarf Langholtskirkju 2010 - 2011

Hægt er að skrá sig með tölvupósti; netfangið er jonhelgi (hjá) langholtskirkja.is
Einnig er hægt að skila inn meðfylgjandi skráningarblaði í Langholtskirkju eða skrá barnið símleiðis á skrifstofutíma.

Þau sem skila inn umsókn með tölvupósti eru beðin um að veita sömu upplýsingar og kallað er eftir á innritunarblaðinu sem hér fylgir. Við innritun er hægt að óska eftir fermingardegi í vor, en ekki er nauðsynlegt að ákveða fermingardag fyrr en í janúar.

Skráningu þarf helst að vera lokið 26. ágúst n.k.

Fermingarstarfið hefst sunnudaginn 29. ágúst kl. 11 með guðsþjónustu í Langholtskirkju. Foreldrar eru beðnir um að koma með fermingarbörnunum. Í guðsþjónustunni verða fermingarbörnin boðin velkomin til þátttöku í starfinu í vetur og þeim afhentur Kirkjulykillinn. Það er lítill bæklingur sem hefur að geyma margs konar upplýsingar um kirkjuhúsið, messuna o.s.frv. Þau börn sem ekki komast til þessarar upphafsstundar eru beðin um að láta okkur vita símleiðis eða með tölvupósti. Þau fá Kirkjulykilinn afhentan í næstu messu eða fræðslutíma.

Eftir guðsþjónustuna verður stuttur kynningarfundur í safnaðarheimilinu um starfið í vetur. Kaffi, djús og kleinur verður á boðstólum.

Gott væri að fá upplýsingar um netföng foreldra. Auðveldara er að senda tölvubréf til foreldra með upplýsingum um fermingarstarfið, og foreldrar hafa einnig í auknum mæli kallað eftir því að fá tölvubréf í stað hefðbundinna bréfa í pósti.

Sími Langholtskirkju er 5201300. Kirkjuvörðurinn. Margrét Guðjónsdóttir, er við á skrifstofunni þriðjudaga – fimmtudaga frá kl. 10 – 12 og 13 – 15 og tekur hún við umsóknum. Viðtalstími sóknarprests er kl. 10.30 – 12 þriðjudaga – fimmtudaga og eftir samkomulagi. Við veitum allar nánari upplýsingar um fermingarstarfið.

Þetta bréf er sent til allra barna í Langholtsprestakalli sem fædd eru 1997 og foreldra þeirra. Ekki er víst að öll 13 ára börn fái þetta bréf þar sem við vitum ekki hvort við höfum lista með nöfnum allra 13 ára barna í sókninni. Ef þið vitið um einhverja sem hafa ekki fengið þetta bréf bið ég ykkur um að láta okkur vita eða biðja viðkomandi að hringja í Langholtskirkju – eða senda tölvupóst – og þá munum við senda viðkomandi bréf um hæl.

Hvað er gert í fermingarstarfinu?

Við ræðum saman um lífið og tilveruna, um tilvist Guðs, hvað er að trúa og hvernig við eignumst trú. Við fjöllum um líf og dauða, von og trú, gleði og sorg, hve lífið er dýrmætt, gildi manneskjunnar, um ábyrgð okkar á því að hugsa vel um okkur sjálf og allt líf og þar með Guðs góðu sköpun. Þá ræðum við um samskipti og virðingu gagnvart öðrum allt eins og okkur sjálfum og um ábyrgð okkar að liðsinna þeim sem eiga erfitt eða eru á jaðri samfélagsins. Við lesum um Jesú Krist og skoðum hvernig boðskapur hans og Biblíunnar allrar (s.s. boðorðin 10 og bænin Faðir vor) á erindi inn í líf okkar.

Við byrjum á því að fræðast um kirkjuhúsið og muni þess, fræðumst um messuna, sálmabókina, Biblíuna, bænina, trúartákn, kirkjuárið og liti þess o.fl. Við syngjum og lærum vers og bænir.

Við fáum gesti í heimsókn, jafnvel frá öðrum löndum, sem spjalla við okkur um ýmis efni s.s. hjálparstarf, kristniboð, forvarnir, heilsusamlegt líf o.fl.

Þá förum við í dagsferð í Skálholt í haust.

Við tökum þátt í söfnun fyrir hjálparverkefni í tengslum við samræður um ábyrgð okkar á því að styðja þau sem þjást og líða nær og fjær.

Að sækja messur er mikilvægur þáttur í fermingarstarfinu og er gert ráð fyrir því að börnin sæki 7 - 10 messur yfir veturinn. Kirkjulykillinn útskýrir messuna og þar merkja fermingarbörnin við mætingar.

Fermingarfræðslan er skírnarfræðsla kirkjunnar

Fræðslunni lýkur með fermingarathöfn þar sem að barnið játar með söfnuðinum trú á Drottin Guð og það vilji leitast við að hafa Jesú Krist að leiðtoga lífsins og þiggur fyrirbæn og blessun.

Við innritun þarf að koma fram hvort að barnið er skírt og þá helst einnig hvar og hvenær. Börn sem ekki eru skírð eru hjartanlega velkomin til þátttöku í fermingarstarfinu í vetur og skírast þau áður en þau fermast. Hvenær það verður ræðum við um þegar starfið er hafið.

Ef einhver er ekki viss um hvort hann / hún vilji fermast þá hvet ég viðkomandi til að vera með í upphafi og sjá til hvernig honum / henni líkar starfið og fræðslan.

Ég vonast til þess að öll börn sem fá þetta bréf vilji vera með í fermingarstarfinu í Langholtskirkju í vetur. Ef þið hafið spurningar þá getið þið hringt í mig, sent tölvupóst eða komið í stutt spjall (öruggast að panta tíma, s: 5201300) og ég mun reyna að leysa úr þeim spurningum sem brenna á ykkur.

Fundir verða haldnir með foreldrum til kynningar á starfinu og undirbúning fyrir ferminguna, en einnig er stefnt að því að halda fræðslusamverur um kristna trú, trúaruppeldi o.fl. sem kynntar verða foreldrum fermingarbarna.

Við reynum að koma upplýsingum um fermingarstarfið reglulega til foreldra, því mikilvægt er að foreldrar eigi kost á að fylgjast vel með því sem er að gerast og geti stutt barnið sitt í þessu starfi sem öðru. Á heimasíðu Langholtskirkju www.langholtskirkja.is verður einnig reynt að hafa helstu upplýsingar um fermingarstarfið sem og annað sem er að gerast í kirkjunni. Sérstakur flipi er merktur FERMINGAR.

Fermingardagar vorið 2011:

· sunnudagurinn 10. apríl kl. 11

· pálmasunnudagur, 17. apríl, kl. 11

· pálmasunnudagur 17. apríl kl. 13

· annar páskadagur, 25. apríl kl. 11

· hvítasunnudagur 12. júní kl. 11

Einnig er hægt að fermast sumarið eða haustið 2011 ef aðstæður kalla á það.

Ég hef leyft fermingarbörnum og foreldrum að óska eftir fermingardegi og reynt að verða við þeim óskum. Fjöldi fermingarbarna hvern fermingardag er þó takmarkaður og því geta einhverjir dagar hugsanlega fyllst. Í síðasta lagi þarf að ákveða fermingardag um miðjan janúar, en gott er að vera búinn að því í lok nóvember.

Dagskráin næsta vetur verður með nokkuð svipuðu sniði og síðasta vetur. Í stað þess að börnin mæti í hverri viku allan veturinn verður að mestu unnið í kvöldsamverum 1x til 2x í mánuði. Sunnudagskvöld komu best út og stefnum við að halda þeim tíma í vetur. Börnin mæta öll á sama tíma og við vinnum bæði með þeim saman og í nokkrum hópum. Fæ ég aðstoðarfólk með mér við samverurnar.

Ég mun einnig skipta börnunum niður í litla hópa og kalla þau til mín utan ofangreindra sunnudagstíma. Þá gefst tími til persónulegs samtals sem er erfiðara í stærri hópi. Nánar verður greint frá fyrirkomulagi fermingarstarfsins á fundinum 29. ágúst svo og á heimasíðu Langholtskirkju.

Kostnaður:

Fermingarstarfið kostar kr. 9.300 (sama gjald um land allt sem ákvarðað er af dóms- og kirkjumálaráðuneyti), og er hluti af launum prests og annarra sem sjá um fermingarstarfið. Hægt er að greiða gjaldið í tvennu lagi og er t.d. hægt að greiða kr. 5.000 nú í byrjun starfs inn á reikning 338-13-221852 / kt 0209573369. Nánar um það í upphafi starfs.

Þá þurfa börnin að greiða hlut í kostnaði við ferðina í Skálholt í haust en söfnuðurinn og prófastsdæmið greiða stærstan hluta kostnaðar. Ekki er ljóst hver sú upphæð erður en í fyrra greiddi hvert barn kr. 2.500 og verður reynt að hafa það svipað.

Ég hef ákveðið að nota ekki sérstaka bók í vetur en mun ljósrita ýmis blöð til að lesa og vinna verkefni. Söfnuðurinn á einnig fræðslubækur sem við notum ásamt með Nýja testamentinu og sálmabók sem eru hér í kirkjunni.

Erfiður fjárhagur heimila á ekki að koma í veg fyrir að þau börn sem vilja geti tekið þátt í fermingarstarfinu að öllu leyti. Þau mál verða leyst með öðrum hætti ef þarf. Ég bið viðkomandi foreldra að ræða það við mig.

Ég hlakka til að sjá ykkur og eiga með ykkur góðar og skemmtilegar stundir í vetur.

Jón Helgi Þórarinsson

Langholtskirkja

Þau börn sem ætla að taka þátt í fermingarstarfinu í Langholtskirkju veturinn 2010 - 2011 eru beðin um að skrá sig fyrir 26. ágúst. Eftirfarandi upplýsingar er best að senda með tölvubréfi á netfangið: jonhelgi@langholtskirkja.is. Einnig má skila þeim í Langholtskirkju.

Skráningarblað fermingarbarna

Fullt nafn fermingarbarns ________________________________________

Kennitala ______________________ Heimasími ______________

Heimili, póstn. _______________________________________

Skóli og bekkjardeild _________________________________________

Er skírð / skírður (svara já eða nei ) ____________

Skírnardagur _____________ Skírnarstaður _______________________

Þeir sem ekki vita skírnarstað eða dag þurfa að afla sér þeirra upplýsinga og láta mig vita síðar.

Trúfélag barns _______ Þjóðkirkjan / _________ Annað trúfélag eða utan trúfélaga

(Ath að skv reglum Hagstofu þá fylgja börn yngri en 16 ára trúfélagi móður og það breytist ekki nema að foreldrarnir breyti því sjálfir. Í kirkjunni eru eyðublöð til trúfélagaskráningar og hægt að fá nánari upplýsingar hjá okkur prestunum).

Nafn foreldra/ forráðamanna ____________________________________

Netfang foreldra (ef þau vilja fá upplýsingar með tölvupósti): ___________________________

Athugasemdir eða aðrar upplýsingar –

s.s. óskir um fermingardag ef þið viljið koma þeim óskum á framfæri strax, en það er hægt að gera síðar.

Allar upplýsingar sem hér koma fram eru að sjálfsögðu trúnaðarmál. Listi með nöfnum fermingarbarna hefur verið sendur út í safnaðarblaði rétt fyrir fermingu og verður aðgengilegur á heimasíðu Langholtskirkju. Þá hefur mbl.is kallað eftir því fyrir páska að fá nöfn og heimili fermingarbarna.