16. 05. kl. 20 flytja Kór og Kammersveit Langholtskirkju Berliner Messe eftir Arvo Pärt og Kantötu nr. 4 Christ lag in Todesbanden (Í dauðans böndum Drottinn lá) eftir J. S. Bach í Langholtskirkju.

Tónskáldið Arvo Pärt (1935 - ) er eitt virtasta tónskáld samtímans. Stíll hans er einstakur og þykir hafa yfir sér ójarðneskan blæ. Nútímatónlist sem hljómar eins og hún hafi alltaf verið til!

Messan var samin 1993, upprunalega fyrir einsöngvara eða kór og orgel og hefur í því formi verið flutt hérlendis. Árið 2002 endurskoðaði tónskáldið messuna og útsetti fyrir strengjasveit og er þetta í fyrsta skipti að hún er flutt þannig hér.

Frá 1976 hefur Pärt þróað með sér stíl sem á sér enga hliðstæðu. Hann nefnir þessa tækni tintinnabuli (úr latínu: „litlar bjöllur“). Hann notar yfirtóna sem líkjast klukkuhlómi sem hverfast um miðlæga tóntegund. Með þessu nær tónlistin sterkum trúarlegum áhrifum.

Kantata nr. 4 er samin fyrir páskadag og er að öllum líkindum ein af fyrstu kantötum hans, að öllum líkindum samin um 1707. Hún er hrein kóralkantata í sjö þáttum. Hún hefst á sinfóníu og síðan notar hann 7 vers úr sálminum Í dauðans böndum Drottinn lá og útfærir fyrir fjórraddaðan kór, sópran/alt, tenór, bassa og sópran/tenór. Á tónleikunum syngur kórinn alla þættina en stundum eru einsöngvarar látnir syngja aríur og dúetta. Konsertmeistari er Ingrid Karlsdóttir, stjórnandi Jón Stefánsson.

Miðaverð til félaga í Listafélagi Langholtskirkju er kr. 3.000, almennt verð kr. 3.500

Glerlistasýning í safnaðarheimili Langholtskirkju opnuð 2. maí 2010

Sigríður Ásgeirsdóttir, glerlistamaður, og fimm erlendar listakonur, sýna

Saga hópsins

Árið 1984 tók Sigríður  þátt í seminari um steint gler í arkitektúr á  glerverkstæði Hein Derix Glasmalerei í Kevelaer í Þýskalandi. Var hún   
ein 16 þátttakenda víðs vegar úr veröldinni og á þessu tímabili  myndaðist góð vinátta nokkurra þátttakenda.

Fjórum árum síðar, árið 1988, skipulögðu Helga Reay-Young og Monica  Borgward (sem rak gallerí í Bremen) alþjóðlega sýningu glerlistamanna  sem nefnd var 36 konur frá 12 löndum. Sýningin var sett upp víða í  Evrópu og var að lokum seld í heilu lagi til Japan þar sem hún  myndaði grunn að nýju glerlistasafni þar. Við opnun sýningarinnar í  Bremen hittust þær aftur vinirnir frá seminarinu í Kevelaer, Helga  Reay-Young, Þýskalandi, Yoshi Yamauchi, Japan-Þýskalandi, Holly  Sanford, Nýja Sjálandi, Ellen Mandelbaum, New York og  Sigriður  Ásgeirsdóttir. Þar var  ákváðið  að það væri vel til fundið  að  hittast á tveggja ára fresti til skrafs og ráðagerða og halda sýningu  
í landi hver annarar og ferðast þar um.

Byrjað var á Íslandi með sýningu í Norræna húsinu 1989 sem féll í  góðan jarðveg og málin rædd  ferðast um landið. Tveimur  árum seinna vorum þær í Wales þar sem Amber Hiscott og Katerin Jones  voru gestgjafar og fyrsti sýningarbæklingurinn var prentaður. Þaðan  var farið til Austurríkis þar sem Kornelia König tók á móti hópnum og  til Japan 1995 þar sem þær Yoshy Yamauchi og Sachiko Yamamoto  skipulögðu sýningu. Árið 1997 var hópurinn  á  Írlandi og í London og Mary Mackey var gestgjafinn. Næst var farið   
til New York og Colorado undir leiðsögn Marie Foucault-Phipps og árið  2000 sá Holly Sanford um að taka á móti hópnum á Nýja Sjálandi. Svo  var farið til Kanada árið 2004 þar sem þær Doreen Balabanoff og Mimi  Gelman sáu um hópinn og til Ástralíu 2006 í heimsókn til Cedar Prest. Tuttugu ára afmælið var svo haldið í Þýskalandi þar sem Helga Reay- Young, Yoshi Yamauchi og Helma Sauerbrey voru gestgjafar. Chris Bird- Jones skipulagði svo “Gathering light” sýninguna  2008,  “an  anniversary exhibition of 20 glass artists” sem fyrst var í  Liverpool, Menningarborg Evrópu 2008 frá júní til ágúst og var síðan  sett upp með fleiri verkum hópsins í Frakklandi, í  Centre  
International du Vitral í Chartres frá október 2008 til ágúst 2009.  Gefin var út bók um hópinn sem kom út við opnun sýningarinnar í  
Chartres. Að lokinni sýningunni í Chartres var hún sett upp í The National  Waterfront Museum í Swansea í Wales 10. október 2009 til 31. janúar  2010 í boði Swansea Metropalitan University. Hvert verk var  sérstaklega gert fyrir þessa sýningu og gefin út og gaf Swansea  
Metropolitan University út fallega sýningarskrá undir stjórn Crish  Bird-Jones. Nú er hópurinn  aftur á Íslandi þar sem hann byrjaði og Ísland tekur á  móti gestunum með eldgosi í Eyjafjallajökli og hótun um að gestirnir  verði innlyksa vegna öskufalls. En þær huguðustu í hópnum láta þetta  ekki hafa áhrif á sig  - og þær sem ekki eru með aðrar  skuldbindingar næstu nokkrar vikurnar hafa komið til Íslands til að  sýna verk eftir sig, ferðast og spjalla saman vitandi að við munum  hittast aftur í Reykjavík að ári liðnu - og þá mun fleiri en nú og án  
truflunar af eldgosum.

Listafélag Langholtskirkju

Á okkar tímum skiptir þekking og menntun samfélagsins meginmáli fyrir framtíð atvinnulífs og menningar. Það má með sanni segja að tónlistarstarf Langholtskirkju hafi átt stóran þátt í auðga menningarlífið um langt skeið.

Menningarstarfsemi tengd tónlist er Langholtskirkju afar mikilvæg en rekstrargrundvöllur hennar hefur verið ótryggur. Starfsemi allra kóra kirkjunnar hefur byggst að verulegu leyti á aðsókn á tónleika þeirra. Hingað til hefur hver kór verið rekinn sem sjálfstæð eining og er fjárhagsstaða kóranna mismunandi eftir umfangi þeirra verka sem flutt eru hverju sinni.

Að vandlega íhuguðu máli og í samstarfi við sóknarnefnd Langholtskirkju, stjórnir kóranna og ýmsa fagaðila var Listafélag Langholtskirkju stofnað s.l. haust. Um er að ræða listafélag sem sem nýtist Langholtskirkju til þess að stýra starfseminni þannig að hægt verði að efla núverandi starf og jafnframt bregðast við nýjum aðstæðum og tækifærum.

Með stofnun Listafélags Langholtskirkju er leitast við að efla menningu og menntun á sviði lista ásamt því að skapa starfsmönnum besta mögulega umhverfi til sinna verka. Í öllu starfi þess munu gæði og árangur samhliða virðingu fyrir gildum og hugsjónum almenns kirkjustarfs verða höfð að leiðarljósi.

Helstu markmið Listafélags Langholtskirkju eru:

• Að hlúa að ímynd Langholtskirkju nær og fjær.
• Að þróa starf kórskólans og kóranna, skipulag tónleika, verkefnaval og gæði flutnings þannig að aðsókn aukist til þátttöku í kórstarfi og tónleikagestum fjölgi.
• Að skapa farveg fyrir farsælan vöxt og þróun til að efla samfélagið umhverfis Langholtskirkju með markvissum hætti.
• Að leggja áherslu á kynningu tónlistarstarfs Langholtskirkju.
• Að tryggja rekstur kirkju, kóra og kórskóla þannig að skipulag, þjónusta og menningarstarfsemi eflist samhliða.
• Að tryggja sterka stjórnun, skipulag og rekstur menningarstarfs Langholtskirkju.