Sókn
Ólafsfjarðarkirkja
Ólafsfjarðarkirkja var byggð eftir teikningu Rögnvaldar Ólafssonar árið 1915 úr steinsteypu og rúmaði 120 manns eða um tvo þriðju hluta íbúa staðarins á þeim tíma. Langt er því um liðið síðan kirkjan varð allt of lítil til flestra athafna, enda íbúar nú tífalt fleiri, og hefur aðstöðuleysi háð starfsemi allri. Hugmyndir um að byggja nýja kirkju hafa verið uppi um árabil en árið 1996 var hafist handa við stækkun gömlu kirkjunnar og byggingu safnaðarheimilis við hana.
Ólafsfjarðarkirkja
Fanney Hauksdóttir arkitekt og Arkitekta- og Verkfræðistofa Hauks, Akureyri, tók að sér að hanna safnaðarheimili í viðbyggingu við kirkjuna og breytingar á henni sjálfri. Rafhönnun annaðist Raftákn ehf á Akureyri. Formaður byggingarnefndar er Óskar Þór Sigurbjörnsson. Framkvæmdir hófust sumarið 1996 með því að safnaðarheimili var steypt upp og gert fokhelt fyrir áramót þess árs og fyrsta áfanga verks þar með lokið.
Annar áfangi verksins hófst síðsumars 1997 og lauk honum með endur-vígslu kirkjunnar 13. sept. 1998. Verkið fólst í lengingu kirkjuskips um 5,3 metra sem felur í sér 40 fermetra stækkun á gólffleti, viðgerð og frágangi kirkjuskips, þ.á.m. endurnýjun þaks, glugga, sönglofts, gólfefna, bókstaf-lega allra innréttinga, og tengingu við nú rúmlega fokhelt safnaðarheimili. Kirkjan er nánast nýbygging því eftir stóðu aðeins steinhluti turns og veggendar kirkjuskips til hálfs. Þekja á turni var endurnýjuð og lögð zinki og öflugu loftræstikerfi komið fyrir í rjáfri.
Ólafsfjarðarkirkja er háð húsfriðunarlögum. Kostað hefur verið kapps um að færa sem flest til upprunalegs horfs í anda Rögnvaldar Ólafssonar arkitekts.
Aðalverktaki kirkjubyggingarinnar eins og við 1. áfanga er Tréver h.f. og Vigfús Skíðdal Gunnlaugsson byggingarmeistari. Þá hefur Klemens Jónsson byggingarmeistari unnið ýmsa vandasama verkþætti endur-byggingarinnar m.a. endursmíði prédikunarstóls kirkjunnar sem Þorsteinn Esper smíðaði upphaflega.
Fjöldi undirverktaka hefur komið við sögu þessa byggingaráfanga:
* Raflagnir annaðist Raftækjavinnustofan s.f. Þess má geta að Magnús Stefánsson rafvirkjameistari vann einnig við endurbætur á Ólafsfjarðar-kirkju árið 1956 líkt og Klemens Jónsson smiður sem fyrr var nefndur.
* Múrverk og flísalögn í þessum áfanga annaðist Gestur Sæmundsson. Múrverk utanhúss í framhaldi af 1. áfanga annaðist Þorgils Gunnþórsson á Dalvík.
* Miðstöðvarlagnir sá Vélsmiðja Ólafsfjarðar hf. um. Kristinn Ragnarsson í Garði sá um að renna pílára og aðra rennismíði.
* Málun innanhúss sá Sigurgeir Jónsson á Dalvík um ásamt sveinum sínum. Málun utanhúss og í safnaðarheimilissal sá Hilmar Tryggvason um.
* Hljóðvist ehf. - hljóð og raftækniráðgjöf lagði á ráðin varðandi hljóðkerfi en Radiovinnustofan/Hilmar Jóhannesson hefur annast framkvæmd og vakað yfir verkinu.
* Blikk- og tækniþjónustan hf. á Akureyri sá um gerð og uppsetningu loftræstikerfis. Tré og Blikk ehf í Reykjavík annaðist zinkklæðningu á kirkjuturni.
* Niðurtöku og uppsetningu pípuorgels annaðist Björgvin Tómasson orgelsmiður í Mosfellssveit sem smíðaði orgelið fyrir tæpum áratug.
* Bólstrun annaðist Einar Guðbjartsson bólstrari á Akureyri.
* Ólafur Jónsson forvörður í Morkinskinnu í Reykjavík annaðist hreinsun altaristöflu sem er sú hin upphaflega sem Maron Sölvason, langafabróðir Fanneyjar arkitekts í móðurætt, málaði.
* Stjörnur í hvelfingu gerðu og gáfu Hólmfríður og Þórður í Burstabrekku.
* Áletrun yfir altari í kór vann Karl Haraldur Gunnlaugsson.
Ýmsir fleiri hafa komið við sögu á einn eða annan hátt, við verkið eða við gerð einstakra muna, auk mikils fjölda sjálfboðaliða og vildarvina kirkjunnar.
Tekið saman af Óskari Þór Sigurbjörnssyni formanni byggingarnefndar. Hann lýsti endurbyggðri Ólafsfjarðarkirkju við endurvígslu 13. september 1998, sem er nokkuð stytt hér, tekin úr vísitasíugerð biskups 2004.
Kvíabekkjarkirkja
Stutt Lýsing á sögu húss: Kvíabekkur er landnámsjörð Ólafs bekks er nam Ólafsfjörð og er talið að bændakirkja hafi risið þar fljótlega eftir kristnitöku og prestaspítali laust fyrir árið 1330. Kirkjur hafa þar margar staðið gegnum aldirnar en núverandi kirkja var byggð 1892 eftir að þá nýbyggð og stærri kirkja fauk af grunni í illviðri. Kirkjan var sóknarkirkja Ólafsfjarðarsóknar fram í byrjun 20. aldar en þá flutti presturinn niður í Hornið og var Ólafsfjarðarkirkja reist þar og vígð 1916. Kvíabekkjarkirkja var endurvígð árið 1958 eftir breytingar og endurbætur og eftir 1974 var hún enn endurbætt svo og umhverfi hennar. Kvíabekkjarkirkja er elsta hús í Ólafsfirði. …
Ástand húss í stuttu máli: Menn greinir nokkuð á um ástand húss. Þótt burðar- og innviðir hafi verið verulega endurbættir um miðja síðustu öld og síðar er nokkurt sig í gólfi í forkirkjunni og við búið að gólfbitar séu farnir að láta sig. Þá eru gluggar víðast orðnir lélegir eða ónýtir og þarfnist endurnýjunar. … Við síðari endurnýjun um 1974 var upprunaleg 8” standandi borðaklæðning fjarlægð enda fúin í gegn að norðan og austan. Þá voru burðarviðir sem til náðist endurnýjaðir, kirkjan einangruð og klædd með núverandi plastklæðningu sem var hugsuð til bráðabirgða, loftar vel og ver kirkjuna vel fyrir ágangi vatns. Þrátt fyrir ytri breytingar er kirkjan að mestu upprunaleg að innan, skrúðhús bættist við og stigi upp á söngloft við stækkun 1958. Kirkjan var máluð innan eftir endur-bæturnar 1974 og reynt að hafa litaval sem upprunalegast.
Tekið saman af Óskari Þór Sigurbjörnssyni, formanni byggingarnefndar, nóvember 2003, úr Vísitasíugerð biskups 2004.
