Stafholtsprestakall

Helgihald á aðventu og um jól í Stafholtsprestakalli

Birna G. Konráðsdóttir — Tue, 11 Dec 2012 12:30:07 +0000

Uppskeruhátíð í Stafholtsprestakalli

Birna G. Konráðsdóttir — Sat, 03 Sep 2011 22:49:28 +0000

Sumri er tekið að halla og náttúran er farin að skarta sínum fallegu haustlitum. Er líða tekur að hausti er uppskorið það sem til var sáð að vori.

Þakkað er fyrir góðar gjafir jarðar í Stafholtsprestakalli á líkan hátt og verið hefur undanfarin ár með uppskeruhátíð og Barna og fjölskylduguðsþjónustu í Stafholtskirkju sunnudaginn 4. september kl 14.

Að vanda er kirkjukaffi að lokinni guðsþjónustu og einnig verður ýmiskonar varningur á boðstólum til styrktar kirkjuviðgerum. Þeir sem vilja leggja eitthvað til, er það velkomið.

Reising hafin á nýja íbúðarhúsinu í Stafholti

Birna G. Konráðsdóttir — Fri, 19 Aug 2011 01:53:20 +0000

Í vor var tekin skóflustunga að nýju íbúðarhúsi í Stafholti. Fljótlega hófust framkvæmdir við grunn og að steypa sökkla. Í sumar hefur verktakinn Eiríkur I. Ingólfsson og hans menn smíðað útveggina, sem eru úr tré, á verkstæði fyrirtækisins. Nú er hins vegar búið að reisa veggina. Það var gert síðasta þriðjudag 16. ágúst. Stefnt er að því að sóknarpresturinn og fjölskylda hans flyti í nýja húsið fyrir jólin á þessu ári.

Fyrsta skóflustungan að nýjum prestsbústað

Birna G. Konráðsdóttir — Sat, 07 May 2011 13:35:44 +0000

Náttúran skartaði sínu fegursta, mildur blær og sólskin með köflum. Fuglar sungu og flugur suðuðu. Hópur fólks hefur safnast saman í Stafholti. Það er föstudagur 6. maí og tilefnið er ærið, það á að taka fyrstu skóflustungu að nýjum prestsbústað í Stafholti.

Jens Sandholt hjá Skjanna bauð fólk velkomið og lýsti frá sinum bæjardyrum því á hvern hátt hans fyrirtæki kom að þessum framkvæmdum.

Prófasturinn í Vesturlandsprófastsdæmi sr. Þorbjörn Hlynur Árnason blessaði síðan framkvæmdina og alla þá er að verkinu munu koma og sr. Jón Ásgeir Sigurvinsson las úr Metteusarguðspjalli um hinn hyggna mann er byggði hús sitt á bjargi.

Hápunktur samkomunnar var svo er sóknarpresturinn í Stafholtsprestakalli sr. Elínborg Sturludóttir tók hina fyrstu skóflustungu.

Að athöfn lokinni bauð Skjanni upp á kaffi og meðlæti í gamla prestsbústaðnum. Borgfirðingar glöddust og náttúran með. Baráttumál sóknarbarna var komið í farsæla höfn.

Handgerður hökull gefinn Stafholtsprestakalli

Birna G. Konráðsdóttir — Sun, 24 Apr 2011 01:28:53 +0000

Margrét Guðjónsdóttir, Hvassafelli gaf Stafholtsprestakalli nýjan hökul, handgerðan af Herder Andersson og var hökullinn vígður við guðsþjónustu í Stafholtskirkju á skírdagskvöld 21. apríl.

Herder Anderson er Svíi sem búið hefur hér á landi um langa hríð og hefur frá árinu 2006 saumað alls 26 hökla í öllum litum kirkjuársins ásamt með stólum. Efnið og litina hefur hann valið sem og hannað allt munstur sjálfur og er það bæði hefðbundið en einnig nýstárlegt. Hvert einasta spor er síðan saumað í höndum og álit hans er að kirkjuklæði skal saumað i höndum, ekki í saumavél.

Er hann setti upp sýningu á vinnu sinni var Margrét honum til ráðgjafar og aðstoðar. Herder gaf henni þennan hökul sem hún hefur nú gefið prestakallinu. Eins og áður segir var hökullinn helgaður í guðsþjónustunni að kvöldi skírdags og ber liti föstunnar.

Pilagrímagöngur – helgigöngur

Birna G. Konráðsdóttir — Tue, 19 Apr 2011 12:34:18 +0000

Hinn 13. mars s.l. hófust pílagrímagöngur sem prestarnir í Stafholti, Reykholti, og Hvanneyri hafa sameinast um að standa fyrir. Hugmyndin að þessari samvinnu hefur blundað með prestunum um nokkra hríð. Sjá nánar á heimasíðunni http://www.pilagrimar.is

Aðalsafnaðarfundur Stafholtssóknar

Birna G. Konráðsdóttir — Thu, 31 Mar 2011 16:19:34 +0000

Aðalsafnaðarfundur Stafholtssóknar verður haldinn í Stafholti sunnudaginn 3. apríl á eftir guðsþjónustu.

Fundarefni:

Venjuleg aðalfundarstörf
Framvkæmdir við kirkju og garð
Staða húsbyggingar í Stafholti
Önnur mál.