Í Skálholtsprestakalli eru fjórar sóknir en þær eru Skálholtssókn, Torfastaðasókn, Bræðratungusókn og Haukadalssókn.   Í prestakallinu eru því fjórar sóknarkirkjur.  Auk þeirra hefur fimmta kirkjan, Úthlíðarkirkja, verið byggð á hinum fornhelga stað, Úthlíð en hún er í einkaeign.  Reglulegt helgihald er í öllum þessum fimm kirkjum.

Skálholtsdómkirkja er stærst þessara kirkna, en fyrir utan að vera bæði sóknarkirkja og dómkirkja er hún þjóðarhelgidómur, enda hefur Skálholt lengi verið helgur staður í huga íslensku þjóðarinnar.

Torfastaðakirkja er í stærstu sókn prestakallsins en þar býr yfir helmingur sóknarbarnanna.

Bræðratungukirkja er minnsta kirkjan í prestakallinu, enda er Bræðratungusókn minnsta sóknin.  Þar er þó öflugt safnaðarstarf og kirkjusókn venjulega góð, enda sækir fólk víða að guðsþjónustur í þessari fallegu kirkju.

Haukadalskirkja er í eigu Skógræktar Ríkisins en Sóknarnefnd Haukadalssóknar sér um viðhald hennar og rekstur, enda er í henni helgihald allan ársins hring á vegum sóknarinnar.  Auk þess er hún mikið notuð fyrir hjónavígsur og eru brúðhjónin þá oft langt að komin.   Kirkja hefur nú staðið í um 1000 ár á þessu forna frægðarsetri sem Haukadalur er.   Nú er kirkjan ein eftir og minnir okkur á orð Jesaja spámanns:  Grasið visnar, blómin fölna en orð Guðs vors varir að eilífu.  (Jes 40:8)

Úthlíðarkirkja er nýjasta kirkjan, reist af Birni Sigurðssyni bónda í Úthlíð.  Þar er nú helgihald allan ársins hring og kirkjusókn einstaklega góð.

Sóknarprestur í Skálholtsprestakalli er sr. Egill Hallgrímsson.

Upplýsingar um helgihald og kirkjustarf í Skálholtsprestakalli eru á vefsíðunni www.ljosfari.is