Þingvallakirkja

Fræðsluganga þjóðgarðsins 7.júlí ber yfirskriftina Myndin af Þingvöllum. Einar Garibaldi, myndlistarmaður og sýningarstjóri sýningarinnar með sama heiti í Listasafni Árnesinga ræðir um Þingvelli og áhrif þeirra í myndlist. Dagskráin hefst á Hakinu kl. 20. Að lokinni fræðslu verða kvöldbænir í Þingvallakirkju um kl. 22. í umsjá Ásu Guðjónsdótttur og Sigurðar Bjarnasonar.

Síðustu tónleikar sumarsins í tónleikaröðinni Þriðjudagskvöld í Þingvallakirkju verða í kvöld, 5.júlí kl. 20. Það er sönghópurinn Voces Thules sem flytur fjölbreytta söngva og spannar efnisskráin söng allt frá söguöld til og með endurreisnartímans.

Sunnudaginn 3.júlí verður messa í Þingvallakirkju kl. 14. Kristján Valur Ingólfsson predikar og þjónar fyrir altari. Guðmundur Vilhjálmsson er organisti. Meðhjálparar eru Birna Gunnarsdóttir og Þorsteinn Guðlaugsson. Í  messunni er minnst dr. Sigurbjarnar Einarssonar biskups, en þann 30. júní voru hundrað ár frá fæðingu hans.

Vegna fjarveru sóknarprests verður ekki messað í Þingvallakirkju sunnudaginn 19.júní. Kirkjan verður opin eins og á virkum degi frá kl. 10 - 16.

Mikið verður um dýrðir á Þingvöllum þjóðhátíðardaginn. Að lokinni veglegri dagskrá í gömlum stíl sem hefst á Hakinu um hádegisbil verður guðsþjónusta í Þingvallakirkju þar sem séra Úlfar Guðmundsson, fyrrum prófastur Árnesinga predikar og þjónar fyrir altari. Organisti er Guðmundur Vilhjálmsson. Meðhjálparar eru  Kristján Þorgeirsson og Dóra Diego.

Á fræðslugöngu Þjóðgarðsins á fimmtudagskvöldi  16.júní  fjallar Margrét H. Hallmundsdóttir fornleifafræðingur um niðurstöður fornleifauppgraftrar sem fór fram við Þingvallakirkju árið 2009 vegna 150 ára afmælis kirkjunnar. Að lokinni göngu eru kvöldbænir í kirkjunni.

Tónleikaröðin Þriðjudagskvöld í Þingvallakirkju hefur hafið göngu sína þetta sumarið. Fyrstu tónleikarnir voru þriðjudaginn 14.júní. Þar léku Helga Aðalheiður Jónsdóttir, sem lék á margar gerðir blokkflauta, og Þórarinn Sigurbergsson, gítar, fjölbreytilega tónlist, einkum frá 16. og 17.öld við góðar undirtektir tónleikagesta sem fylltu kirkjuna.

Fimmtdaginn 9. júní  verður fyrsta fræðsluganga þjóðgarðsins á þessu sumri.  Gangan hefst á Hakinu kl. 20.
Kvöldbænir eru í Þingvallakirkju að lokinni göngu kl. 22.00
Einar Á.E.Sæmundsen fræðslufulltrúi þjóðgarðsins fjallar um Þingvelli í síðari heimsstyrjöldinni.  Hann rekur sögu bandaríska hermannsins Charlie Frame sem dvaldi á Þingvöllum í bækistöðinni Camp Cornell og fylgdi síðar eftir innrás bandamanna inn í  Þýskaland.

Messa verður í Þingvallakirkju á hvítasunnudag 12.júní kl. 14. Prestur er Kristján Valur Ingólfsson og organisti Guðmundur Vilhjálmsson. Meðhjálparar Ása Guðjónsdóttir og Sigurður Bjarnason.

Sunnudagurinn 29.maí er fimmti sunnudagur eftir páska og hinn almenni bænadagur. Klukkan 14 verður einföld guðsþjónusta í Þingvallakirkju með meðhjálpurum sumarsins.