Aðild að þjóðkirkjunni er staðfest með skráningu í Þjóðskrá. Eyðublöð fyrir skráningu eru á vef Þjóðskrár:

• Skráning einstaklings, 16 ára og eldri í þjóðkirkjuna
• Skráning barns, yngri en 16 ára í þjóðkirkjuna

Eyðublöðunum er skilað til Þjóðskrár Íslands, Borgartúni 21, 105 Reykjavík. Nánari upplýsingar eru veittar í s. 515 5300. Forsjármenn þurfa að undirrita tilkynningu um skráningu barns sem er yngra en 16 ára. Hafi barn náð 12 ára aldri skal það einnig undirrita.

Um 300 sóknir um land hafa innan sinna vébanda tæplega 80% þjóðarinnar. Meðlimagjöld, svonefnd sóknargjöld, eru reiknuð sem hlutfall af tekjuskatti. Með sama hætti innheimtir ríkið meðlimagjöld annarra trúfélaga.

Sóknargjöld þjóðkirkjufólks greiðast hins vegar beint til heimasóknar viðkomandi einstaklings og standa undir rekstri og viðhaldi kirkjuhússins og margháttaðri safnaðarstarfsemi. Með aðild að þjóðkirkjunni er stutt við eina styrkustu kjölfestu íslensks þjóðfélags og menningar. Þar munar um hvern og einn.

Ef þú ert óviss um það hvort þú ert skráð(ur) í Þjóðkirkjuna geturðu haft samband við Þjóðskrá eða sóknarprestinn.