Sr. Stefán Lárusson, pastor emeritus, kvaddur

06. febrúar 2020

Sr. Stefán Lárusson, pastor emeritus, kvaddur

Sr. Stefán Lárusson

Sr. Stefán Lárusson, fyrrum sóknarprestur í Odda, lést á Landspítalanum 25. janúar s.l. Hann verður jarðsunginn frá Kópavogskirkju í dag, 6. febrúar, kl. 13.00.

Sr. Stefán fæddist á Miklabæ í Blönduhlíð í Akrahreppi í Skagafirði 18. nóvember 1928. Foreldrar hans voru hjónin sr. Lárus Arnórsson, sóknarprestur í Miklabæ, og Guðrún Björnsdóttir, húsfreyja.

Eftirlifandi eiginkona hans er Ólöf Sigríður Jónsdóttir, kennari og kirkjuvörður, og eignuðust þau fjögur börn, þau Jón Lárus, Stefán, Guðrúnu Svövu og Björn Grétar.

Sr. Stefán ólst upp í Miklabæ og lauk stúdentsprófi frá Menntaskólanum á Akureyri 1950. Hann lauk guðfræðiprófi frá Háskóla Íslands 1954. Síðar stundaði hann framhaldsnám í kirkjusögu 1989-1990. Sr. Stefán var vígður 26. september 1954 til Staðarprestakalls í Grunnavík, með aðsetur í Bolungarvík - þjónaði jafnframt Bolungarvíkurprestakalli. Síðan fékk hann haustið 1955 veitingu fyrir Vatnsendaprestakalli í Suður-Þingeyjarsýslu. Þá veitingu fyrir Núpi í Dýrafirði haustið 1960 með aukaþjónustu í Holtsprestakalli í Önundarfirði. Árið 1964 varð hann sóknarprestur í Oddaprestakalli á Rangárvöllum og þjónaði þar fram á mitt ár 1991.

Sr. Stefán fékkst við kennslu í prestaköllum þeim er hann þjónaði, var einnig prófdómari við ýmsa skóla. Hann gegndi fjölmörgum trúnaðarstörfum í prestaköllum sínum og tók virkan þátt í samfélagi sóknarbarnanna hvort heldur í sveit eða þorpum.

Sr. Stefán var ljúfmenni mikið og yfirlætislaus maður, nákvæmur og vandaður í hverju verki. Gat verið skoðanafastur en rökstuddi þær vel. Sló á létta strengi ef svo bar við, bókhneigður og víðlesinn. Hann var ekkert gefinn fyrir tildur eða prjál, í erli dagsins gekk hann fram í hógværð og skyldurækni sem hann prédikaði í ræðum sínum og daglegu lífi.

Sr. Stefán Lárusson er kvaddur með virðingu og þökk. Guð blessi minningu hans


  • Frétt

  • Menning

  • Samfélag

  • Menning

  • Samfélag

Lokalóló.JPG - mynd
20
feb.

Tvö störf héraðspresta laus

...umsóknafrestur til 4. mars n.k.
Hallgrímskirkja í Saurbæ á Hvalfjarðarströnd - aðrar  kirkjur í Garða- og Saurbæjarprestakalli eru á Akranesi, Leirá og Innra-Hólmi
19
feb.

Tvær ráðnar

Garða- og Saurbæjarprestakall fullskipað
Sr. Agnes talaði við heimilisfólkið á dvalarheimilinu í Ólafsvík
19
feb.

Biskup meðal barna og skólafólks, eldri borgara og bæjarstjórnarmanna

Víða farið um Ólafsvíkur- og Ingjaldshólsprestakall og Setbergsprestakall