Fólkið í kirkjunni

Jenný Lind, Guðrún,Hallbjörg yngri og Hallbjörg eldri

Á Skagaströnd starfar öflugur kirkjukór undir stjórn organistans Hugrúnar Sifjar Hallgrímsdóttur.

Fólkið í kirkjukórnum er mjög trygglynt og ein af konunum í kórnum hefur sungið þar í tæp sjötíu ár, eða frá því að hún var 16 ára gömul.

Þetta er Guðrún Sigurðardóttir.

Það væri sjálfsagt ekki í frásögur færandi að fólk sýndi kirkjunni sinni trygglyndi ef ekki væri svo að bæði dóttir Guðrúnar, dótturdóttir og barnabarnabarn hennar syngja líka í kórnum.

Guðrún hefur eins og áður segir sungið í kórnum í tæp sjötíu ár, Hallbjörg Jónsdóttir, eldri í tuttugu og fimm ár, Jenný Lind Sigurjónsdóttir í sjö ár og Hallbjörg Jónsdóttir, yngri byrjaði í haust.


Kórinn heitir Kór Hólaneskirkju og starfar á Skagaströnd.

Í kórnum eru 28 meðlimir sem eru tæp 6% bæjarbúa, en meðal þeirra eru nokkrir meðlimir sem hafa sungið í tugi ára.

Hugrún Sif hefur stjórnað þeim undanfarin 18 ár.

Fréttaritari kirkjan.is hafði samband við Hugrúnu Sif og hafði hún þetta að segja:

“Ég held að fáir kórar hafi fjóra ættliði innanborðs og þaðan af síður manneskju sem hefur sungið hátt í 70 ár og skilað margföldu ævistarfi af samfélagsþjónustu og gefur hinum yngri ekkert eftir.

Svona fólk á auðvitað að fá fálkaorðu,”

segir Hugrún Sif létt í bragði en hún fékk meðal annars fimm ungar og kraftmiklar stelpur í kórinn í haust, sem hún er mjög þakklát fyrir.

slg