Bæna og kyrrðarstundir vegna áfalla víða um land

Samsett mynd frá mbl.is

Bæna og kyrrðarstundir eru nú haldnar víða um land vegna áfalla sem hafa verið í þjóðfélaginu að undanförnu.

Í gær var samvera í Miðdalskirkju vegna banaslyss sem var á Selfossi.

Í gær sagði kirkjan.is frá bæna og kyrrðarstund sem verður í Dómkirkjunni í Reykjavík kl. 18:00 í dag vegna áfalla í samfélaginu.

Í kvöld kl. 21:00 verður bæna og samverustund í Víkurkirkju í Vík í Mýrdal vegna mannshvarfs þaðan úr bænum.

Mun stundin fara fram bæði á ensku og íslensku.

Leitin að Benedek Incze, sem hefur verið saknað síðan á aðfaranótt mánudags, hefur enn ekki borið árangur.

Benedek er frá Ungverjalandi en var búsettur í Vík og starfaði þar.

Biðjum saman og tölum saman.

Sr. Jóhanna Magnúsdóttir hefur nýhafið störf sem sóknarprestur í Vík í Mýrdal.

Hún mun leiða stundina sem haldin verður í kvöld og segir:

„Við komum saman, kveikjum á bænaljósi, hlustum á tónlist, biðjum saman og síðast en ekki síst: tölum saman“

segir í tilkynningu frá Víkurprestakalli.

slg