Sálmar

Sálmur 28

  • Festingin víða, hrein og há,
  • og himinbjörtu skýin blá,
  • og logandi hvelfing, ljósum skírð,
  • þið lofið skaparans miklu dýrð.
  • Og þrautgóða sól, er dag frá degi
  • Drottins talar um máttarvegi,
  • ávallt birtir þú öll um lönd
  • almættisverk úr styrkri hönd.
  • Og þótt um helga þagnarleið
  • þreyti vor jörð hið dimma skeið
  • og enga rödd og ekkert hljóð
  • uppheimaljósin sendi þjóð,
  • skynsemi vorrar eyrum undir
  • allar hljómar um næturstundir
  • lofsöngur þeirra, ljóminn hreinn:
  • Lifandi Drottinn skóp oss einn.
Addison - Sb. 1945 - Jónas Hallgrímsson

Sálmur 29

  • Mikli Drottinn, dýrð sé þér,
  • dásemd þína' um aldaraðir
  • ásamt þínum englaher
  • allir lofa viljum glaðir,
  • falla þína fótskör á,
  • faðir, þína dýrð að sjá.
  • Lát þitt ríki lýsa vítt
  • löndin yfir frið að veita,
  • láttu fæðast lífið nýtt,
  • ljós þitt vorum hjörtum breyta,
  • láttu yfir lönd og höf
  • ljóma þína sigurgjöf.
  • Helgur andi, heiður þér
  • hver ein tunga' á jörðu færi.
  • Faðir, Guð, vér þökkum þér,
  • þér og Jesús, bróðir kæri.
  • Ástar þinnar eilíft ljós
  • oss sé blessun, vörn og hrós.
Ignaz Franz - Sb. 1945 - Friðrik Friðriksson

Sálmur 30

  • Lof sé þér, Guð, þín líkn ei þver,
  • lind allrar gæsku, dýrð sé þér.
  • Lof þér, sem veitir hjálp og hlíf,
  • himneska svölun, eilíft líf.
  • Lofar þig sól, þér lýtur jörð.
  • Lífið þér færir þakkargjörð,
  • blessi þitt nafn um eilíf ár:
  • Einn sannur Guð og faðir hár.
Sigurbjörn Einarsson

Sálmur 31

  • Þú sendir, Drottinn, dögg af hæðum
  • í dropum smáum niðu'r á jörð,
  • að kveikja líf í köldum æðum
  • og klaka leysa böndin hörð.
  • Lát náðardaggar dropa þinn
  • svo drjúpa' í mína sálu inn.
  • Þú lætur, Drottinn, ljós af hæðum
  • hér lýsa sólargeislum í,
  • það grundu skrýðir geislaklæðum
  • og gulli faldar himinský.
  • Ó, lát þú náðarljósið þitt
  • svo lýsa skært í hjartað mitt.
  • Þú sendir, Guð, þinn son af hæðum,
  • hann sól og dögg var allri jörð.
  • Hann lýsir oss í ljóssins fræðum
  • og leysir synda böndin hörð.
  • Það ljósið prýði líf mitt allt,
  • sú lífdögg þíði helið kalt.
Sb. 1886 - Valdimar Briem

Sálmur 32

  • Upp hef ég augu mín
  • alvaldi Guð, til þín.
  • Náð þinni' er ljúft að lýsa,
  • lofa þitt nafn og prísa.
  • Allt er að þakka þér
  • það gott, sem hljótum vér
  • um allar aldaraðir,
  • eilífi ljóssins faðir.
  • Vér erum gleymskugjörn,
  • gálaus og fávís börn,
  • en þú, sem aldrei sefur,
  • á öllum gætur hefur.
  • Eg veit, að aldrei dvín
  • ástin og mildin þín,
  • því fel ég mig og mína,
  • minn Guð, í umsjá þína.
Sb. 1945 - Herdís Andrésdóttir

Sálmur 33

  • Ég fel mig þinni föðurnáð,
  • minn faðir elskulegi,
  • mitt líf og eign og allt mitt ráð
  • og alla mína vegi.
  • Þú ræður öllu' og ræður vel
  • af ríkdóm gæsku þinnar.
  • Þín stjórn nær jafnt um himins hvel
  • og hjólið auðnu minnar.
  • Ég fel mig þinni föðurhönd
  • í freistinganna þrautum.
  • Mitt styð þú hold og styrk þú önd
  • og stýr af háskabrautum.
  • Þótt búi' eg yst við íshafs skaut,
  • ég er í skjóli þínu.
  • Þú stýrir himinhnatta braut
  • og hverju feti mínu.
  • Ég fel mig þínum föðurarm,
  • er fast mig sorgir mæða.
  • Þú einn kannt sefa hulinn harm
  • og hjartans undir græða.
  • Hið minnsta duft í mold þú sérð
  • og mælir brautir stjarna,
  • þú telur himintungla mergð
  • og tárin þinna barna.
  • Ég fel mig þinni föðurhlíf,
  • er fer ég burt úr heimi,
  • en meðan enn mér endist líf,
  • mig ávallt náð þín geymi.
  • Þú ystu takmörk eygir geims
  • og innstu lífsins parta,
  • þú telur ár og aldir heims
  • og æðaslög míns hjarta.
Sb. 1886 - Valdimar Briem

Sálmur 34

  • Upp, skapað allt í heimi hér,
  • að heiðra Guð, vorn Drottin,
  • hið minnsta verk hans mikið er,
  • um mátt hans allt ber vottinn.
  • Þótt kóngar fylgdust allir að
  • með auð og veldi háu,
  • þeir megnuðu' ei hið minnsta blað
  • að mynda' á blómi smáu.
  • Hvað get ég sagt? Ó, málið mitt
  • ei megnar, Guð, að lýsa,
  • hve margt er ástarundur þitt,
  • hve öflug stjórnin vísa.
  • Ó, miklið Guð, þér menn á jörð,
  • á málum óteljandi,
  • ó, mikla Guð, þú hólpin hjörð,
  • á himna dýrðarlandi.
Brorson - Sb. 1886 - Helgi Hálfdánarson

Sálmur 35

  • Drottinn minn, Guð, þú ert bjarg mitt og borg,
  • brugðist þú getur mér eigi.
  • Þú ert mitt athvarf í sérhverri sorg,
  • sól mín á harmanna degi.
  • Frelsisins merki ég hef upp hátt,
  • hjálpin úr upphæðum kemur brátt.
  • Drottinn minn, Guð, þú ert vernd mín og vörn
  • voðans í ólgandi flóði.
  • Frelsa þú lýð þinn og blessa þín börn,
  • blessaði faðirinn góði.
  • Lifandi Drottinn, ég lofa þig,
  • ljósanna faðir, ó, bænheyr mig.
Sl 28 - Sb. 1945 - Valdimar Briem

Sálmur 36

  • Eilíf, dýrleg, æðsta vera,
  • alvöld, heilög, rík af náð,
  • þakkarfórn skal þér fram bera,
  • þér, ó, Guð, sé lofgjörð tjáð.
  • Mikill, góður einn þú ert,
  • öll þín verk það segja bert.
  • Þú einn ræður öllu yfir,
  • allt þú blessar, sem að lifir.
  • Þó mín dauðleg augu eigi
  • auglit þitt nú sjái hér,
  • né þann ljómann líta megi,
  • ljóssins Guð, er skín hjá þér,
  • hjarta mitt samt þekkir þig,
  • þig, er veikan styrkir mig
  • og sem faðir elskar, gleður,
  • öllum náðargæðum seður.
  • Frá þér ljós og lífið streymir,
  • líkn og blessun hvert eitt sinn.
  • Mig þín föðurforsjón geymir,
  • frelsar, annast, Drottinn minn.
  • Þú mér vísar lífsins leið,
  • léttir kross og heftir neyð,
  • veitir mátt og megn að stríða
  • mitt í freisting, hryggð og kvíða.
  • Gæsku þinnar geislar skína
  • gjörvallt yfir ríki þitt,
  • allt mér vottar elsku þína,
  • í þér fagnar hjarta mitt.
  • Allt, sem lifir, í þér gleðst
  • og af þinni mildi seðst,
  • allt, sem lifir, lof þér segi,
  • lof þitt, faðir, aldrei þegi.
Sb. 1871 - Páll Jónsson