Sálmar

Sálmur 946

  • 1. Nú strýkur vorið völl og dal
  • svo vökna brár í fjallasal.
  • Nú lifna grös um laut og börð
  • sjálft lífið vekur freðna jörð.
  • 2. Heyr farfuglanna kvæðaklið,
  • er kría, tjaldur bregða við,
  • með gleðiraust og söngvaseim
  • úr suðurlöndum snúa heim.
  • 3. Sú fagra fuglaparadís
  • hún flytur Guði lof og prís
  • og syngur ljóð um líf og vor
  • svo léttir yfir hverri skor.
  • 4. Og fagna má sem fugl í söng
  • við ferðalok í jarðarþröng
  • sá er þú leiddir langan veg.
  • Ó, lífsins Guð, þig tigna ég.
Marteinn Lúther - T.N. Djurhuus - Kristján Valur Ingólfsson.

Sálmur 947

  • Öll góð og öll fullkomin gjöf er frá þér,
  • þú gjafarinn eilífi, fyrir mér sér.
  • Ég meðtek sem ástgjöf hvern einasta verð,
  • með auðmýkt og hjarta míns þakklætisgerð.
Steinn Sigurðsson

Sálmur 948

  • Þar sem Drottinn ber á borð
  • blessun streymir niður.
  • Þar sem hljómar himneskt orð
  • helgur ríkir friður.
  • Fyrir allt sem mettar mann
  • miklum ríka gjafarann.
  • Lof og dýrð sé Drottni.
Steinn Sigurðsson

Sálmur 949

  • Minn Guð, blessa allt okkar brauð.
  • Gef þú öllum þeim sem hungrar brauð þitt
  • en hungur réttlætis þeim sem nóg eiga brauð.
  • Minn Guð, blessa allt okkar brauð.
Frederico Pagura – Kristján Valur Ingólfsson.

Sálmur 950

  • 1. Guð sem í árdaga oss reisti bústað á jörðu,
  • kallaði ljósið frá myrkri, landið úr sævi,
  • skapaði Ísland með eldi.
  • Þjóð vor hin íslenska alin hjá Þingvallabergi
  • valdi sér leiðsögn í Kristi, kölluð af honum,
  • þáði hans líf sér til lausnar.
  • Guðs andi heilagi, heyr þú er kirkja þín biður:
  • Kom þú í Orði og mætti, endurnær börn þín,
  • umskapa lýð þinn sem landið.
Kristján Valur Ingólfsson.

Sálmur 951

  • 1. Er Kristur helgaði land og lýð
  • fór ljós og ilmur um strönd og hlíð,
  • þá gladdist hvert strá sem Ísland ól
  • og lofaði lífsins sól.
  • 2. Þá sungu vindarnir vorsins óð
  • um vonanna ríki, nýja þjóð,
  • og daggir minntust við dal og tind,
  • sem tilbáðu lífsins lind.
  • 3. Og ljósið breiddist um berg og völl,
  • þá brostu íslensku djásnin öll,
  • þar geislaði þökk og gleði lands,
  • sem orðið var óðal hans.
  • 4. Hans mark er dregið í heiðið hátt,
  • á hvítan jökul og fjallið blátt,
  • í rauða glóð og hvern geislakrans
  • frá draumum og dul vors lands.
  • 5. Sjá, náð hans skín gegnum norðurljós,
  • hans nafn er á björk og engjarós,
  • allt líf og sú von sem Ísland á
  • er geisli hans huga frá.
  • 6. Vort landið hrjúfa með heiðar brár
  • skal hans um ókomin þúsund ár,
  • hvert barn sem fæðist er bæn og þrá,
  • og svarið er honum hjá.
  • 7. Og farsæld, blessun, hins frjálsa lands
  • er fánans bæn, sem er merki hans,
  • þess konungs sem Ísland kaus og laut
  • í frelsi sem förunaut.
  • 8. Nú syngja vindarnir vorsins óð
  • um vonanna ríki, kristna þjóð,
  • og daggir Guðs kyssa dal og tind.
  • Vér bergjum á lífsins lind.
Sigurbjörn Einarsson

Sálmur 952

  • Ó, Guð, vor líkn um liðna tíð,
  • vor lífsvon fram um braut,
  • vort athvarf þegar æðir hríð
  • og eilíft verndarskaut.
  • 2. Við hástól þinn með hlýðið geð
  • var helgra manna líf.
  • Þinn armur getur öllum léð
  • þar öruggt skjól og hlíf.
  • 3. Því fyrr en risu fjöll úr sæ
  • og foldin hlaut sitt mót,
  • þú varst, ó, Guð, og verður æ
  • þótt valt sé tímans rót.
  • 4. Hvert aldaþúsud er hjá þér
  • með andartaksins brag
  • sem morgunstund er bjarma ber
  • og boðar nýjan dag.
  • 5. Líkt straumi tíminn stríður ber
  • hvert stopult mannslíf fjær.
  • Sem glit af draumi gleymt það er
  • þá glóir morgunn skær.
  • 6. Ó, Guð, vor líkn um liðna tíð,
  • vor lífsvon fram um braut.
  • Ver athvarf heims er æða stríð
  • og eilíft verndarskaut. Amen.
Isaac Watts – Jóhannes Pálmason

Sálmur 953

  • Faðir vor, þú sem ert á himnum,
  • helgist þitt nafn,
  • til komi þitt ríki,
  • verði þinn vilji svo á jörðu sem á himni.
  • Gef oss í dag vort daglegt brauð
  • og fyrirgef oss vorar skuldir
  • svo sem vér og fyrirgefum vorum skuldunautum.
  • Eigi leið þú oss í freistni,
  • heldur frelsa oss frá illu.
  • Því að þitt er ríkið, mátturinn og dýrðin að eilífu. Amen.
Matt 6.9b-13

Sálmur 954

  • Syngið Drottni nýjan söng.
  • Lofið hann að eilífu,
  • lofið hann að eilífu.
  • Syngið Guði dýrð, öll lönd.
  • Syngið, lofið Drottins nafn.
  • Syngið Drottni nýjan söng,
  • dásemdarverk hefur hann gert.
  • Drottinn kunngjörði hjálpræði sitt,
  • sýndi þjóðunum réttlæti sitt.
  • Hylli Drottin veröld öll,
  • og syngi fagnaðarsng.
  • Fljótin klappa´ og lofa, fjöllin öll fagna,
  • sjá, Guð kemur, sjá, hann kemur.
  • Singt dem Herrn ein neues Lied.
  • Lobsingt ihm alle zeit.
Sbr. Slm 96.1-2; 98.1,2,4,8-9 – Frá Taizé samfélaginu – Tómas Sveinsson, Jón Ólafur Sigurðsson