Sálmur 590
- Faðir vor, þín eilíf elska vakir
- yfir hverju spori barna þinna.
- Lát þú oss, sem leitum þín og biðjum,
- ljós þíns orðs og návist þína finna.
- Kristur segir: Komið til mín allir,
- kærleiksandi minn er þín að leita,
- til að helga annir, raun og yndi,
- innri gleði, styrk og frið að veita.
- Lof sé þér, sem lífið átt og gefur,
- lindin alls hins góða, fagra, bjarta,
- einn þú ræður allt, sem huga dreymir,
- alla dul og von í mannsins hjarta.
- Þú, sem leggur lífsins huldu brautir,
- lætur ást og drauma tveggja mætast,
- gjör þau eitt í trú og von og vilja,
- veit þeim náð að láta heit sín rætast.
- Verið, brúðhjón, vígð til lífs með Kristi,
- vakið, biðjið, fylgið, treystið honum,
- verði allt, sem annað hinu gefur,
- uppfylling á hans og ykkar vonum.
- Látið hendur hlýna við hans loga,
- hug og augu spegla ljós hans anda,
- svo þið verðið gleði Guðs hvort öðru,
- gjöf, sem blessar hamingju og vanda.
- Dýrð sé þér í dag og allar stundir,
- Drottinn, faðir, sonur, helgur andi.
- Heyr þá bæn, að börn þín saman verði,
- blessun sér og gæfa þjóð og landi.
Sigurbjörn Einarsson
