Blönduóskirkja

Blönduóskirkja var byggð á árunum 1982-1993 og var vígð þann 1. maí árið 1993. Hún er óvanaleg að gerð, byggð með bogadregnum hallandi veggjum, hallandi sléttu þaki og austurgafli. Skrúðhús er útbygging, einnig með hallandi, sléttum veggjum og sérinngangi. Arkitekt kirkjunnar var dr. Maggi Jónsson. Aðalinngangur er að vestan og einnig annar aukainngangur þar inn í hliðarsal. Yfir kirkjudyrum er stór gluggi til vesturs og annar gluggi yfir skrúðhúsi til suðurs hjá altari, en að öðru leyti eru aðeins gluggarifur við loft og gólf og þakop í hliðarsal. Kirkjan er turnlaus, en veggur með klukknaporti gengur út frá kirkjunni til vesturs, og sunnan við hana er stakstæður steinsteyptur kross.

Orgel kirkjunnar er pípuorgel og var vígt 15. nóvember 2009. Orgelið ber ópustöluna 30 og er frá orgelverkstæði Björgvins Tómassonar á Stokkseyri. Smíði hljóðfærisins önnuðust Björgvin Tómasson, Egill Björgvinsson, Guðmundur Gestur Þórisson, Jóhann Hallur Jónsson og Júlíus Óttar Björgvinsson. Orgelhúsið er smíðað úr evrópskri eik og einnig allar trépípur þess, 72 að tölu. Málmpípur eru smíðaðar úr hinum ýmsu tin- og blýblöndum en samtals hefur hljóðfærið 1.245 pípur. Hljóðfærið hefur mekanísk nótnaborðstengsl og rafstýrð raddtengsl með 192 forvalsmöguleikum. Hljóðfærið hefur 21 rödd sem skiptast á tvö hljómborð og pedal.

Altaristaflan sýnir Emmausgönguna eftir Jóhannes Kjarval. Hún er á austurgafli til hliðar við altarið. Undir töflunni er letrað: "Sjá ég er mitt á meðal yðar." Kirkjan á kaleik og patínu úr nýsilfri. Skírnarfonturinn var útskorinn af Ríkarði Jónssyni, með áfestri silfurskál. Þá er í kirkjunni Hyundai píanó. Kirkjuklukkan kom úr gömlu kirkjunni.