Skírn

Í skírninni ert þú fali/nn/n/ð Guði, föður, syni og heilögum anda, og beðið fyrir framtíð þinni.

Presturinn sem skírir þig eða barnið þitt biður Guð um að vera nálægt þér í öllu lífinu. Kirkjan býður öllum skírn án skilyrða. Börn, unglingar og fullorðið fólk er boðið velkomið til skírnar.

Ef um ungbarnaskírn er að ræða þá býður kirkjan síðar á ævinni til fermingar sem er staðfesting barnsins á skírninni.

Allir prestar Þjóðkirkjunnar mega skíra. Þú getur leitað til þíns prests eða prests í nágrannasöfnuði. Í skírninni fer presturinn með blessun og þau sem eru viðstödd biðja fyrir barninu og framtíð þess.

Presturinn biður fyrir og eys vatni yfir höfuð skírnarþegans og merkir með tákni krossins á enni og á brjóst. Skírnin er hin sama alveg sama á hvaða aldri hún er framkvæmd.

Þegar Jesús hafði verið sýnilegur fylgjendum sínum í 40 daga eftir upprisuna stefndi hann lærisveinum sínum til fjalls í Galíleu. Þar birtist hann þeim og sagði:

Allt vald er mér gefið á himni og jörðu. Farið því og gjörið allar þjóðir að lærisveinum, skírið þá til nafns föður, sonar og hins heilaga anda, og kennið þeim að halda allt það, sem ég hefi boðið yður. Og sjá, ég er með yður alla daga, allt til enda veraldar.
(Matt. 28, 18-20).

Þessi orð eru kölluð skírnarskipunin og í krafti þeirra er fagnaðarerindið um kærleika og fyrirgefningu Guðs boðað í orði og verki.

Þannig hefur boðskapur Jesú borist frá einni kynslóð til annarrar.
Með því að fara með þessi orð við skírnina er skírnarþeginn, foreldrar skírnarbarns og skírnarvottar minnt á þá ábyrgð sem þau taka að sér við skírnina. Sú ábyrgð er að tileinka sér þann boðskap sem Jesús kenndi lærisveinum sínum um kærleikann. Skírnarvottar kallast einnig guðfeðgin og eru þau tvö til fimm. Við ungbarnaskírn játa foreldrar og guðfeðgin trúna fyrir hönd barnsins og leitast við að fræða það sem mikilvægt er í kristnum boðskap.

Skírnin fer þannig fram að prestur leiðir stundina, en gjarnan koma fjölskyldumeðlimir að henni á einn eða annan hátt.

Fjölskyldur móta stundina í samráði við prestinn og ræða um hvort skírnin fari fram við guðsþjónustu, í sérstakri athöfn í kirkju eða í heimahúsi. Einnig ræður fjölskyldan hvort leikin er tónlist eða sálmar sungnir.

Ef þú varst ekki skírð/ur/t sem ungbarn, en vilt fermast þarf að skíra þig áður en þú fermist því fermingin er staðfesting þín á skírninni.

Þá færð þú að vera með við að undirbúa skírnina og getur fengið að velja skírnarvottana.

Skírnarvottar verða að vera skírðir einstaklingar.

Ef þú varst ekki skírð/ur/t sem barn eða unglingur getur þú þegið fullorðinsskírn. Kirkjan býður þeim sem vilja velkomin til þess að láta skíra sig eftir að hafa fræðst um hvað kristinn boðskapur felur í sér.

Trú fjallar bæði um fræðslu og reynslu. Kristin trú verður hluti af lífi okkar og dýpkar með reynslunni. Við sjáum lífið, samfélagið og heiminn með augum trúarinnar. Skírnin er hin sama óháð því á hvaða aldri hún er framkvæmd. Presturinn biður fyrir og eys vatni yfir höfuð skírnarþegans og merkir með tákni krossins á enni og á brjóst.

Ef þú vilt taka þetta skref, er fyrsta skrefið að hafa samband við prest að þínu vali. Þú getur fundið þína kirkju hér að ofan, sem og lista yfir alla presta Þjóðkirkjunnar hér að neðan.

Ef barn er hættulega sjúkt og eigi unnt að ná til prests og óvíst er hvort það lifi má skíra það skemmri skírn. Sérhver sem er skírð/ur/t má skíra skemmri skírn. Einnig getur vígður prestur eða djákni skírt skemmri skírn í sömu aðstæðum Gæta skal þess að ávallt sé einhver á staðnum sem borið getur vitni um að skírnin hafi farið fram. Tilkynna skal presti um skírnina með beiðni um staðfestingu hennar í söfnuðinum.

Skemmri skírn fer fram með þessum hætti:

Sá/sú er skírir nefnir nafn barnsins, eys þrisvar með lófa sínum vatni á höfuð þess og segir um leið: Ég skíri þig í nafni föður, sonar og heilags anda. Amen. Síðan biður hann/hún Faðir vor og blessar barnið með blessunarorðunum:

Drottinn blessi þig og varðveiti þig. Drottinn láti sína ásjónu lýsa yfir þig og sé þér náðugur. Drottinn upplyfti sínu augliti yfir þig og gefi þér frið.

Þá er sunginn sálmur, ef því verður við komið, annars lesinn. Sé tími til er farið með postullegu trúarjátninguna.

Skemmri skírn er staðfest í kirkju í almennri messu safnaðarins.

Skemmri skírn er fullgild skírn. Barn sem hefur verið skírt skemmri skírn er því ekki skírt á nýjan leik, en tilkynna ber presti um skírnina. Presturinn skráir skírnina í kirkjubókina. Skráð er nafn barnsins og foreldra þess og skírnarvotta, dagsetning skírnarinnar og nafn þess sem skírði. Staðfesting skemmri skírnar fer fram samkvæmt Handbók kirkjunnar.