Þingmúlakirkja

Þingmúlakirkja var byggð árið 1886. Hönnuður hennar var Niels Jónsson forsmiður frá Sauðhaga. Forkirkjan var smíðuð á 100 ára afmæli kirkjunnar, árið 1986. Hönnuður var Bjarni Ólafsson húsasmíðameistari. Kirkjan var friðuð 1. janúar árið 1990.

Þingmúlakirkja er timburhús með opna forkirkju við vesturstafn. Kirkjan er klædd plægðri vatnsklæðningu og stendur á steinhlöðnum og steinsteyptum sökkli. Á hvorri hlið kirkju eru tveir gluggar. Í þeim er miðpóstur og tveir fjögurra rúðu rammar. Hliðar forkirkju eru klæddar láréttum borðum að neðan, en lóðréttum að ofan og súlur eru undir framhornum. Fyrir kirkjudyrum eru tvöfaldar vængjahurðir. Prédikunarstóll er milli tveggja innstu bekkjaraða, sunnan megin í framkirkju. Veggir eru klæddir strikuðum panelborðum og yfir kirkjunni er panelklædd hvelfing, stafna á milli.

Altaristafla Þingmúlakirkju er olíumálverk frá árinu 1916 eftir Þórarin B. Þorláksson listmálara og sýnir Jesú og bersyndugu konuna. Í baksýn er landslag sem minnir á Skriðdal. Kirkjan á silfurkaleik og patínu. Gripirnir eru óstimplaðir, en taldir vera eftir Guðmund Sigmundsson (1787-1863) silfursmið og bónda í Geitdal í Skriðdal. Skírnrfonturinn er gerður af Þórarni Stefánssyni (1904-2002) smíðakennara á Laugarvatni árið 1972. Klukkur Þingmúlakirkju eru tvær og báðar með áletrun. Þær eru fyrir ofan hvelfinguna og verður ekki komist til að skoða þær svo vel sé. Önnur gæti verið frá 18. öld, um hina er allt á huldu.