Sálmabók

1 Ljómi Guðs veru líður nú
um landsins fjallasal.
Gengur af himni geislabrú
í gegnum jarðardal.

2 Lífsandinn frjálsi lausnarans
líður um hvelin víð.
Öll mænir skepnan upp til hans
að endurlausnar tíð.

3 Fótspor hans minnast fjallið við
en frá því ber hann ský
dagsins um opna himins hlið.
Hann kemur eins á ný.

4 Dagurinn geislabryddir börð,
bregða þau litum ótt.
Englarnir syngja' um alla jörð
eins og á jólanótt.

5 Loftið er fullt af fuglasveim,
fögru þeir landi ná.
Vísaði Drottinn vængjum þeim
veg yfir djúpin blá.

6 Sunnan fer tær af sólu nú
sumarsins heiti blær.
Vermir þig Kristur von og trú
viljir þú ganga nær.

7 Kveikir af steinum kærleiksyl
við kvelds og morguns tjald
höndin sem lagði hnatta bil,
himins og jarðar vald.

8 Kristur, úr þínum konungs sal
kemur þú, lífs míns vörn.
Kallar þú heim frá dauðans dal
duftsins og tímans börn.