Sálmabók

1 Vér týnum oft Jesú í heimi hér
í hávaða lífs og glaumi,
vér leitum hans þar sem ei hann er
og oftlega' í leiðslu' og draumi.
Vér hyggjum hann fjær þá hann er nær
og hrekjumst af tímans straumi.

2 Vér leitum að Jesú en hann er hér
í húsi síns föður kæra.
Í helgidóm bent oss hingað er
með hljóminum klukkna skæra.
Hér lýsir hans orð, hans blessað borð
hér blessun oss hefur að færa.

3 Vort hjarta sé musteri heilagt það
er Herrann í bústað eigi
og hvenær sem leitum honum að
þar hann ætíð finna megi
svo viskan og náð þar verði sáð
er vaxi með hverjum degi.