Starfsþjálfun

Markmið starfsþjálfunar eru margþætt. Nemendur fá tækifæri til að kynnast starfi kirkjunnar, máta sig við störf vígðra þjóna og öðlast dýpri þekkingu á starfsumhverfi þjóðkirkjunnar, þar með talið stjórnkerfi hennar, lögum og starfsreglum. Lögð er áhersla á að efla hagnýta færni nemandans á lykilsviðum kirkjulegs starfs. Þar má nefna færni í mannlegum samskiptum, stjórnun, sálgæslu, helgihaldi og að axla sjálfstæða ábyrgð á verkefnum. Þjálfunin miðar að því að samþætta fræðilega þekkingu og hagnýta færni til að efla fagmennsku og sjálfsþekkingu verðandi presta- og djáknaefna.

Starfsþjálfunin er ætluð tveimur hópum háskólanema:

1. Prestsefnum: Nemendum sem stunda nám til embættisprófs í guðfræði. Þessir nemar skulu hafa lokið BA-prófi í guðfræði.
2. Djáknaefnum: Nemendum sem stunda nám í djáknafræði. Djáknaefni í BA-námi þurfa að hafa lokið a.m.k. 60 ECTS einingum en djáknaefni í 60 eininga viðbótarnámi þurfa að hafa lokið a.m.k. 30 ECTS einingum.

Skilyrði er að námið fari fram við Guðfræði- og trúarbragðafræðideild Háskóla Íslands eða við annan sambærilegan og viðurkenndan skóla. Því miður er ekki heimilað að hefja starfsnám fyrr en framangreindum skilyrðum er náð og ljóst að viðkomandi sé kominn inn í meistaranám.

Hafi einstaklingur lokið guðfræðinámi án þess að ljúka starfsþjálfun samhliða námi eða lokið guðfræðinámi við erlendan háskóla, þá fer umsóknin í sérferli hjá starfsþjálfunarteymi.

Sótt er um þátttöku í starfsþjálfun rafrænt á vef Þjóðkirkjunnar. Tekið er á móti umsóknum í upphafi haustannar.

Starfsþjálfunarteymi fer yfir umsóknir og boðar nemendur í viðtöl. Sálfræðingur leggur fyrir nemendur persónuleikapróf. Að því loknu upplýsir starfsþjálfunarteymið nemendur um hvort þeir komist í starfsþjálfunarferlið eða ekki.

Aðild að kirkju: Umsækjandi þarf að vera skráður í Þjóðkirkjuna.

Þátttaka í kirkjulegu starfi: Æskilegt er að umsækjandi geti sýnt fram á fyrri þátttöku í kirkjulegu starfi eða vera reiðubúin að afla sér slíkrar reynslu meðan á námi stendur.

Skírnarvottorð: Áskilið er að fólk hafi hlotið skírn.

Ferilskrá: Ítarleg ferilskrá sem lýsir menntun og starfsreynslu skal fylgja umsókn. Áskilið er að tveir meðmælendur séu þar tilgreindir, sem þekkja til nýlegra starfa umsækjanda og að látið sé vita hvort hafa megi samband við þá beint eða hvort fyrst þurfi að láta umsækjanda vita. Áskilið er að þeir aðilar sem þarna eru tilgreindir séu ekki vinir eða ættingjar umsækjanda.

Samþykki fyrir athugun á námsframvindu: Undirritað samþykki fyrir því að Þjóðkirkjan megi afla upplýsinga um framvindu náms umsækjanda. Nemi getur líka aflað þessara gagna með reglubundnum hætti og skilað inn sjálfur en þetta fyrirkomulag felur í sér talsvert hagræði.

Samþykki fyrir athugun úr sakaskrá: Undirritað samþykki fyrir því að Þjóðkirkjan afli upplýsinga úr sakaskrá.

Persónulýsing: Stutt lýsing á umsækjanda, skrifuð í 3. persónu. Miðað er við u.þ.b. eina A4 blaðsíðu.

Umsækjendur um starfsþjálfun þurfa að þreyta persónuleikapróf. Prófið er lagt fyrir af sálfræðingi sem metur niðurstöðu og fylgir eftir í viðtali. Jafnframt tekur starfsþjálfunarteymið viðtöl við umsækjendur sem skoðast sem hluti þessa mats.

Litið er svo á að enginn geti fallið á persónuleikaprófi. Hins vegar getur niðurstaða persónuleikaprófs gefið til kynna að viðkomandi búi ekki yfir þeim eiginleikum sem starfið krefst eða að starfið henti ekki viðkomandi. Sálfræðingur getur boðið viðkomandi að þreyta annað próf sem prófar betur tiltekna þætti en jafnframt getur viðkomandi fengið að hefja starfsþjálfun með fyrirvara um að viðkomandi vinni í tilteknum málum og taki persónuleikapróf síðar. Algengast er þó í slíkum tilvikum að viðkomandi fari ekki í starfsþjálfun en geti sótt um á ný og endurtekið ferlið að ári liðnu eða tveimur.

Fjöldi tíma í starfsþjálfun veltur á ýmsu svo ekki er hægt að gefa upp tiltekinn tímafjölda. Algengast er að starfsþjálfun sé sinnt samhliða námi, yfir tveggja ára tímabil. Enginn er útskrifaður úr starfsþjálfun fyrr en fyrir liggur að viðkomandi sé að fara útskrifast, þ.e. öllum prófum hefur verið náð sem og ritgerð/lokaverkefni.

Gerð er krafa um að nemar hafi fengið fullnægjandi þjálfun og séu tilbúnir fyrir alla þætti starfsins, svo sem annast helgihald, sjá um æskulýðsstarf og starf með öldruðum og sinnt sálgæslu, svo dæmi séu nefnd. Starfsþjálfunin er ávallt skipulögð út frá þörfum hvers nema og getur reynsla, t.d. í æskulýðsstarfi, verið metin. Starfsþjálfunarteymi í samráði við aðalleiðbeinanda metur hvar rétt sé að leggja áherslur og hvernig skipulag líklegt er að reynist viðkomandi sem best.

Þjóðkirkjan leggur áherslu á persónuvernd og vinnur persónuupplýsingar í samræmi við lög nr. 90/2018 um persónuvernd og vinnslu persónuupplýsinga. Starfsþjálfunarnemar geta óskað eftir upplýsingum um vinnslu persónuupplýsinga sinna og neytt annarra réttinda samkvæmt lögunum. Fyrirspurnum má beina til persónuverndarfulltrúa Þjóðkirkjunnar á netfangið personuvernd@kirkjan.is. Einnig er hægt að beina kvörtun til Persónuverndar.

Sálfræðingur annast framkvæmd, úrvinnslu og faglegt mat á persónuleikaprófum og tekur viðtöl eftir því sem við á. Þjóðkirkjan annast umsóknar- og inntökuferlið og tekur við samantekt sálfræðings á niðurstöðum. Upplýsingar úr viðtölum og prófum eru meðhöndlaðar af fyllstu gætni og í samræmi við gildandi siðareglur um trúnað.

Þegar aðkomu sálfræðings lýkur eyðir hann öllum gögnum sem hann hefur undir höndum eftir að samantekt hefur verið afhent Þjóðkirkjunni. Þjóðkirkjan eyðir samantektinni þegar sjö ár eru liðin frá því að próf var lagt fyrir, enda hafi til þess fengist heimild frá Þjóðskjalasafni. Þar sem Þjóðkirkjan er afhendingarskyldur aðili samkvæmt lögum nr. 77/2014 um opinber skjalasöfn er almennt óheimilt að eyða gögnum sem henni hafa borist eða orðið til hjá henni.

Aðgangur að upplýsingunum er takmarkaður við þá sem koma að starfsþjálfunar- og inntökuferlinu og þurfa á þeim að halda vegna starfa sinna. Gögn eru varðveitt í öruggu og aðgangsstýrðu rafrænu kerfi eða í læstum hirslum.

Þjóðkirkjan og sálfræðingurinn eru sjálfstæðir ábyrgðaraðilar að þeirri vinnslu persónuupplýsinga sem hvor aðili annast. Aðilar hafa gert með sér samkomulag um þá þætti sem lúta að starfsþjálfuninni, þar á meðal skipulag vinnu og meðferð persónuupplýsinga. Gögn eru eingöngu hýst innan EES og leitast er við að velja trausta og vottaða vinnsluaðila.

Hér að neðan má finna eyðublöð vegna umsóknar um inntöku í starfsþjálfun.

Trúnaðareiður

Kynningarbréf og beiðni um upplýst samþykki

Umboð vegna námsframvindu

Samþykki fyrir öflun upplýsinga úr sakaskrá