Kirkjuþing

Kirkjuþing fer, samkvæmt þjóðkirkjulögum með æðsta vald í málefnum Þjóðkirkjunnar, þ.m.t. fjárstjórnarvald. Kirkjuþing markar stefnu Þjóðkirkjunnar í sameiginlegum málefnum hennar, öðrum en þeim sem lúta að kenningu hennar. Kirkjuþing setur starfsreglur um málefni Þjóðkirkjunnar. Enn fremur samþykkir kirkjuþing ályktanir og samþykktir um málefni Þjóðkirkjunnar.

Upplýsingar um starf kirkjuþings, kirkjuþingsfulltrúa og þingfundi má finna hér á vefsvæði kirkjuþings.

Vefsíða kirkjuþings

Um kirkjuþing

Forseti

Forseti kirkjuþings er kjörinn til fjögurra ára úr röðum leikmanna á fyrsta fundi nýkjörins kirkjuþings.

Forseti ber ábyrgð á starfsemi og rekstri þingsins og hefur æðsta vald í stjórnsýslu þess. Hann undirbýr þinghald kirkjuþings í samráði við forsætisnefnd og stýrir störfum þingsins. Forseti gætir þess, í samvinnu við stjórn Þjóðkirkjunnar, að starfsreglum, ályktunum og öðrum samþykktum kirkjuþings sé fylgt eftir og að þær séu endurskoðaðar eftir þörfum.

Forseti og varaforsetar mynda forsætisnefnd kirkjuþings. Er hún forseta til aðstoðar við stjórn þingsins. Forsætisnefnd gerir tillögur um fulltrúa til þeirra trúnaðarstarfa sem kosið skal til á kirkjuþingi.

Drífa
Hjartardóttir

er forseti kirkjuþings 2022-2026.

Varaforsetar

Kristrún Heimisdóttir er fyrsti varaforseti kirkjuþings og Steindór R. Haraldsson annar varaforseti. Varaforsetar kirkjuþings eru kosnir til eins árs í senn og koma þeir einnig úr röðum leikmanna.

Kristrún
Heimisdóttir

er fyrsti varaforseti kirkjuþings

Steindór R.
Haraldsson

er annar varaforseti kirkjuþings

Kirkjuþing setur reglur fyrir kirkjuna, ályktar um hin ýmsu mál, mótar stefnu í málaflokkum sem varða kirkjuna, fer með fjárstjórnarvaldið og lítur eftir starfi yfirstjórnar kirkjunnar. Með nýjum þjóðkirkjulögum, sem tóku gildi 1. júlí 2021, fékk kirkjuþing almennt æðsta vald í málefnum Þjóðkirkjunnar.

Kirkjuþingsfulltrúar eru kosnir úr röðum sóknarnefndarfólks annars vegar og úr röðum vígðra þjóna kirkjunnar hins vegar. Kjörtímabil er fjögur ár og kemur þingið saman tvisvar sinnum á ári að jafnaði.

Kirkjuþing setur starfsreglur þar sem m.a. er mælt fyrir um nánari útfærslu stjórnskipulags kirkjunnar og helstu starfshætti, tilvist skipulagsheilda, verkferla og margvísleg almenn viðmið í starfseminni. Enn fremur samþykkir kirkjuþing ályktanir og er umræðuvettvangur um hin ýmsu málefni sem varða kirkjuna.

Í fjárstjórnarvaldi kirkjuþings felst m.a. að ákvarða ráðstöfun fjármuna vegna greiðslna ríkisins til kirkjunnar samkvæmt kirkjujarðasamkomulagi frá 1997 og tekjuöflun á móti þeim útgjöldum. Eftirlit með starfi og fjárreiðum kirkjunnar er einnig á ábyrgð kirkjuþings. Á kirkjuþingi getur enn fremur farið fram samtal um tiltekin málefni.

Kirkjuþing hefur að jafnaði frumkvæði að frumvörpum til laga um málefni Þjóðkirkjunnar og leggur til við ráðherra kirkjumála að þau verði flutt á Alþingi.

Ráðherra og þingmenn leita ennfremur umsagnar og tillagna kirkjuþings um lagafrumvörp um kirkjuleg málefni sem lögð eru fram á Alþingi.

Á kirkjuþingi sitja 29 þingfulltrúar kosnir leynilegri kosningu til fjögurra ára. Leikmenn sem skulu lögum samkvæmt vera fleiri en vígðir eru 17 talsins og vígðir 12. Kosningar eru rafrænar. Næst verður kosið til kirkjuþings árið 2026.

Leikmenn

Kjördæmi leikmanna eru níu talsins. Þau ná yfir eitt eða fleiri prófastsdæmi. Úr þremur fjölmennustu kjördæmunum, þ.e. Reykjavíkurprófastsdæmi vestra og eystra og Kjalarnesprófastsdæmi koma þrír leikmenn úr hverju kjördæmi fyrir sig. Úr Eyjarfjarðar- og Þingeyjarprófastsdæmi og Suðurprófastsdæmi koma tveir leikmenn úr hvoru kjördæmi fyrir sig. Úr öðrum kjördæmum kemur einn leikmaður fyrir hvert kjördæmi. Kjörnir eru tveir varamenn í hverju kjördæmi. Þó eru kjörnir þrír í þremur fjölmennustu kjördæmunum.

Vígðir

Kjördæmi vígðra manna eru þrjú talsins. Úr Reykjavíkurkjördæmi koma sex vígðir menn og þrír til vara. Úr Skálholtskjördæmi og Hólakjördæmi koma þrír vígðir menn úr hvoru kjördæmi fyrir sig og tveir til vara í hvoru kjördæmi.

Áheyrnarfulltrúar með málfrelsi og tillögurétt

Málfrelsi og tillögurétt á fundum kirkjuþings hafa, auk kirkjuþingsfulltrúa, biskup Íslands, vígslubiskuparnir í Skálholti og á Hólum, framkvæmdastjóri Þjóðkirkjunnar, fulltrúi guðfræði- og trúarbragðafræðideildar Háskóla Íslands og fulltrúi kirkjuþings unga fólksins.

Sjá nánar um skipan kirkjuþings og kirkjuþingsfulltrúa hér á vefsvæði kirkjuþings.