Styrktarsjóðir
Tveir sjóðir á vegum Þjóðkirkjunnar veita árlega styrki til almennrar eflingar kristinni trú og viðhalds eigna.
Jöfnunarsjóður sókna veitir árlega fjárstyrki til að jafna stöðu sókna. Tekjur sjóðsins eru hluti árlegs afgjalds ríkisins til Þjóðkirkjunnar samkvæmt kirkjujarðasamkomulagi. Aðeins sóknir geta sótt um styrk úr Jöfnunarsjóði.
Fræðslusjóður kirkjunnar styrkir árlega verkefni sem styðja við og efla kynningar- og fræðslustarf kirkjunnar svo og útgáfustarfsemi á því sviði.
Nánari upplýsingar um sjóðina má finna hér að neðan.
Jöfnunarsjóður sókna
Jöfnunarsjóður sókna fær hluta af afgjaldi ríkisins til Þjóðkirkjunnar samkvæmt kirkjujarðasamkomulagi, til úthlutunar ár hvert.
Sótt er um í Jöfnunarsjóð á þjónustuvef Þjóðkirkjunnar. Aðgang að umsóknarformi hafa prestar, formenn, gjaldkerar og framkvæmdastjórar sókna.
Tilgangur Jöfnunarsjóðs er:
a. Að veita styrki til þeirra kirkna, sem hafa sérstöðu umfram aðrar sóknarkirkjur, þannig að þær vegna sögulegra eða annarra sérstakra ástæðna geta talist kirkjur alls landsins. Er hér fyrst og fremst átt við Dómkirkjuna í Reykjavík, Hóladómkirkju, Skálholtsdómkirkju, Hallgrímskirkju í Reykjavík og Hallgrímskirkju í Saurbæ.
b. Að leitast við að jafna aðstöðu sókna og styrkja sóknir, þar sem tekjur skv. lögum um sóknargjöld o.fl., nægja ekki fyrir nauðsynlegum útgjöldum að dómi sóknarnefndar og sóknarprests og að fenginni umsögn héraðsnefndar.
c. Að veita styrki til nauðsynlegra verklegra framkvæmda á vegum sókna, til að styrkja rekstur kirkna, t.d. til kaupa á nauðsynlegum búnaði þeirra og til að styðja kirkjulegt starf innan sókna. Enn fremur er heimilt að veita styrki til að greiða fyrir sameiningu fámennra sókna og til að styrkja sóknir, sem bera sérstakan kostnað. Með styrkjum til verklegra framkvæmda er átt við framlög til viðhalds, endurbóta og nýbygginga kirkna. Enn fremur styrki til byggingar þjónusturýmis og safnaðarheimila, þar sem þeirra er þörf.
d. Að veita styrki til að auðvelda stofnun sókna í nýjum byggðahverfum og greiða fyrir kirkjulegu starfi þar.
e. Að styrkja safnaðaruppbyggingu og aðra kirkjulega félags- og menningarstarfssemi innan sókna eða prófastsdæma og veita héraðssjóðum styrki til verkefna, er undir þá féllu, sbr. 8. gr. laga um sóknargjöld o.fl. Við mat á styrkveitingum til héraðssjóða, skal m.a. höfð hliðsjón af því, hvort þeir fullnýti tekjustofna sína, samkvæmt gildandi starfsreglum um héraðsfundi og héraðsnefndir hverju sinni.
Fræðslusjóður þjóðkirkjunnar
Styrkveitingum er frestað til ársins 2027. Áformað er að opna fyrir umsóknir að nýju á fyrri hluta árs 2027.
Úthlutanir úr sjóðum
Upplýsingar um úthlutanir úr sjóðum má nálgast hér að neðan: