Kristin trú

Kristindómurinn boðar persónulegan Guð sem á í sambandi við manninn og alla sköpun sína. Í kristinni trú er leitað svara við þremur meginspurningum mannsins: Hvernig á ég að breyta? Hverju skal ég trúa? Hvers má ég vona? Samkvæmt fornri kristinni hefð hefur þessum spurningum verið svarað með því að vísa til Boðorðanna tíu, postullegu trúarjátningarinnar og Faðirvorsins. Þessu deilir evangelísk-lúthersk kirkja með öllum kirkjum heimsins og á þessum samkirkjulega grunni byggist öll fræðsla kirkjunnar.