Kosningar til kirkjuþings

Kirkjuþing fer samkvæmt lögum um þjóðkirkjuna með æðsta vald í málefnum kirkjunnar, þ.m.t. fjárstjórnarvald, nema lög kveði á um annað. Í valdi kirkjuþings felst m.a. að móta stefnu kirkjunnar í sameiginlegum málefnum hennar, öðrum en þeim sem lúta að kenningu hennar.

Kirkjuþing setur starfsreglur, þar sem m.a. er mælt fyrir um nánari útfærslu stjórnskipulags kirkjunnar og helstu starfshætti, tilvist skipulagsheilda, verkferla og margvísleg almenn viðmið í starfseminni. Enn fremur samþykkir kirkjuþing ályktanir um hin ýmsu mál og setur samþykktir um málefni þjóðkirkjunnar. Í fjárstjórnarvaldi kirkjuþings felst m.a. að ákvarða ráðstöfun fjármuna vegna greiðslna ríkisins til kirkjunnar samkvæmt kirkjujarðasamkomulagi frá 1997 og tekjuöflun á móti þeim útgjöldum. Eftirlit með starfi og fjárreiðum kirkjunnar er einnig á ábyrgð kirkjuþings.

Á kirkjuþingi getur enn fremur farið fram samtal um tiltekin málefni. Kirkjuþing hefur að jafnaði frumkvæði að frumvörpum til laga um málefni þjóðkirkjunnar og leggur til við ráðherra kirkjumála að þau verði flutt á Alþingi.
Ráðherra kirkjumála leitar umsagnar og tillagna kirkjuþings um lagafrumvörp um kirkjuleg málefni sem hann hyggst flytja á Alþingi.

Kirkjuþing kemur að jafnaði saman tvisvar sinnum á ári og fara nefndarstörf þingsins fram þegar kirkjuþing situr en einnig á milli þingfunda.

Þeir sem hyggjast bjóða sig fram til kirkjuþings skulu hafa tilkynnt kjörstjórn framboð sitt skriflega, eigi síðar en 15. mars 2026. Tilkynningu um framboð skal senda með tölvupósti á netfangið kirkjan@kirkjan.is eða til skrifstofu Þjóðkirkjunnar, Borgartúni 26, Reykjavík. Æskilegt er að ljósmynd fylgi tilkynningunni.

Nánari upplýsingar veitir Ragnhildur Benediktsdóttir, starfsmaður kjörstjórnar, ragnhildur.benediktsdottir@kirkjan.is.

Kjörstjórn getur óskað eftir því að sá sem hyggst bjóða sig fram framvísi staðfestingu um kjörgengi eða gefi kjörstjórn heimild til að afla gagna er sýni kjörgengi hans.

Kjörgengur til kirkjuþings er:

a. hver vígður maður sem á kosningarrétt skv. 3. gr. starfsreglna nr. 8/2021-2022,

b. hver leikmaður sem hefur hlotið skírn í nafni heilagrar þrenningar, skráður er í íslensku þjóðkirkjuna, hefur náð 18 ára aldri og hefur meðmæli sinnar sóknarnefndar.

Hver sá sem fullnægir þessum skilyrðum skal og hafa óflekkað mannorð, sbr. nánar 2.-3. mgr. 7. gr. reglnanna.

Kjörgengisskilyrði skulu vera uppfyllt 1. apríl 2026.

Ef ekki berast nægilega mörg framboð, sbr. 11. gr. starfsreglnanna, skal kjörstjórn svo fljótt sem auðið er gera uppstillingarnefnd kirkjunnar viðvart. Skal uppstillingarnefnd tilnefna þá frambjóðendur sem á vantar. Skal sú tilnefning hafa borist kjörstjórn eigi síðar en 31. mars nk., ásamt samþykki hlutaðeigandi.

Á kirkjuþingi sitja 29 þingfulltrúar kosnir leynilegri rafrænni kosningu til fjögurra ára. Leikmenn, sem skulu lögum samkvæmt vera fleiri en vígðir, eru 17 talsins og vígðir 12.

a. Leikmenn

Kjördæmi leikmanna eru níu talsins. Þau ná yfir eitt eða fleiri prófastsdæmi. Úr þremur fjölmennustu kjördæmunum, þ.e. Reykjavíkurprófastsdæmi vestra og eystra og Kjalarnesprófastsdæmi koma þrír leikmenn úr hverju kjördæmi fyrir sig. Úr Eyjarfjarðar- og Þingeyjarprófastsdæmi og Suðurprófastsdæmi koma tveir leikmenn úr hvoru kjördæmi fyrir sig. Úr öðrum kjördæmum kemur einn leikmaður fyrir hvert kjördæmi. Kjörnir eru tveir varamenn í hverju kjördæmi. Þó eru kjörnir þrír í þremur fjölmennustu kjördæmunum.

b. Vígðir

Kjördæmi vígðra manna eru þrjú talsins. Úr Reykjavíkurkjördæmi koma sex vígðir menn og þrír til vara. Úr Skálholtskjördæmi og Hólakjördæmi koma þrír vígðir menn úr hvoru kjördæmi fyrir sig og tveir til vara í hvoru kjördæmi.

c. Áheyrnarfulltrúar með málfrelsi og tillögurétt

Málfrelsi og tillögurétt á fundum kirkjuþings hafa auk kirkjuþingsfulltrúa, biskup Íslands, vígslubiskuparnir í Skálholti og á Hólum, framkvæmdastjóri Þjóðkirkjunnar, fulltrúi guðfræði- og trúarbragðafræðideildar Háskóla Íslands og fulltrúi kirkjuþings unga fólksins.

Leikmenn eru kosnir á grunni prófastsdæma, sem eru níu. Reykjavíkurprófastsdæmin tvö auk Kjalarnesprófastsdæmis hafa þrjá fulltrúa hvor. Eyjafjarðar- og Þingeyjarprófastsdæmi og Suðurprófastsdæmi hafa tvo fulltrúa. Vesturlands-, Vestfjarða-, Austurlands-, og Húnavatns- og Skagaprófastsdæmi hafa einn fulltrúa.

Reykjavík og nágrenni hafa sex fulltrúa úr röðum vígðra. Þrír eru svo kosnir úr Skálholtsbiskupsumdæmi og aðrir þrír úr Hólabiskupsumdæmi.