28. febrúar 2018
Þjóðkirkja í nútíma skipulagi stjórnunar
![](/library/Images/Frettamyndir/Myndir-a-vefsidum/Gu%c3%b0fr%c3%a6%c3%b0istofnun-febr%c3%baar-2018-Augl%c3%bdsing-%c3%81sd%c3%ads-Emilsd%c3%b3ttir-Petersen-2-1024x503.jpg?proc=NewsImage)
Mánudaginn 5. mars n.k. heldur dr. Ásdís Emilsdóttir Petersen fyrirlestur á málstofu í boði Guðfræðistofnunar í stofu 229 í Aðalbyggingu Háskóla Íslands. Málstofan hefst kl. 11:40 og lýkur kl. 13.
Yfirskrift fyrirlestursins er: Þjóðkirkja í nútíma skipulagi stjórnunar: Hindranir og möguleikar.
Í doktorsrannsókn á leiðtogaeinkennum íslenskra presta og áhrifum þeirra á gæði í safnaðarstarfi benda niðurstöður til þess að styrkja þurfi samskiptaferli innan Þjóðkirkjunnar. Hversu mikilvæg eru góð samskipti með tilliti til árangurs í söfnuði og góðrar ímyndar kirkjunnar? Í fyrirlestrinum verða niðurstöður mátaðar við stjórnunarkenningar um samskipti, ákvarðanatökur og menningu í fyrirtækjum. Þá verða birtar niðurstöður úr nýrri könnun meðal ungs fólks um birtingarmynd og ímynd Þjóðkirkjunnar.
Dr. Ásdís Emilsdóttir Petersen lauk BA-prófi og PhD-prófi frá Guðfræði- og trúarbragðafræðideild HÍ og MA-prófi í mannauðsstjórnun frá Viðskiptafræðideild. Ásdís kennir stjórnun, aðferðafræði og miðlun fyrir útvarp. Ásdís er aðjúnkt við Viðskiptafræðideild Háskóla Íslands.
Málstofan er öllum opin.