Útivist og örpílagrímagöngur

04. maí 2019

Útivist og örpílagrímagöngur

Pílagrímagöngur hafa notið aukinna vinsælda og þá svokallaðar örpílagrímagöngur.

Pílagrímagöngur hafa verið stundaðar í Garðaprestakalli í nokkur ár. Í tengslum við göngurnar hafa verið haldin fræðslukvöld/námskeið. Í lokin hefur verið boðið til pílagrímamessu í Bessastaðakirkju. Forysta í pílagrímamálum prestakallsins hefur verið í höndum nokkurra kvenna og sr. Hans Guðbergs Alfreðssonar, prests í Besssastaðasókn. Örpílagrímagöngurnar hófust í þriðju viku aprílmánaðar samkvæmt vordagskrá prestakallsins og þann 30. apríl sá forseti Íslands, herra Guðni Th. Jóhannesson, um fræðslustund kvöldsins og fjallaði um pílagrímagöngur fyrr á öldum. Þann 26. maí verður svo pílagrímamessa í Bessastaðakirkju.

Dómkirkjan hefur staðið fyrir örpílagrímagöngum undir forystu sr. Elínborgar Sturludóttur sem er þaulkunnug málum sem snerta pílagríma, hefur t.d. leitt pílagrímagöngur í Skálholt og verið fararstjóri á Jakobsveginum fræga. Farið hefur verið á miðvikudögum í örpílagrímur í næsta nágrenni hvernig sem hefur viðrað. Gangan hefur hafist á helgistund í Dómkirkjunni og síðan hefur verið haldið á ýmsa merka staði í nágrenni miðborgarannar sem tengjast sögu kristni og kirkju með ýmsum hætti.

Stefið í pílagrímagöngum er ætíð hið sama: ganga manneskjunnar á vegi lífsins í heiminum sem Guð hefur gefið. Göngurnar hefjast gjarnan á þögn þar sem hver manneskja íhugar með sjálfri sér líf sitt og göngu sína í heiminum. Gangan er hvort tveggja í senn andlegt ferðalag og ferðalag í hinum efnislega heimi þar sem manneskjan skoðar stöðu sína og ræktar og hugar að andlegri líðan sinni í önnum dagsins. Þegar öllu er á botninn hvolft eru allir á sinn hátt pílagrímar á lífsgöngunni. Á þeirri göngu eru rétt að manneskjunni margvísleg verkefni, smá og stór, og misflókin, sem þarf að leysa. Góð andleg hvíld í pílagrímagöngu getur styrkt manneskjuna til að takast á við hversdaginn og verkefni hans.

Lengri pílagrímagöngur hafa verið farnar í kringum kirkjuhátíðir eins og Skálholtshátíð og Hólahátíð.

Örpílagrímagöngur hafa gefið góða raun og eru iðulega vel sóttar. Þær eru kjörin leið til að sameina útvistaráhuga safnaðarfólks, andlega sjálfsrækt og kirkjutengsl.

Sumarið getur verið hentugur tími fyrir bæði örpílagrímagöngur og þær lengri. Upplagt er fyrir alla söfnuði að bæta þessum þætti inn í störf sín. Í nágrenni hverrar kirkju er að finna ýmsa staði sem eru miskunnir og tengjast með einum eða öðru hætti sögu kirkjunnar og landsins – en hvort tveggja er iðulega ofið saman í einn þráð.
  • Frétt

  • Messa

  • Samfélag

  • Samfélag

Hallgrímskirkja í Saurbæ á Hvalfjarðarströnd - aðrar  kirkjur í Garða- og Saurbæjarprestakalli eru á Akranesi, Leirá og Innra-Hólmi
19
feb.

Tvær ráðnar

Garða- og Hvalfjarðarstrandarprestakall fullskipað
Sr. Agnes talaði við heimilisfólkið á dvalarheimilinu í Ólafsvík
19
feb.

Biskup meðal barna og skólafólks, eldri borgara og bæjarstjórnarmanna

Víða farið um Ólafsvíkur- og Ingjaldshólsprestakall og Setbergsprestakall
Merki-þjóðkirkjunnar.png - mynd
18
feb.

Guð elskar okkur eins og við erum - Ákall um íslenskt dvalarleyfi fyrir Maní Shahidi

Við, undirritaðir biskupar þjóðkirkjunnar, hvetjum dómsmálaráðherra til að koma í veg fyrir að fjölskyldunni verði vísað úr landi á forsendum mannúðar og kærleika.