Keflavíkursókn á grænni leið

Keflavíkursókn í grænni sókn!

Keflavíkursókn varð tíundi söfnuðurinn innan þjóðkirkjunnar til að fá viðurkenninguna „Á grænni leið“, en hann hefur hin síðari ár hugað meira að umhverfisstarfi en áður og það borið árangur. Viðurkenningin var afhent í gær.

Til að hljóta þá viðurkenningu þurfa söfnuðir að uppfylla a.m.k. átta atriði af fjörutíu á gátlista umhverfisstarfs þjóðkirkjunnar sem ber heitið „Græni söfnuðurinn okkar“. Reyndar gerði Keflavíkursókn gott betur því starfið þar uppfyllti 21 atriði og þarf því aðeins fjögur í viðbót til að fá viðurkenninguna „Grænn söfnuður“. Sjá nánar hér.

Sjá hér nánar um Grænu kirkjuna. 

Hingað til hefur aðeins einn söfnuður, Árbæjarsöfnuður, náð því marki að teljast Grænn söfnuður en nokkrir eru þar skammt undan.
Flestir söfnuðir hafa í auknum mæli beint sjónum sínum að umhverfissjónarmiðum en viðurkenningar umhverfisstarfsins eru hugsaðar sem hvatning til dáða á þeirri braut.

Á meðfylgjandi mynd með fréttinni má sjá kirkjufólk Keflavíkursóknar taka við viðurkenningunni. Frá vinstri: sr. Fritz Már Jörgensson prestur, sr. Erla Guðmundsdóttir sóknarprestur, sr. Halldór Reynisson frá umhverfisnefnd þjóðkirkjunnar, Ragnheiður Ásta Magnúsdóttir, formaður sóknarnefndar og Þórunn Þórisdóttir rekstrarstjóri Keflavíkurkirkju.