Standa í ströngu með bros á vör

Gugga, Edda og Oddný - kirkjukonur með bros á vör

Í gær var mikið um að vera hjá starfsfólki Kirkjuhússins - Skálholtsútgáfunnar, en verslunin við Laugaveg 31, flutti í Katrínartún 4.

Það hefur lengi verið í undirbúningi. Þú flytur ekki heila verslun í snarheitum. Það krefst undirbúnings og skipulags. Og það verður opnað á morgun, mánudag. 

Og nú var komið að því. Kirkjan.is fylgdist með af athygli.

Tveir stórir flutningabílar athöfnuðu sig við Laugaveg 31, ökumennirnir eru snillingar í að bakka að húsinu. „Dekruðu við bakkið,“ eins og einhver sagði sem stóð fyrir utan hina sögufrægu verslun Brynju. Enda Dekurflutningar þar á ferð.

Kirkjuhúsið - Skálholtsútgáfan hefur verið við Laugaveg hátt í aldarfjórðung. Áður var útgáfan og verslunin við Kirkjustræti, bak Dómkirkjunni. Þegar flutt var á Laugaveg 31 flaug það frá kirkjustjórninni að útgáfan og verslunin yrðu að sjálfsögðu andlit hússins á fyrstu hæð. Og svo sannarlega hefur Edda Möller, framkvæmdastjóri Skálholtsútgáfunnar verið andlit hennar. Ætíð glöð í bragði og hress í lund eins og ásjóna eins húss þarf að vera - og sérstaklega þar sem fagnaðarerindið er meginstoðin. Kínverskt orðtæki segir líka að sá eða sú sem kunni ekki að brosa eigi ekki að reka verslun. Það á svo sannarlega ekki við Eddu Möller. Enda rekur hún verslun og útgáfu.

Þegar kirkjan.is kom að morgni laugardagsins á  Laugaveg 31 voru þær Kirkjuhúskonur Edda, Oddný og Gugga, á kafi við hreingerningar og flutningsundirbúning. Það var sem fjöldi tuskna (þetta er rétt lesandi góður, svona er eignarfall fleirtölu af tuska) væri á lofti í einu þegar þær struku af verslunarinnréttingum sem flytja á. Hér er hagsýni húsmóðurinnar í öndvegi og það notað sem til er en ekki spreðað í eitthvað nýtt þótt verið sé að flytja. Og þær skipuleggja þetta sjálfar sem bestu híbýlafræðingar væru, sjálfstæðar konur og einbeittar. Þannig er verslunin líka tímalaus og minnir á þá hún var við Klapparstíg í fyrndinni, Kirkjustræti og síðast við Laugaveg. Sama verslun og áður en þó með andblæ hins nýja - og viðskiptavininum finnst sem væri hann heima hjá sér..

Það er ætíð gaman að koma í verslunina Kirkjuhúsið, þar sem starfsfólkið býður góðan dag með bros á vör - og spyr hvort kaffi sé ekki þegið meðan gata viðskiptavinarins er greidd og erindum hans svarað. 

Kirkjan.is óskar Kirkjuhúsinu-Skálholtsútgáfunni til hamingju með tímamótin. 

hsh

Einstaklega færir bílstjórar við þröngar aðstæður

Þessi horngluggi er einn sá glæsilegasti við Laugaveginn