Prestakallið Í Laugalandsprestakalli eru sex sóknir, hver með sína sóknarkirkju, þ.e. Grundarsókn, Hólasókn í Eyjafirði, Kaupangssókn, Munkaþverársókn, Möðruvallasókn og Saurbæjarsókn. Í prestakallinu eru rúmlega 1.000 íbúar. Biskupafundur hefur unnið að breytingum á skipan prestakalla um allt land með sameiningum tveggja eða fleiri í eitt stærra prestakall án fækkunar presta. Ofangreind þjónusta var auglýst laus til umsóknar með þeim fyrirvara að vera má að biskupafundur leggi tillögur fyrir kirkjuþing er varða m.a. Laugalandsprestakall og sem kunna að leiða til breytinga á skipan prestakalla í prófastsdæminu, hljóti þær samþykki kirkjuþings.

Presturinn Sr. Jóhanna er fædd í Reykjavík árið 1983 og ólst þar upp. Hún lauk BA-gráðu í guðfræði frá Háskóla Íslands árið 2011, útskrifaðist með mag. theol. gráðu árið 2014 og er auk þess með diplómu í sálgæslu frá Endurmenntun Háskóla Íslands og diplómu í Family Ministry frá Cliff College í Bretlandi. Jóhanna hefur starfað fyrir þjóðkirkjuna í rúman áratug við ýmis störf, m.a. unnið fræðsluefni fyrir fræðslusvið Biskupsstofu og kennt á haustnámskeiðum fræðslusviðs. Hún fékk árið 2015 styrk frá fræðslusviði Reykjavíkurborgar til að vinna efnivið um umhverfisvernd fyrir unglinga sem notað var í æskulýðsstarfi kirkjunnar í nokkur ár í Laugardalnum. Jóhanna hóf störf sem æskulýðsfulltrúi Langholtskirkju árið 2012 og var vígð þangað sem prestur árið 2015. Jóhanna situr nú í stjórn Áhugafélags um guðfræðiráðstefnur, situr í jafnréttisnefnd þjóðkirkjunnar og er formaður Félags prestvígðra kvenna. Jóhanna er gift Guðmundi Bragasyni, vél- og orkutæknifræðingi. Saman eiga þau þrjú börn.