13. apríl 2020

Getum við lært af Dönum?

Streymið er mál málanna hjá kirkjunum nú um stundir. Þær hafa verið duglegar undanfarið við að streyma á heimasíðum sínum sem og Facebókarsíðum frá helgihaldi og einkum og sér í lagi nú um páska. Þetta eru dagar streymiskirkjunnar.

Samkomubannið hefur fært kirkjuna tímabundið frá hefðbundnum stað og yfir í hinn óræða netheim. Kirkjurými til sjávar og sveitar, um landið þvert og endilangt, er komið á netið með sérstakri þátttöku sóknarbarnanna.

Danir hafa verið hugmyndaríkir í streymismálum sínum og viðbrögðum við samkomubanni á kórónuveirutíma. Þeir hafa líka spurt sig þeirrar gagnrýnu spurningar hvort streymið endurspegli prestakirkjuna. Eðli máls er söfnuðurinn dálítið á hliðarlínunni – eflaust eru til ráð við því að koma honum inn í streymið.

Bíllinn ræstur Margar kirkjur í Álaborg efndu á páskadag til „drive-in“ guðsþjónustu á flugvelli Álaborgar. Þar var komið upp risastórum skjá þar sem sjá mátti myndina og síðan var hljóðið sent í útvarpið. Væri þetta hugmynd fyrir kirkjur hér á Stór-Reykjavíkursvæðinu? Að fá lánaðan hluta af Reykjavíkurflugvelli? Eða úti á landsbyggðinni? Væri ráð að nota gamla flugvelli til þessa ef þarf? Kannski hægt að stefna að því ef samkomubann stendur enn yfir þegar hvítasunnan gengur í garð, hinn 31. maí. Hver veit?

„Haldið upp á páskadag með því að draga tappa úr kampavínsflösku, og vínið streymir fram í gullnum dropum, já eins og upprisa“, hljóðuðu skilaboðin frá Havdrup-kirkju í Solrød en kirkjufólkið þar gaf út lista til sóknarbarnanna þar sem mátti finna hugmyndabanka um hvað hægt væri að gera um páskana. Þau stungu til dæmis upp á því að upplagt væri að baka svokallað krossbrauð á (cross buns) á skírdag.

Ein kirkja efndi til ljósmyndakeppni. Hægt var að senda myndir til kirkjunnar gegnum netið sem sýndu einhver páskastef – og stef sem endurómuðu söknuð eftir hinu hefðbundna hversdagslega lífi eða kirkjustarfi þegar kórónuveiran hefur umturnað öllu með sínum hætti. Verðlaun voru margvísleg – til dæmis silfurkross og stutt ferð um merkan kirkjusögustað í lok veirutíðar.

Nýjung Þau í Jakobskirkju í Hróarskeldu buðu upp á „take away“ kvöldmáltíð. Um sjötíu manna hópur hefur komið saman í kirkjunni á skírdag ár hvert og tekið þátt í kvöldmáltíðarsakramentinu. Nú var breyting á. Hægt var að panta mat hjá kirkjunni, páskamat, einnig brauð og vín, ásamt leiðbeiningum um það hvernig fylgjast skyldi með skírdagsguðsþjónustu á Facebók. Og þau bættu hróðug við að þannig væri líka stutt við bakið á slátrara staðarins sem sæi um að útbúa matinn. Semsé verslum í heimabyggð!

Elsta kirkjan á norður Sjálandi er Nødebo-kirkja. Hún blés til samsöngs fyrir utan kirkjuna í gær, páskadag. Meira en sextíu sóknarbörn mættu fyrir framan kirkjuna, gott bil á milli allra að sjálfsögðu. Léttsveit lék undir sönginn og tók nokkrar sjálfstæðar syrpur. Svipað og Vídalínssöfnuður gerði í gær fyrir utan Ísafold – Hrafnistu, í Garðabæ.

Sankt Nicolai-kirkja í Rønne bauð upp á ratleik á páskadag – eins og Laugarneskirkja og Langholtskirkja efndu til í samstarfi – fyrir fullorðna og börn. Alls voru sextán stöðvar í leiknum og verkefni öll tengd páskum og íhugun um þá, við hæfi allra í fjölskyldunni.

Þetta eru allt dæmi um viðbrögð og hugmyndauðgi. Allir vona að sjálfsögðu að samkomubanni verði aflétt sem fyrst – og fróðlegt verður að sjá hver skipuleg verður á því. Eitt skref í einu. En gott er að hafa hugmyndir í pokahorninu ef samkomubann stendur óbreytt og lengur yfir en fólk vonast til.

hsh/Kristeligt Dagblad

Ratleikur - Langholts-og Laugarnessöfnuðir efndu til hans