Syngjandi sumarkveðja

Garðakirkja á Álftanesi. Höfundur sálmatextans, sr. Helgi Hálfdanarson, var prestur þar 1858-1867

Nú er það áttunda sumarmyndbandið af ellefu sem sent er í gegnum vef kirkjunnar. Sálmurinn fjallar um trúna og mikilvægi hennar. 

Saga sálma er oft áhugaverð og stundum löng leið þangað til lag og texti mætast þar sem bæði njóta sín.

Sálmur nr. 207 í sálmabókinni, Sú trú sem fjöllin flytur, eftir sr. Helga Hálfdanarson (1826-1894), er einn af þeim sem sunginn hefur verið við lag sem einnig er notað við marga aðra sálma. Lagið hefur því enga sérstaka tengingu við textann.

Árið 1990 samdi sr. Guðmundur Karl Brynjarsson sem þá þjónaði á Skagaströnd, lag við sálm Hallgríms Péturssonar, nr. 125, Víst er ég veikur að trúa, en lagið getur líka gengið við sálminn Allt eins og blómstrið eina, og var flutt þannig einu sinni á tónleikum á Skagaströnd. Það var hljómsveitin Góðu fréttirnar sem flutti lagið og var sr. Guðmundur Karl félagi í henni.

Árið 2010 við messuundirbúning í Lindakirkju, langaði Guðmund Karl til að láta syngja sálm nr. 207 og nefndi við Óskar organista, að lagið væri þó heldur óspennandi. Sálmasöngsbókin bauð aðeins upp á eitt annað lag sem féll að hryn sálmsins, lagið við Allt eins og blómstrið eina. Þá mundi prestur eftir eigin lagasmíð og sýndi organistanum, sem var ekki lengi að útsetja lagið og æfði það um kvöldið með kórnum. Það var svo flutt í messunni og þá sagði höfundurinn að loks hefði honum fundist lagið vera „komið heim“. 

Söngmálastjóri kynnti lagið ásamt fleiri nýjum sálmalögum á norrænni ráðstefnu um sálma og í framhaldi óskuðu Finnar eftir því að fá það, ásamt þrem öðrum íslenskum sálmum í sinn sálmabókarviðbæti sem kom út árið 2019. Sálmarnir voru allir þýddir á finnsku. Það er því ljóst að sálmar eru ágætis útflutningsvara!

Sálminn Sú trú sem fjöllin flytur er einnig að finna á plötu Kórs Lindakirkju, Með fögnuði.

Sálmurinn er hér fluttur í útsetningu Óskars Einarssonar, organista Lindakirkju.

Sálmarnir ellefu sem hér eru kynntir fram til 4. maí hafa allir verið valdir í sálmabók kirkjunnar sem væntanleg er á þessu ári, og eru þeir meðal nýs efnis bókarinnar.

Söngmálastjóri þjóðkirkjunnar, Margrét Bóasdóttir, og sálmabókarnefnd, völdu sálmana ellefu, sem ekki hafa birst áður í sálmabókum; ný íslensk lög og textar, ný lög við eldri sálma, nýjar þýðingar við þekkt erlend sálmalög, sálmar sem hafa fengið ný og söngvænni lög, sumarsálmar, nýr skírnarsálmur, sálmur um ábyrgð okkar á jörð og umhverfi svo nokkuð sé nefnt.

Flytjendur:

Félagar í Barbörukór Hafnarfjarðarkirkju:
Hulda Dögg Proppé
Hugi Jónsson
Þórunn Vala Valdimarsdóttir

Organisti: Guðmundur Sigurðsson

Upptaka í Hafnarfjarðarkirkju. Upptökustjórn: Friðjón Jónsson

hsh/mb