Fólkið í kirkjunni: List og kirkja

Guðni Einarsson og steindir gluggar í Suðureyrarkirkju

Margar kirkjur eiga í fórum sínum mikla dýrgripi eins og forna kaleika, altaristöflur og skírnarfonta.

Steindir gluggar eru í mörgum kirkjum. Þeir eru líka dýrgripir enda þótt þeir séu ekki gamlir. 

Suðureyrarkirkja við Súgandafjörð er prýdd steindum gluggum eftir Benedikt Gunnarsson (1929-2018) en hann var fæddur á Suðureyri og þjóðkunnur listamaður.

Gluggarnir komu í kirkjuna árið 2000 og voru gefnir í tilefni af 1000 ára kristnitökuafmælinu. Gefendur voru velunnarar Suðureyrarkirkju og voru þeir gefnir til minningar um látna ástvini. Fyrst komu tólf gluggar, síðar bættust fleiri við.

Gluggarnir eru helsta gersemi Suðureyrarkirkju.

Kirkjan.is ræddi í gær við formann sóknarnefndar Suðureyrarkirkju, Guðna Einarsson, sem sýndi kirkjuna. Sóknin er kennd við Stað, Staðarsókn, og er í Holtsprestakalli. 

„Ég er skírður hér og fermdur,“ segir  Guðni stoltur. Hann segist hafa tekið sóknarnefndarformennskuna að sér tímabundið til að bjarga málum.

Guðni er öflugur athafnamaður í sinni heimabyggð og vanur ýmsum umsvifum.

Miklar framkvæmdir standa fyrir dyrum við Suðureyrarkirkju. Ráðist verður í endurnýjun á þaki og kirkjan máluð. Þá þarf að taka upp allt tréverk glugganna og skipta því út en það er illa farið.

„Steindu gluggarnir eru í lagi,“ segir Guðni. Hann segir að fólk sé að velta því fyrir sér að hafa enga gluggapósta svo að gluggarnir njóti sín enn betur utan frá. Ljós sé haft í kirkjunni að vetrarlagi og þá sjást þeir vel.

Kirkjumaðurinn Guðni svarar því til þegar kirkjan.is spyr hvað hann starfi að hausaþurrkun sé þar efst á blaði.

„Þorskhausar og ýsuhausar,“ segir hann hressilega. Og kirkjan.is spyr hvert þeir séu seldir og hann svarar að bragði: „Til Nígeríu.“

Kirkjan.is veltir því fyrir sér hvernig þeir bragðist og spyr Guðna sóknarnefndarformann. Hann segir að í Nígeríu séu þeir kryddaðir ótæpilega og fyrir vikið sé erfitt að koma þeim niður. „Þeir sjóða þá í einhvers konar stöppu.“ En fæðan er meinholl og meira en það.

Guðni segir kirkjuna mikið notaða af pólsku fólki sem búsett er á Suðureyri og er það ánægjuefni. Hann er líka hæstánægður með prestinn sinn, sr. Fjölni Ásbjörnsson, og segir hann vera hinn besta og mætasta dreng. „Ég stæði ekki í þessari formennsku nema vegna hans,“ segir hann ákveðinn á svip. Hann er traustur maður á sínum stað.

Guðni Einarsson, sóknarnefndarformaður á Suðureyri, er einn af þeim fjölmörgu sem stendur við bakið á kirkjunni sinni.

Kirkjan er söfnuðurinn. Fólkið.

hsh

Gluggar Benedikts eru afar fallegir

Suðureyrarkirkja er sviphrein og stendur fremst í bænum

Þessi gluggi bíður þess að vera tekinn í gegn! Og svo verður málað.