11. ágúst 2020

Kirkjan og kórónuveiran

Sr. Agnes með grímu frá Lútherska heimssambandinu

Biskup Íslands, sr. Agnes M. Sigurðardóttir, sendi samstarfsfólki sínu bréf fyrir skömmu vegna hertra aðgerða stjórnvalda í sambandi við kórónuveirufaraldurinn. Segir hún þar að kirkjan fari sem fyrr eftir þessum reglum og virði þær í hvívetna.

Í bréfinu segir biskup þetta um fermingar:

„Búið er að ákveða margar fermingarathafnir sem ekki gátu farið fram í vor og munu þær verða eins og ákveðið hefur verið. Þetta þýðir að hafi verið gert ráð fyrir fleiri fermingarbörnum í athöfn en tveggja metra reglan leyfir og kirkjuskipið leyfir fyrir 100 manna regluna í sama rými verður að fjölga athöfnum. Hafa t.d. fleiri athafnir sama daginn þannig að fermingardagurinn sem ákveðinn hefur verið haldi sér. Altarisgöngur og handsal í fermingarathöfnum falla niður.“

Um útfarir segir biskup:

„að þar verði og að virða tveggja metra regluna og hafa ekki fleira fólk í sama rými en 100. Flestar kirkjur landsins rúmi ekki nema fáa og verði þá að finna aðra leið svo fjölskylda og samferðafólk geti fylgt og kvatt.“

Þá segir biskup:

„Helgihald getur farið fram án altarisgöngu. Altarisgöngur leggjast alveg af á meðan þetta ástand varir.“

Biskup bendir svo fólki á að frekari upplýsingar megi fá á vef landlæknisembættisins.

Á þessari mynd er biskup Íslands með sóttvarnagrímu og er hún merkt Lútherska heimssambandinu. Það minnir á að mikilvægt er að hver og einn gæti að sóttvörnum. En hún minnir líka á að ekki búa allir við jafn traustar aðstæður í heiminum og við Íslendingar.

Lútherska heimssambandið rekur víðtæka hjálparstarfsemi meðal fólks í fátækum heimshlutum, flóttamannabúðum og stríðsþjökuðu umhverfi. Þar getur reynst erfitt að stemma stigu við útbreiðslu kórónuveirunnar. Starfsfólk Lútherska heimssambandsins á þessum slóðum vinnur af miklu þolgæði og dugnaði – þau þekkja aðstæður á hinum hrjáðu svæðum betur en aðrir og hve mikilvægt er að bregðast skjótt við þegar farsóttir láta á sér kræla – eins og kórónuveirufaraldurinn. Nánar er hægt að lesa um þetta hér og leggja málinu lið ef hugur kýs svo.

hsh

Sóttvarnagrímurnar eru í ýmsum litum