Skírnarskógur

Sr. Agnes flutti ávarp við gróðursetningu í Skálholti

Veðrið gat ekki verið betra í Skálholti í dag. Sólbjartur dagur og ilmur haustsins yfir öllu og gróður jarðar að taka á sig litbrigði þess.

Hópur fólks kom saman til að gróðursetja fyrstu trén í skírnarskógaverkefni þjóðkirkjunnar. Hugmyndin er sú að planta einu tré fyrir hvern nýskírðan einstakling í landinu.

Kirkjan á jarðir í öllum landsfjórðungum og verða skikar úr þeim valdir til að gróðursetja skírnartrjáplöntur. Allt verður þetta gert í samvinnu við kirkjustjórnina, sóknarnefndir, presta og prófasta. Mikilvægt er að fólk taki höndum saman um verkefnið svo að öll þau sem skírast á næstu árum fái sitt tré. Skírnarskógar eru litlir í fyrstu eins og flest hinn nýskírðu en þeir stækka og þroskast eins og þau. Nýgróðursett skógarplanta ber framtíðina í sér eins og barnið nýskírða.

Það var svo sannarlega við hæfi að byrja í Skálholti á hinum forna kirkju- og menningarstað.

Skikinn sem valinn er úr landi Skálholts er vel gróinn og kjörinn til að setja þar niður birkiplöntur.

Síðan hófst fólk handa um að setja niður þessar þrjátíu plöntur sem voru með í för, fallegar og bústnar birkiemblur. Það gekk vel fyrir sig og öll viðstödd lögðu fram krafta sína.

Það var gleði og samtakmáttur sem sveif yfir þessum vaska hópi sem kominn var til að ýta skírnarskógaverkefni þjóðkirkjunnar úr vör.

Þegar gróðursetningu var lokið settist fólk niður og tók þátt í helgistund sem vígslubiskupinn í Skálholti, sr. Kristján Björnsson, stýrði

Síðan var haldið niður í Skálholtsbúðir með sól í sinni. Þar beið rjúkandi heitt kaffi og glæsilegt meðlæti. Heimabakað bakkelsi og rúgbrauð með osti og kæfu, hinni frægu og góðu Skálholtskæfu sem er engri annarri kæfu lík. Heiðurinn af veitingunum átti Sigurbjörg Bjarney Ólafsdóttir sem nú stýrir mötuneyti Skálholts, og starfsfólk hennar.

hsh

Formaður umhverfisnefndar þjóðkirkjunnar, sr. Halldór Reynisson, og forseti
kirkjuþings, Drífa Hjartardóttir

Vígslubiskupinn í Skálholti, sr. Kristján Björnsson, stýrði helgihaldi í Skírnarskógi Skálholts

Helgistundin

Sr. Þorvaldur Víðisson, biskupsritari, var kátur að vanda

Embla, birki, fallegar plöntur voru gróðursettar í dag í Skálholti