Pílagrímaganga að útialtarinu

Keltneskur kross prýðir útialtarið á Esjubergi - mynd: hsh

Hafist var handa um að reisa útialtari á Esjubergi fyrir um sjö árum. Altarið er reist til minningar um að á Esjubergi hafi staðið fyrsta kirkja á Íslandi fyrir landnám eftir því sem sagnir herma.

Það er Sögufélagið Steini á Kjalarnesi sem hefur haft forgöngu um að reisa hið veglega altarið sem er nú nánast fullfrágengið og verður vígt að öllu óbreyttu í júnímánuði. Formaður félagsins er Hrefna Sigríður Bjartmarsdóttir, þjóðfræðingur.

Nú hefur félagið Göngu-Hrólfur  boðað til pílagrímsgöngu að útialtarinu á Esjubergi sunnudaginn 6. júní. Í forsvari fyrir Göngu-Hrólf er hin kunna útvarpskona Steinunn Harðardóttir sem hefur og starfað sem leiðsögumaður og fararstjóri heima sem heiman.

Kirkjan.is ræddi við Steinunni Harðardóttur og spurði hana fyrst hvaðan þessi áhugi á pílagrímagöngum væri kominn.

„Það var ítalskur leiðsögumaður í Toscana sem sagði mér frá Nikulási ábóta og leiðarlýsingu hans á pílagrímagöngunni til Rómar,“ segir Steinunn, „Síðan 2013 hafa hópar á mínum vegum gengið valda kafla þessarar leiðar og hefur áherslan verið á þá Íslendinga sem vitað er að gengu til Rómar á miðöldum.“

Pílagrímagangan að Esjubergsaltarinu er á vegum Göngu-Hrólfs sem Steinunn er potturinn og pannan í og skipuleggur meðal annars ferðir í útlöndum í samvinnu við vita.is.

„Í kófinu fór ég að skipuleggja styttri göngur hér heima,“ segir Steinunn, „til dæmis tvær pílagrímagöngur, önnur kringum Mosfell í Grímsnesi og var hún helguð tveimur fyrstu biskupunum sem báðir gengu til Rómar. Hin var tveggja daga ganga frá Munkaþverá að Gásum en Nikulás var ábóti á Munkaþverá.“

Steinunn segir að í sumar sé tveggja daga ganga á dagskrá í tengslum við Bæ í Borgarfirði því þar hafi fyrsta klaustrið verið.

„Í framhaldi af því datt mér í hug Esjuberg þar sem þar var fyrsta kirkjan eftir því sem sagnir herma,“ segir hún og vonast til góðrar þátttöku. Hún segist leggja mikla áherslu á fræðslu í göngunum sem tengd sé sögu og jarðfræði.

Lagt verður í pílagrímagönguna frá skeiðvelli Hestamannafélagsins Harðar á Kjalarnesi sem er skammt frá merktu viktarplani við Blikdalsá og verður svæðið vel merkt. Gangan hefst kl. 10.30 og leiðin er um 8 km. Gert er ráð fyrir 3-4 tíma göngu með hléum. Hrefna Sigríður Bjartmarsdóttir, þjóðfræðingur, mun taka á móti hópnum við altarið og segja frá sögunni í kringum Esjuberg og tilurð altarisins.

Þau sem vilja taka þátt í göngunni geta fengið nánari upplýsingar um hana í gegnum netfangið: steinunnf50@gmail.com

hsh