Kirkjulandið
Þykkvabæjarklausturskirkja - í forgrunni er minnigarsteinn um Þykkvabæjarklaustur. Mynd: Pétur Georg MarkanÁrla morguns 9. nóvember hélt biskup Íslands, sr. Agnes M. Sigurðardóttur, í vísitasíu suður með landinu til heimsóknar við fólkið og kirkjuna í Kirkjubæjarklaustursprestakalli. Á Vegamótum við Landveg gekk sr. Halldóra Þorvarðardóttir prófastur suðursins til liðs við biskup og var þá orðið þrímennt – en biskupsritari fylgir biskupi eftir í vísitasíum, skráir og færir til bókar kirkjulífið.
Fyrsta stopp biskups Íslands var Þykkvabæjarklausturskirkja. Þar tók á móti biskupi, sóknarpresturinn sr. Ingimar Helgason og sóknarnefndarfólkið, Arnfríður Jóhannesdóttir og Jóhannes Gissurarson, sem sýndu kirkjuna og staðinn og buðu í kaffi í nýju og notadrjúgu þjónustuhúsi við kirkjuna. Biskup hélt helgistund í notalegri kirkjunni og var kirkjugarðurinn tekinn út. Nú var sr. Ingimar genginn til liðs við föruneyti biskups og áfram var haldið inn í prestakallið.
Næsti viðkomustaður var Grafarkirkja og Grafarkirkjugarður. Tóku á móti biskupi Ólafur Björnsson, kirkjuhaldari, Lilja Guðgeirsdóttir, meðhjálpari og Auður Guðbjörnsdóttir, formaður sóknarnefndar. Kirkjan falleg og í góðu standi.
Ólafur Björnsson, Auður Guðbjörnsdóttir, Lilja Guðgeirsdóttir, biskup Íslands, frú Agnes M. Sigurðardóttir, sr. Halldóra Þorvarðardóttir, prófastur og sr. Ingimar Helgason.
Um kvöldið var síðan messa í Prestsbakkakirkju hvar sr. Ingimar Helgason þjónaði fyrir altari og biskup Íslands predikaði. Eftir messu var fundað með sómafólkinu í sóknarnefnd á heimili Elínar Önnu Valdimarsdóttur, formanni sóknarnefndar. Heimili Elínar er falllegur og sögufrægur bær, Kirkjubæjarklaustur, bær sem ber nafn með sóma og sanni.
Ómfagur og kátur kirkjukórinn með hjónunum Zbigniew Zuchowicz og Teresu Zuchowicz
Daginn eftir var haldið af stað fyrir dagsins roða og bænhúsið að Núpsstað heimsótt af biskupi.
Bænhúsið að Núpsstað
Þar á eftir var haldið í átt að Kálfafellskirkju þar sem Ragnheiður Hlín Snorradóttir tók á móti föruneyti biskups. Kirkjan er fallegt guðshús með eina elstu, ef ekki elstu, altaristöflu landsins.
Altaristaflan í Kálfafellskirkju er falleg.
Katrín Gunnarsdóttir, skólastjóri og biskup Íslands.
Því næst var hádegismatur snæddur með sóknarnefndum prestakallsins og farið yfir helstu mál og framtíðarmúsík.
Eftir mat var haldið í minningarkapellu sr. Jón Steingrímssonar, eldklerks. Á undan var stoppað í minningargrafreitnum hvar Jón er jarðsettur. Minningarkapellan er dásamlega fallegt guðshús sem reist var á áttunda áratugnum og ber arkitektúr kapellunnar þess fagurt vitni.
Minningarreitur eldklerksins sr. Jóns Steingrímssonar
Minningarkapellan er stílhrein og falleg.
Þaðan lá leiðin á Klausturhóla, dvalar- og hjúkrunarheimili. Þar heilsaði biskup Íslands upp á heimilisfólk og ræddi um Guð, sveit og mannlíf.
Kapellan á Klausturhólum er mikið notuð af heimilisfólki
Seinasta stopp biskups Íslands var Langholtskirkja í Meðallandi. Þar má finna dásamlega perlu eftir Jóhannes Kjarval í sálmatöflu kirkjunnar. Þannig leynist menning landsins um allt í Kirkjulandinu.
Langholtskirkja í Meðallandi
Íslensk menningarsaga er víða í kirkjum landsins. Jóhannes Kjarval málaði þessa sálmanúmera töflu í Langholtskirkju
pgm
