Sorgin og jólin

Bústaðakirkja - altarið er einstaklega tígulegt með steindum glugga sínum og milt - mynd: hsh

Sr. Vigfús Bjarni Albertsson, forstöðumaður Fjölskyldu- og sálgæsluþjónustu kirkjunnar og fyrrum sjúkrahúsprestur, mun flytja fyrirlestur um sorgina í aðdraganda jóla annað kvöld, 9. desember, kl. 20.00 í Bústaðakirkju í Fossvogsprestakalli.

Þjóðkirkjan hefur á að skipa í röðum sínum einvalaliði þegar kemur að faglegri ráðgjöf í viðkvæmum málum eins og sorginni. Þar er fremstur meðal jafninga sr. Vigfús Bjarni Albertsson. Hann hefur áratuga reynslu af sorgarvinnu af vettvangi Landspítalans og að því að leiðbeina og aðstoða einstaklinga og fjölskyldur í sorgarúrvinnslunni og getið sér einkar gott orð um að vera fær í þessum málum.

Gjarnan er sagt að jól séu fjölskylduhátíð og þá i þeirri merkingu að þau safna saman fjölskyldunni á hátíðarstund, stund samveru, hins besta matar, væntumþykju og gjafa.

Á jólum verður oft sárar og ljósar en áður í fjölskyldusamverunni það skarð sem stendur ófyllt þar sem einhver nákominn var, amma, afi, móðir, faðir og jafnvel systkin. Þá verður sorgin áþreifanlegri en áður og erfiðari og því er gott að vita hvernig bregðast skuli við þeim aðstæðum og taka utan um þær í heiðarleika og kærleika.

Óskað er eftir því að þau sem mæta framvísið neikvæðri niðurstöðu úr hraðprófi vegna Covid 19, við innganginn.

hsh

Sr. Vigfús Bjarni Albertsson