Kjósum á kirkjuþing: Þau hafa setið á kirkjuþingi
Sr. Svavar StefánssonFrestur til að skila inn framboðum til kirkjuþings rennur út 15. mars. Tilkynningu um framboð skal skilað inn ásamt fylgigögnum á netfangið: kirkjan@kirkjan.is
Rafrænar kosningar fara svo fram nk. 12. maí - 17. maí.
Kirkjan.is mun á næstu dögum birta stutt viðtöl við fólk sem setið hefur á kirkjuþing og segir það frá reynslu sinni í stuttu máli.
Fólk sem setið hefur á kirkjuþingi hefur komið úr flestum ef ekki öllum starfsstéttum samfélagsins og unnið gott starf í þágu þjóðkirkjunnar. Karlar og konur, fólk til sjávar og sveitar, þéttbýli og dreifbýli. Fólk á öllum aldri. Þetta hefur sýnt breidd þjóðkirkjunnar og sveigjanleika sem er nauðsynlegur í því fjölbreytta samfélagi sem kirkjan er.
Seta á kirkjuþingi er líka gefandi og ánægjulegt starf þar sem kirkjuþingsfulltrúar eiga gott samfélag og kynnast þjóðkirkjunni á nýjan hátt.
Vígður sóknarprestur í Búðardal haustið 1975 en vorið 1976 veitt Norðfjarðarprestakall, Neskaupstað. Sóknarprestur í Þorlákshöfn 1991. Forstöðumaður Svæðisskrifstofu Vinnumálastofnunar á Selfossi 1998 til ársloka 2002. Sóknarprestur í Fellasókn í Reykjavík 2002 til 2016.
Gegndi ýmsum trúnaðarstörfum í félagsmálum og kirkjumálum. Kirkjuþingsmaður í tvö kjörtímabil í prestsskapartíð sinni í Reykjavík. Hefur gegnt ýmsum nefndarstörfum fyrir Þjóðkirkjuna. Leitt stuðningshópa syrgjenda hjá Nýrri dögun í tvo áratugi.
Eiginkona Svavars er Auður B. Kristinsdóttir, sérkennari, og eiga þau þrjú börn.
Það sem mér fannst áhugaverðast, var að kynnast betur hvernig öll löggjöf og starfsreglur kirkjunnar eru unnar og endurskoðaðar í nefndum og umræðum á kirkjuþingi og fá þannig að kynnast betur þessum grundvelli í starfi kirkjunnar. Það var áhugavert og fróðlegt.
Hvaða ráð myndir þú gefa þeim sem hafa áhuga á að bjóða sig fram til setu á kirkjuþingi?
Að kynna sér efni og efnistök mála síðustu kirkjuþinga og kynna fyrir sóknarfólki síns kjördæmis þær áherslur og skoðanir í þeim málum sem kirkjuna varðar og hlusta eftir skoðunum safnaðarfólks.
Hvað kom þér mest á óvart í störfum kirkjuþings?
Ég held að mér hafi komið á óvart hve umræður og nefndarfundir voru frjóir og sýndu mikinn áhuga kirkjuþingsfulltrúa á málefnum kirkjunnar. Einnig oft mikil hugmyndaauðgi um farsælt trúar- og kirkjustarf í stórum sem minni söfnuðum.
Hvernig fannst þér andrúmsloftið og samstarfsandinn hafa verið á kirkjuþingi?
Í flestum tilfellum var andrúmsloft jákvætt og uppbyggilegt þó stundum væru deildar meiningar og ólíkar áherslur eins og eðlilegt er. Kirkjuþingsfulltrúar kunnu að takast á um ólíkar skoðanir. En fulltrúar vildu flestir halda í heiðri að sýna góðan samstarfsanda.
Er eitthvað eitt sem stendur upp úr í minningunni frá tíma þínum á kirkjuþingi?
Sem sóknarpresti þá í fjölmennri sókn í Reykjavík, er mér minnisstætt hve dýrmætt það er að kynnast kirkju- og safnaðastarfi í ólíkum sóknum og héruðum um landið í umræðum á Kirkjuþingi. Þar eignaðist maður marga nýja vini og lærði betur að finna oft málamiðlanir.
hsh
