Tónlist og kirkja

Orgel Neskirkju mun hljóma á Degi kirkjutónlistarinnar - mynd: hsh

Laugardaginn 2. apríl verður mikið um að vera í Neskirkju á Degi kirkjutónlistarinnar. Dagskráin hefst kl. 10.00 og stendur til kl. 15.00.

Engum ætti að leiðast sem leggur leið sína í Neskirkju þar sem dagskráin er afar fjölbreytileg, vönduð og spennandi.

Tónlistarstarf í kirkjunum er þó í öndvegi. Enda hvað er kirkjustarf án tónlistar?

Nokkrir valinkunnir einstaklingar sem allir hafa mikla reynslu af kirkjustarfi ræða um tónlistina í safnaðarstarfinu undir fyrirsögninni Veruleiki og draumsýn.

Nýir sálmar verða kynntir til sögunnar, og vakin verður athygli á Sálmahlaðvarpinu og á Sálmamaraþoni.

Þá verður fjallað um hina sígildu útvarpsmessu sem landsmenn hafa búið við svo áratugum skiptir, þróun hennar og framtíðarmöguleika sem og samstarf þjóðkirkjunnar við Ríkisútvarpið. Útvarpsmessan er svo sannarlega trúar- og menningararfur sem ber að standa traustan vörð um og hafa í heiðri. 

Stofnskrá Tónlistarsjóðs kirkjunnar og STEFs verður undirrituð formlega.

Í lokin mun biskup Íslands, sr. Agnes M. Sigurðardóttir, afhenda Herði Áskelssyni heiðursviðurkenningu í kirkjutónlist. Fleiri viðurkenningar verða einnig veittar eins og fyrir tónsköpun, texta, nótnagjafir og hljómplötur til kirkjutónlistarbókasafns.

Þau sem hafa veg og vanda af undirbúningi þessarar vönduðu og mjög svo áhugaverðu dagskrár eru Bjartur Logi Guðnason, organisti, Lára Bryndís Eggertsdóttir, organisti, sr. Skúli Sigurður Ólafssonu, sóknarprestur, og Margrét Bóasdóttir, söngmálastjóri þjóðkirkjunnar.

hsh

Dagskráin í heild sinni - skjáskot: